Mahāsubhāṣitasaṃgraha 1-9979 · Verses 4925-4944

āpadyapi durantāyāṃ naiva gantavyamakrame /
rāhurapyakrameṇaiva pibannapyamṛtaṃ mṛtaḥ //

āpadyunmārgagamane kāryakālātyayeṣu ca /
apṛṣṭo'pi hitānveṣī brūyāt kalyāṇabhāṣitam //

āpannamahitaṃ dṛṣṭvā na dūyeta kadācana /
tadunmūlanakālo'yaṃ vidhinā nanu sūcitaḥ //

āpannayā sannagirā vepamānorumūlayā /
jāto me jarayā sārdhaṃ navavadhveva saṃgamaḥ //

āpannavatsala jagajjanataikabandho vidvanmarālakamalākara rāmacandra /
janmādikarmavidhuraiḥ sumanaścakorair ācamyatāṃ tava yaśaḥ śaradāṃ sahasram //

āpannāśāya vibudhaiḥ kartavyāḥ suhṛdo'malāḥ /
na taratyāpadaṃ kaścid yo'tra mitravivarjitaḥ //

āpanno'smi śaraṇyo'smi sarvāvasthāsu sarvadā /
bhagavaṃstvāṃ prapanno'smi rakṣa māṃ śaraṇāgatam //

āpanmūlaṃ khalu yuvatayas tannimitto'vamānas tāsāṃ yāvat salilalaharībhaṅguraḥ pakṣapātaḥ /
apyevaṃ bho pariṇataśaraccandrabimbābhirāmaṃ dūrīkartuṃ vadanakamalaṃ nālamasmatpriyāyāḥ //

ā paritoṣād viduṣāṃ na sādhu manye prayogavijñānam /
balavadapi śikṣitānām ātmanyapratyayaṃ cetaḥ //

āpaskārāllūnagātrasya bhūmiṃ niḥsādhāraṃ gacchato'vāṅmukhasya /
labdhāyāmaṃ dantayoryugmameva svaṃ nāgasya prāpaduttambhanatvam //

āpāṭalādharamadhīravilolanetram āmodanirbharitamadbhutakāntipūram /
āvismitāmṛtamanusmṛtilobhanīyam āmudritānanamaho madhuraṃ murāreḥ //

āpāṭalaiḥ prathamamaṅkuritairmayūkhair ahnāṃ patiḥ prathamaśailavihāriṇīnām /
so'yaṃ karoti surapuṅgavasundarīṇāṃ karṇeṣu kalpatarupallavabhaṅgalakṣmīm //

āpāṇigrahaṇādatipraṇayinī kaṇṭhasthitāhaṃ vibhoḥ sarvaireva haripriyeti kamalā so'pyucyate mādhavaḥ /
no tenāpi dunomi matsutagaṇāḥ padmāsutasyānugā vāṇyetyādhinivāraṇāya satataṃ saṃgīyate vīṇayā //

āpāṇḍu pīnakaṭhinaṃ vartulaṃ sumanoharam /
karairākṛṣyate'tyarthaṃ kiṃ vṛddhairapi saspṛham //

āpāṇḍurāḥ śirasijāstrivalī kapole dantāvalī vigalitā na ca me viṣādaḥ /
eṇīdṛśo yuvatayaḥ pathi māṃ vilokya tāteti bhāṣaṇaparāḥ khalu vajrapātaḥ //

āpāṇḍurā ca mṛtsnā gorasavarṇaśca bhavati pāṣāṇaḥ /
puruṣārdhe kumudanibho dṛṣṭipathaṃ mūṣako yāti //

āpātamātraramaṇīyamatṛptihetuṃ kimpākapākaphalatulyamatho vipāke /
no śāśvataṃ pracuradoṣakaraṃ viditvā pañcendriyārthasukhamarthadhiyastyajanti //

āpātamātrarasike sarasīruhasya kiṃ bījamarpayitumicchasi vāpikāyām /
kālaḥ kalirjagadidaṃ na kṛtajñamajñe sthitvā haniṣyati tavaiva mukhasya śobhām //

āpātamātrasaundaryaṃ kutra nāma na vidyate /
atyantapratipattyā tu durlabho'laṃkṛto janaḥ //

āpātaramaṇīyānāṃ saṃyogānāṃ priyaiḥ saha /
apathyānāmivānnānāṃ pariṇāmo hi dāruṇaḥ //