Mahāsubhāṣitasaṃgraha 1-9979 · Verses 5966-5985

idānīṃ tu mayā jñātaṃ tyāgān nāsti paraṃ sukham /
nāsti vidyāsamaṃ cakṣur nāsti cakṣuḥsamaṃ balam //

idānīṃ plakṣāṇāṃ jaṭharadalaviśleṣacaturaḥ śikhānāmābandhaḥ sphurati śukacañcūpuṭanibhaḥ /
tataḥ strīṇāṃ hanta kṣamamadharakāntiṃ kalayituṃ samantān niryāti sphuṭasubhagarāgaṃ kisalayam //

idānīṃ vaṃśīnāṃ śabaramithunocchṛṅkhalarahaḥ- kriyāsakhyenālaṃ girivanasaridgrāmasuhṛdām /
sphurallomaśyāmacchagalaśiśukarṇapratisama- cchadāgrābhis tvagbhirvalayitakarīrās taṭabhuvaḥ //

idānīṃ santu kāvyāni bahūni jagatītale /
yadādarśamayaṃ kāvyam ādyaṃ tat tu tadeva hā //

idānīmaṅgamakṣāli racitaṃ cānulepanam /
idānīmeva te kṛṣṇa dhūlīdhūsaritaṃ vapuḥ //

idānīmarghanti prathamakalamacchedamuditā navāgrānnasthālīparimalamuco hālikagṛhāḥ /
udañcaddorvallīraṇitavalayābhiryuvatibhir gṛhītaprotkṣiptabhramitamasṛṇodgīrṇamuśalāḥ //

inaḥ sa eva sevyo yaḥ svālokena sudhāmucā /
dvijendramaṇḍalaṃ kṣīṇaṃ samagrayati saṃpadā //

indindirairnirbharagarbhamīṣad- unmeṣavaccampakapuṣpamāsīt /
hiraṇmayaṃ śāsanalekhahetoḥ sajjaṃ maṣībhāṇḍamiva smarasya //

indindiro marande vimukho yadi kiṃ nu madhuni māhātmyam /
rasiko vāñchati no cet rāgādharabimbamasya ko bhūmā (?) //

indīvaraṃ locanayos tulāyai nirmāya yatnena vidhiḥ kadācit /
atulyatāṃ vīkṣya tato rajāṃsi nikṣipya cikṣepa sa paṅkamadhye //

indīvaradalaśyāmam indirānandakandalam /
vandārujanamandāraṃ vande'haṃ yadunandanam //

indīvaraśyāmatanurnṛpo'sau tvaṃ rocanāgauraśarīrayaṣṭiḥ /
anyonyaśobhāparivṛddhaye vāṃ yogas taḍittoyadayorivāstu //

indīvarasyāntarametadasyā netrotpalasyāpi yato himāṃśoḥ /
tviṣo'pi naikaṃ sahate mukhākhyam ākramya tasthāvaparaṃ śaśāṅkam //

indīvarākṣi tava tīvrakaṭākṣabāṇa- pātavraṇe dvitayamauṣadhameva manye /
ekaṃ tavādharasudhārasapānamanyad uttuṅgapīnakucakuṅkumapaṅkalepaḥ //

indīvarākṣyāḥ sphuṭavidrumoṣṭhyāḥ saṃketamuddiśya vane carantyāḥ /
cauraiḥ samastābharaṇāni hṛtvā nāsāmaṇirno'pahṛtaḥ kimetat //

indīvareṇa nayanaṃ mukhamambujena kundena dantamadharaṃ navapallavena /
aṅgāni campakadalaiḥ sa vidhāya vedhāḥ kānte kathaṃ ghaṭitavānupalena cetaḥ //

indīvarodarasahodarameduraśrīr vāso dravatkanakavṛndanibhaṃ dadhānaḥ /
āmuktamauktikamanoharahāravakṣāḥ ko'yaṃ yuvā jagadanaṅgamayaṃ karoti //

induṃ kairaviṇīva kokapaṭalīvāmbhojinīvallabhaṃ meghaṃ cātakamaṇḍalīva madhupaśreṇīva puṣpavrajam /
mākandaṃ pikasundarīva ramaṇīvātmeśvaraṃ proṣitaṃ cetovṛttiriyaṃ sadā nṛpavara tvāṃ draṣṭumutkaṇṭhate //

induṃ taṇḍulakhaṇḍamaṇḍalaruciṃ nityoditaṃ jātucid darśe meghagharaṭṭaghaṭṭanagaladdehaṃ vidhatte vidhiḥ /
nūnaṃ lokahitecchayā kirati yat saṃtarpaṇaṃ sarvataḥ śubhrādabhraviśiṣṭapiṣṭaruciraṃbhūmau tuṣāraṃ divaḥ //

induṃ nindati cakravākayugalaṃ bhāsāṃ nidhiṃ kauśikaḥ svādukṣīramarocakī sukṛtinaṃ pāpī jaḍaḥ paṇḍitam /
tyaktaṃ sarvajanaiḥ khalaḥ kaṭuvacā grāmyaḥ pumān nāgaraṃ kaḥ paitāmahagolake'tra nikhilaiḥ saṃmānito vartate //