Mahāsubhāṣitasaṃgraha 1-9979 · Verses 7152-7171

upahitaṃ śiśirāpagamaśriyā mukulajālamaśobhata kiṃśuke /
praṇayinīva nakhakṣatamaṇḍanaṃ pramadayā madayāpitalajjayā //

upaṃśukrīḍito'mātyaḥ svayaṃ rājāyate yataḥ /
avajñā kriyate tena sadā paricayād dhruvam //
upākṛtāyā navayauvanena yāntyā galatsāñjanabāṣpapūram /
bālyaśriyaḥ kiṃ padavī vireje romāvalī khañjanalocanāyāḥ //

upādade tasya sahasraraśmis tvaṣṭrā navaṃ nirmitamātapatram /
sa taddukūlād avidūramaulir babhau patadgaṅga ivottamāṅge //

upādātā yāvanna bhavati bhavādṛgguṇavatām asatkalpāstāvat tribhuvanamahārhā api guṇāḥ /
api prāgdaityārerhṛdayavasateḥ kaustubhamaṇiḥ sa kiṃ nāsīdabdhau śrutirapi kimasya kvacidabhūt //

upādhibhiḥ satatasaṃgato'pi nahi svabhāvaṃ vijahāti bhāvaḥ /
ājanma yo majjati dugdhasindhau tathāpi kākaḥ kila kṛṣṇa eva //

upādhyāyaṃ pitaraṃ mātaraṃ ca ye'bhidruhyanti manasā karmaṇā vā /
teṣāṃ pāpaṃ bhrūṇahatyāviśiṣṭaṃ tasmānnānyaḥ pāpakṛdasti loke //

upādhyāyaśca vaidyaśca pratibhūrbhuktanāyikā /
sūtikā dūtikāścaiva siddhe kārye tṛṇopamāḥ //

upādhyāyān daśācārya ācāryāṇāṃ śataṃ pitā /
sahasraṃ tu pit n mātā gauraveṇātiricyate //

upādhvaṃ tat pānthāḥ punarapi saro mārgatilakaṃ yadāsādya svacchaṃ vilasatha vinītaklamabharāḥ /
itastu kṣārābdherjaraṭhamakarakṣuṇṇapayaso nivṛttiḥ kalyāṇī na punaravatāraḥ kathamapi //

upānahau ca yo dadyāt pātrabhūte dvijottame /
so'pi lokānavāpnoti daivatairabhipūjitān //

upānītaṃ dūrāt parimalamupāghrāya marutā samāyāsīdasmin madhuramadhulobhānmadhukaraḥ /
paro dūre lābhaḥ kupitaphaṇinaś candanataroḥ punarjīvan yāyād yadi tadiha lābho'yamatulaḥ //

upāntapronmīladviṭapijaṭilāṃ kautukavatī kadācid gantāsi priyasakhi na śiprātaṭabhuvam /
yadasyāṃ muktāsragvihitasitabhogibhramatayā vayorūḍhaḥ kekī likhati nakhareṇa stanataṭam //

upāyaṃ cintayet prājño hyapāyamapi cintayet /
paśyato bakamūrkhasya nakulairbhakṣitāḥ sutāḥ //

upāyaṃ yaṃ puraskṛtya sevate sevakaḥ prabhum /
anantarajñas tatraiva yogyaṃ taṃ kila manyate //

upāyakuśalaṃ vaidyaṃ bhṛtyasaṃdūṣaṇe ratam /
śūramaiśvaryakāmaṃ ca yo na hanti sa vadhyate //

upāyajñaśca yogajñas tattvajñaḥ pratibhānavān /
svadharmanirato nityaṃ parastrīṣu parāṅmukhaḥ /
vaktohavāṃścitrakathaḥ syādakuṇṭhitavāk sadā //

upāyanīkṛtaṃ yat tu suhṛtsambandhibandhuṣu /
vivāhādiṣu cācāradattaṃ hrīdattameva tat //

upāyapūrvaṃ lipseta kālaṃ vīkṣya samutpatet /
paścāttāpāya bhavati vikramaikarasajñatā //

upāyamāsthitasyāpi naśyantyarthāḥ pramādyataḥ /
hanti nopaśayastho'pi śayālurmṛgayurmṛgān //

upāyānāṃ ca sarveṣām upāyaḥ paṇyasaṃbhavaḥ /
dhanārthaṃ śasyate hyekas tadanyaḥ saṃśayātmakaḥ //