Mahāsubhāṣitasaṃgraha 1-9979 · Verses 8056-8075

evaṃ bhavati loke'smin deva sarvasya sarvadā /
prākkarmopārjitaṃ jantoḥ sarvameva śubhāśubham //

evaṃ bhavanti veśyāḥ svārthaikaratā vyapetasadbhāvāḥ /
abhilaṣitaviṣayasiddheḥ kā hānis tadapi yuṣmākam //

evaṃ manaḥ karmavaśaṃ prayuṅkte avidyayātmanyupadhīyamāne /
prītirna yāvanmayi vāsudeve na mucyate dehayogena tāvat //

... ... ... ... ... ... /
evaṃ mūḍhaprabhurvetti nigrahaṃ nāpyanugraham //

evaṃ mūḍhasya mūḍhatvaṃ svārthāndhasyāticitratā /
... ... ... ... ... ... //

evaṃ mohaprabhavo rāgo na strīṣu kasya duḥkhāya /
tāsveva vivekabhṛtāṃ bhavati virāgas tu mokṣāya //

evaṃ yathāha bhavatī mama sarvadoṣāḥ kaḥ svāminā kuvalayākṣi sahānubandhaḥ /
eṣo'ñjalirviracitaḥ kuru nigrahaṃ me dāse'parādhavati ko'vasaraḥ kṣamāyāḥ //

evaṃ lepatrayaṃ kuryāt saptame saptame'hani /
tato janmāvadhi kacāḥ kṛṣṇāḥ syurbhramaraprabhāḥ //

evaṃ lokaṃ paraṃ vidyān naśvaraṃ karmanirmitam /
satulyātiśayadhvaṃsaṃ yathā maṇḍalavartinām //

evaṃ vaśīkṛtasvātmā nityaṃ smitamukho bhavet /
tyajed bhrakuṭisaṃkocaṃ pūrvābhāṣī jagatsuhṛt //

evaṃvādini devarṣau pārśve pituradhomukhī /
līlākamalapatrāṇi gaṇayāmāsa pārvatī //

evaṃ vicāraś cintā ca sāraṃ rājye'dhikaṃ nu kim /
... ... ... ... ... ... //

evaṃvidhān gajāñ jātyān vanādānīya pārthivaḥ /
vinaye śiṣyavat kuryāt putravat paripālayet //

evaṃvidhe bhāvi na veti citte niveśya kāryaṃ bhaṣaṇaṃ vimuñcet /
saṃbhakṣya piṇḍaṃ sthiratāṃ gatasya ceṣṭādikaṃ tasya nirūpaṇīyam //

evaṃ vilokyāsya guṇānanekān samastapāpārinirāsadakṣān /
viśuddhabodhā na kadācanāpi jñānasya pūjāṃ mahatīṃ tyajanti //

evaṃ viṣaprayogeṇa śatrūṇāṃ kṣudradhātakam /
kṣīṇena kriyate yat tu viṣadaṇḍaḥ sa ucyate //

evaṃ viṣahya vidhurasya vidherniyogam āpatsu rakṣitacaritradhanā hi sādhvyaḥ /
guptāḥ svasattvavibhavena mahattamena kalyāṇamādadhati patyurathātmanaśca //

evaṃvṛttasya rājñas tu śiloñchenāpi jīvataḥ /
vistīryate yaśo loke tailabindurivāmbhasi //

evaṃ vedhatrayaṃ kuryāc śaṅkhadundubhiniḥsvanaiḥ /
tataḥ praṇamya gurave dhanurbāṇān nivedayet //

evaṃ śramavidhiṃ kuryād yāvat siddhiḥ prajāyate /
śrame siddhe ca varṣāsu naiva grāhyaṃ dhanuḥ kare //