Mahāsubhāṣitasaṃgraha 1-9979 · Verses 6307-6326

ucitaḥ praṇayo varaṃ vihantaṃ bahavaḥ khaṇḍanahetavo hi dṛṣṭāḥ /
upacāravidhirmanasvinīnāṃ na tu pūrvābhyadhiko'pi bhāvaśūnyaḥ //

ucitakarma tanoti na saṃpadām itaradapyasadeva vivekinām /
iti nirastasamastasukhānvayaḥ kathamato na viṣīdatu paṇḍitaḥ //

ucitaguṇotkṣiptā api purato'pi niveśite suvarṇalave /
jhagiti patanti mukhena prakaṭapramadā yathā ca tulāḥ //
ucitavyayaśīlasya kṛśatvamapi śobhate /
dvitīyaścandramā vandyo na vandyaḥ pūrṇacandramāḥ //

ucitāmupāsya rucitām abhidhehi giraṃ nirantarāvahitaḥ /
apyāyatimati puruṣe prabhuṇā kaluṣeṇa bhūyate kathite //

ucitena vicāreṇa cārutāṃ yānti sūktayaḥ /
vedyatattvāvabodhena vidyā iva manīṣiṇām //

uccaṃ pradeśaṃ bhaṣaṇo'dhiruhya bhaṣatyabhīkṣṇaṃ ravimīkṣamāṇaḥ /
yadā tadānīmacireṇa vṛṣṭir ambhodamuktā bhavati prabhūtā //

uccaḥ satphalado yathāyamahamapyetādṛgetāvatā spardhāṃ manda madoddhataḥ svajanakenārkeṇa mā mā kṛthāḥ /
dūrādeva bhavādṛśo'sya mahasā dhvastāḥ samastāḥ svayaṃ naivecchatyayamatyayaṃ guṇisakhaḥ kasyāpi tejonidhiḥ //

uccakucakumbhanihito hṛdayaṃ cālayati jaghanalagnāgraḥ /
atinimnamadhyasaṃkrama- dārunibhas taruṇi tava hāraḥ //

uccāt pradeśādavatīrya nimnaṃ yo yāti vāmo'tha sukhaprado'sau /
nimnapradeśāt punaruccadeśaṃ yakṣo vrajan dakṣiṇago'pi śastaḥ //

uccāraṇajño'tha girāṃ dadhānam uccā raṇatpakṣigaṇās taṭīs tam /
utkaṃ dharaṃ draṣṭumavekṣya śaurim utkaṃ dharaṃ dāruka ityuvāca //
uccārūḍhairnarairātmā rakṣaṇīyo'tiyatnataḥ /
dūrārohaparibhraṃśavinipātaḥ suduḥsahaḥ //

uccāvacaṃ jagaddauḥsthyam eka eva niṣedhati /
praviṣṭamātro nṛpatiḥ prapañcamiva naḥ śrutiḥ //

uccāvacaṃ na kuruta svanitaṃ pata gās tūrṇaṃ mukhāni paśavo mukulīkurudhvam /
karṇaṃ pradāya rasikāḥ kalayantu harṣaṃ tāraṃ tanoti raṇitaṃ taruṇaḥ piko'yam //

uccāvacakarānyāyyāḥ pūrvarājñāṃ yudhiṣṭhira /
yathā yathā na hīyeraṃs tathā kuryān mahīmatiḥ //

uccāvacāni jananāni bhavanti yāvat karmāṇi tāvadakhilāni layaṃ na yānti /
tat karmamūlahananāya yatadhvamāryā yāvacchiro na viramej jalabandharogaḥ //

uccāsanagato nīcaḥ nīca eva na cottamaḥ /
prasādaśikharastho'pi kākaḥ kiṃ garuḍāyate //

uccityaṃ prathamamadhaḥ sthitaṃ mṛgākṣī puṣpaughaṃ śritaviṭapaṃ grahītukāmā /
āroḍhuṃ caraṇamadādaśokayaṣṭer āmūlaṃ punarapi tena puṣpito'sau //

uccīkṛtagrīvamaho mudhaiva kiṃ yācase cātakapota megham /
atyūrjjitaṃ garjjitamātramasminn ambhodhare bindulavas tu dūre //

uccīyante sma veśmanyaśanavirahite yatnataḥ śrotriyāṇāṃ yatra śyāmākabījānyapi caṭakavadhūcañcukoṭicyutāni /
yasmin dātaryakasmāc caṭulavaṭukarākṛṣṭamuktāvacūla- bhraṣṭās tatraiva dṛṣṭā yuvatibhiralasaṃ ghūrṇitā muktikaughāḥ //

uccaiḥ kalyāṇavāhī karajitavasudhaḥ sarvadā pūrṇakāmo vikhyātaḥ karṇavṛttyā na ca vacasi kaṭuścitrapākānubhāvī /
koṣāpekṣī parasmāducitabahukathas tatparaḥ puṇyaloke citraṃ rājādhirāja tvamiva tava ripus tatra kampaṃ pratīmaḥ //

uccaiḥ kumbhaḥ kapiśadaśano bandhuraskandhasaṃdhiḥ snigdhātāmradyutinakhamaṇirlambavṛttoruhastaḥ /
śūraḥ saptacchadaparimalaspardhidānodako'yaṃ bhadraḥ sāndradrumagirisarittīracārī karīndraḥ //