Mahāsubhāṣitasaṃgraha 1-9979 · Verses 3123-3142

alabdhāntaḥ praveśasya tāramākrandato bahiḥ /
prabho karuṇayā karṇe kriyantāṃ kṛpaṇoktayaḥ //

alabdhe rāgiṇo lokā aho labdhe virāgiṇaḥ /
hemante tāpamīhante hanta grīṣme himaṃ punaḥ //

alabdhvāpi dhanaṃ rājñaḥ saṃśritā yānti saṃpadam /
mahāhradasamīpasthaṃ paśya nīlaṃ vanaspatim //

alabdhvā yadi vā labdhvā nānuśocanti paṇḍitāḥ /
ānantaryaṃ cārabhate na prāṇānāṃ dhanāyate //

alabhanta nabhaḥkṣetre tārāstaralakāntayaḥ /
tviṣaṃ tuṣārabījānāṃ nūtanāṅkuraśālinām //

alabhyaṃ lapsyamānena tattvaṃ jijñāsunā ciram /
jigīṣuṇā hriyaṃ tyaktvā kāryaṃ kolāhalo mahān //

alabhyaṃ labdhukāmasya janasya gatirīdṛśī /
alabdheṣu manastāpaḥ saṃcitārtho vinaśyati //

alabhyalābhāya ca labdhavṛddhaye yathārhatīrthapratipādanāya ca /
yaśasvinaṃ vedavidaṃ vipaścitaṃ bahuśrutaṃ brāhmaṇameva vāsaya //

alamaticapalatvāt svapnamāyopamatvāt pariṇativirasatvāt saṃgamenāṅganāyāḥ /
iti yadi śatakṛtvas tattvamālocayāmas tadapi na hariṇākṣīṃ vismaratyantarātmā //

alamathavā bahuvādair viracaya lokānurāganirbandham /
tatraikatra samagraṃ tannihitaṃ yanna jātu saṃnihitam //

alamandha bhujāyaṣṭibhrāntyā bhrātarjaḍasya te /
daṃśāya daṃdaśūko'yaṃ daṃśamudrāṃ na muñcati //

alamanyathā gṛhītvā na khalu manasvini mayā prayuktamidam /
prāyaḥ samānavidyāḥ parasparayaśaḥpurobhāgāḥ //

alamanyairupālambhaiḥ kīrtitaiśca vyatikramaiḥ /
peśalaṃ cānurūpaṃ ca kartavyaṃ hitamātmanaḥ //

alamapriyāṇyuditvā rucirārthāḥ kimiha na sthitā vācaḥ /
amṛtamiti vacasi satyapi viṣamiti hi kimucyate vāri //

alamabhimukhairbaddhairbhogairalaṃ bhramibhirdṛśor alamaviralairgarjodgārairalaṃ viṣavṛṣṭibhiḥ /
kimiha bhujagāḥ kopāvegairamībhiramudritair nanu bhagavatastārkṣyasyaite vayaṃ stutipāṭhakāḥ //

alamalamaghṛṇasya tasya nāmnā punarapi saiva kathā gataḥ sa kālaḥ /
kathaya kathaya vā tathāpi dūti prativacanaṃ dviṣato'pi mānanīyam //

alamalamatimātraṃ sāhasenāmunā te tvaritamayi vimuñca tvaṃ latāpāśamenam /
calitamapi niroddhuṃ jīvitaṃ jīviteśe kṣaṇamiha mama kaṇṭhe bāhupāśaṃ nidhehi //

alamalamativṛddhyā sthīyatāṃ tasya paśyasy akaruṇa karabhororbhajyate madhyametat /
iti gurujaghanājñācoditā romarājiḥ stanayugamasitākṣyā vaktumārohatīva //

alamalamanugamya prasthitaṃ prāṇanāthaṃ prathamavirahaśoke na pratīkāra eṣaḥ /
sapadi ramaṇayātrā śreya ityāraṭantyā caraṇapatanapūrvaṃ sā niruddheva kāñcyā //

alamalamiyameva prāṇināṃ pātakānāṃ nirasanaviṣaye yā kṛṣṇa kṛṣṇeti vāṇī /
yadi bhavati mukunde bhaktirānandasāndrā viluṭhati caraṇābje mokṣasāmrājyalakṣmīḥ //