Mahāsubhāṣitasaṃgraha 1-9979 · Verses 6146-6165

iṣṭāṃ bhāryāṃ priyaṃ mitraṃ putraṃ cāpi kanīyasam /
riktapāṇirna paśyeta tathā naimittikaṃ prabhum //

iṣṭāni cāpyapatyāni dravyāṇi suhṛdaḥ priyāḥ /
āpaddharmavimokṣāya bhāryā cāpi satāṃ matam //

iṣṭān bhogān hi vo devā dāsyante yajñabhāvitāḥ /
tairdattānapradāyaibhyo yo bhuṅkte stena eva saḥ //

iṣṭāpūrtāni kalayet jagatkhyāto vased divi /
akūpāroktavṛtto'gād indradyumno divaṃ punaḥ //

iṣṭā bālakaceṣṭā yauvanadarpo'tha vṛddhavairāgyam /
sāpi gatā so'pi gatas tadapi gataṃ svapnamāyeyam //

iṣṭā makhā dvijavarāś ca mayi prasannāḥ prajñāpitā bhayarasaṃ samadā narendrāḥ /
evaṃvidhasya ca na me'sti manaḥpraharṣaḥ kanyāpiturhi satataṃ bahu cintanīyam //

iṣṭeṣu visṛjatyarthān kubera iva kāmadaḥ /
namasyeyuś ca taṃ bhaktyā śiṣyā iva guruṃ sadā //

iṣṭo vā bahusukṛtopalālito vā śliṣṭo vā vyasanaśatābhirakṣito vā /
dauḥśīlyāj janayati naiva jātvasādhur visrambhaṃ bhujaga ivāṅkamadhyasuptaḥ //

iṣṭvā saṃgrāmayajñena nānāpraharaṇāmbhasā /
asminnavabhṛthe snātaḥ kathaṃ patnyā mayā vinā //

iha kapaṭakutukataralita- dṛśi viśvāsaṃ kuraṅga kiṃ kuruṣe /
tava rabhasataraliteyaṃ vyādhavadhūrvāladhau valate //

iha kiṃ kuraṅgaśāvaka kedāre kalamamañjarīṃ tyajasi /
tṛṇabāṇas tṛṇadhanvā tṛṇaghaṭitaḥ kapaṭapuruṣo'yam //

iha kiṃ pratisphurati me tavāgrato nayaśāstranīranidhipāradṛśvanaḥ /
avalīḍhaviśvatamasaḥ puro raver nahi jātu dīpakaśikhā prakāśate //

iha khalu viṣamaḥ purā kṛtānāṃ vilasati jantuṣu karmaṇāṃ vipākaḥ /
haraśirasi śirāṃsi yāni rejuḥ śiva śiva tāni luṭhanti gṛdhrapādaiḥ //

iha gamiṣyati vaidyamatiḥ śramaṃ prathamameva purastu mahāsukham /
priyatamasya mṛgākṣi samāgame navakaragrahaṇā gṛhiṇī yathā //

iha gurujalabhārapūrṇagarbhāḥ pradaradarībhramabhūribhīmavegāḥ /
taṭakaṭakaniyudhyamānaveṇī- dviguṇamahāravabhairavās taṭinyaḥ //

iha catvāri dānāni proktāni paramarṣibhiḥ /
vicārya nānāśāstrāṇi śarmaṇe'tra paratra ca //

bhītebhyaś cābhayaṃ deyaṃ vyādhitebhyas tathauṣadham /
deyā vidyārthināṃ vidyā deyamannaṃ kṣudhāture //

iha caiva striyo dhanyāḥ śīlasya parirakṣaṇāt /
śīlabhaṅge ca nārīṇāṃ yamalokaḥ sudāruṇaḥ //

śīlaṃ rakṣyaṃ sadā strībhir duṣṭasaṃgavivarjanāt /
śīlena hi paraḥ svargaḥ strīṇāṃ vaiśya na saṃśayaḥ //

iha jagati janasya kasya citte na vasati saukhyavidhānamukhyavārtā /
khalu bhavati tadeva tasya sarvaṃ bhuvanapatis tu yadīśvaraḥ karoti //