Mahāsubhāṣitasaṃgraha 1-9979 · Verses 3943-3962

asminnīṣadvalitavitatastokavicchinnabhugnaḥ kiṃcillīlopacitavibhavaḥ puñjitaścotthitaśca /
dhūmodgārastaruṇamahiṣaskandhanīlo davāgneḥ svairaṃ sarpan sṛjati gagane gatvarān patrabhaṅgān //

asmin parasparadveṣaparuṣe puruṣāyuṣe /
kevalaṃ madhurā vāṇī dadātyānīya sauhṛdam //

asmin prakīrṇapaṭavāsakṛtāndhakāre dṛṣṭo manāṅmaṇivibhūṣaṇaraśmijālaiḥ /
pātālamudyataphaṇākṛtiśṛṅgako'yaṃ māmadya saṃsmarayatīva bhujaṅgalokaḥ //

asmin prakṛtimanojñe lagnā prāyeṇa mānmathī dṛṣṭiḥ /
sundari yato bhavatyāḥ pratikṣaṇaṃ kṣīyate madhyaḥ //

asmin bhūvalaye janasya mahimā bhāgyena saṃjāyate no tatrāsti hi kāraṇaṃ prayatatā naivātha kaścid guṇaḥ /
kākāyāśucibhojine hi vitaratyuccaistu loko baliṃ muktāhāraparāyaṇāya śucaye no hanta haṃsāya yat //

asmin marau kimaparaṃ vacasāmavācyaṃ mā muñca pāntha muhurāśritavatsalo bhūḥ /
etat tvayā jalalavāmiṣalālasena dṛṣṭaṃ jvalatparikaraṃ sikatāvitānam //

asmin mahatyanavadhau kila kālacakre dhanyāstu ye katipaye śukayogimukhyāḥ /
līnāstvadaṅghriyugale pariśuddhasattvās tānātmanastava nakhānavadhārayāmaḥ //

asmin mahāmohamaye kaṭāhe sūryāgninā rātridinendhanena /
māsartudarvīparighaṭṭanena bhūtāni kālaḥ pacatīti vārtā //

asmin varṣamahe na vartata idaṃ yatkāmadevotsave stheyaṃ putri nirannayā tadadhunā kiṃcin mukhe dīyatām /
ityukte jaratījanena kathamapyadhvanyavadhvā tataḥ paryaste'hani kalpitaśca kavalo dhautaśca dhārāśrubhiḥ //

asmin vasante na narāḥ sahante vadhūviyogaṃ ca balāsarogam /
kuraṅganābhidravalepabhābhir bhajantu dṛptāḥ pramadāḥ praliptāḥ //

asmin sakhe nanu maṇitvamahāsubhikṣe cintāmaṇe tvamupalo bhava mā maṇirbhūḥ /
adyedṛśā hi maṇayaḥ prabhavanti loke yeṣāṃ tṛṇagrahaṇakauśalameva bhūṣā //

asmin sthite vipadabhūd iti saṃcintya varjyate /
mūḍhaiḥ parivṛḍhairāpatsevako maṅgalecchubhiḥ //

asmi vīrajananīti jananyām asmi vīraramaṇīti ramaṇyām /
saṃmadaṃ vyadadhadutsukacetās tāratūryataralaścalito'nyaḥ //

asmi vīratanayā varavīra- preyasī ca kuru vīrasavitrīm /
adya hṛdyasamarairiti mātā kācidāha tilakākṣatapūrvam //

asmai karaṃ pravitarantu nṛpā na kasmād asyaiva tatra yadabhūt pratibhūḥ kṛpāṇaḥ /
daivād yadā pravitaranti na te tadaiva nedaṃkṛpā nijakṛpāṇakaragrahāya //

asya kṣoṇipateḥ parārdhaparayā lakṣīkṛtāḥ saṃkhyayā prajñācakṣuravekṣyamāṇatimiraprakhyāḥ kilākīrttayaḥ /
gīyante svaramaṣṭamaṃ kalayatā jātena vandhyodarān mūkānāṃ prakareṇa kūrmaramaṇīdugdhodadheḥ rodhasi //

asyatyuccaiḥ śakalitavapuścandano nātmagandhaṃ nekṣuryantrairapi madhuratāṃ pīḍyamāno jahāti /
yadvat svarṇaṃ na calati hitaṃ chinnaghṛṣṭopataptaṃ tadvat sādhuḥ kujananihato'pyanyathātvaṃ na yāti //

asya dagdhodarasyārthe kiṃ na kurvanti paṇḍitāḥ /
vānarīmiva vāgdevīṃ nartayanti gṛhe gṛhe //

asya pracaṇḍabhujadaṇḍabhavaḥ kṛśānuś caṇḍāṃśucaṇḍakarajit sumahāpratāpaḥ /
pratyarthibhūpatipalāśavanaṃ vidahya prauḍhāsu dikṣu bahudāhamurīkaroti //

asya prayāṇeṣu samagraśakter agresarairvājibhirutthitāni /
kurvanti sāmantaśikhāmaṇīnāṃ prabhāprarohāstamayaṃ rajāṃsi //