Mahāsubhāṣitasaṃgraha 1-9979 · Verses 2963-2982

arthād bhraṣṭastīrthayātrāṃ tu gacchet satyād mraṣṭo rauravaṃ vai vrajecca /
yogād bhraṣṭaḥ satyadhṛtiṃ ca gacched rājyād bhraṣṭo mṛgayāyāṃ vrajecca //

arthānarthāntare buddhir niścitāpi na śobhate /
ghātayanti hi karyāṇi dūtāḥ paṇḍitamāninaḥ //

arthānarthau viniścitya vyavasāyaṃ bhajeta ha /
guṇataḥ saṃgrahaṃ kuryād doṣatastu visarjayet //

arthā na santi na ca muñcati māṃ durāśā tyāge ratiṃ vahati durlalitaṃ mano me /
yācñā ca lāghavakarī svavadhe ca pāpaṃ prāṇāḥ svayaṃ vrajata kiṃ paridevanena //

arthā na syuryadi vijahimo dharmamarthaikasādhyaṃ kāyakleśaiḥ katikatividhaḥ sādhanīyo na dharmaḥ /
kāyaḥ śrānto yadi bhavati kastāvatā dharmalopaś cittaṃ dattvā sakṛdiva śive cintitaṃ sādhayāmaḥ //

arthānāmadhikānāṃ rājñā caureṇa vā nāśaḥ /
anne khalvatibhukte vamanaṃ vā syādvireko vā //

arthānāmananuṣṭhātā kāmacārī vikatthanaḥ /
api sarvāṃ mahīṃ labdhvā kṣiprameva vinaśyati //

arthānāmarjanaṃ kāryaṃ vardhanaṃ rakṣaṇaṃ tathā /
bhakṣyamāṇo nirādāyaḥ sumerurapi hīyate //

arthānāmarjane duḥkham arjitānāṃ ca rakṣaṇe /
nāśe duḥkhaṃ vyaye duḥkhaṃ dhigarthāḥ kaṣṭasaṃśrayāḥ //

arthānāmārjanaṃ kāryaṃ vardhanaṃ rakṣaṇaṃ tathā /
bhakṣyamāṇo nirādāyaḥ kṣīyate himavānapi //

arthānāmīśiṣe tvaṃ vayamapi ca girāmīśmahe yāvaditthaṃ śūras tvaṃ vāgmidarpajvaraśamanavidhāvakṣayaṃ pāṭavaṃ naḥ /
sevante tvāṃ dhanāndhā matimalahataye māmapi śrotukāmā mayyapyāsthā na te cet tvayi mama sutarāmeṣa rājan gato'smi //

arthānāmīśvaro yaḥ syād indriyāṇāmanīśvaraḥ /
indriyāṇāmanaiśvaryād aiśvaryād bhraśyate hi saḥ //

arthānāharato'narthāḥ samāyānti pramādinaḥ /
apramattastato mārge nityamevāstu vittavān //

arthānulāpān vrajasundarīṇām akṛtrimāṇāṃ ca sarasvatīnām /
ārdrāśayena śravaṇāñcalena saṃbhāvayantaṃ taruṇaṃ gṛṇīmaḥ //

arthān kecidupāsate kṛpaṇavat kecit tvalaṃkurvate veśyāvat khalu dhātuvādina ivodbadhnanti kecid rasān /
arthālaṃkṛtisadrasadravamucāṃ vācāṃ praśastispṛśāṃ kartāraḥ kavayo bhavanti katicit puṇyairagaṇyairiha //

arthān brūyān na cāsatsu guṇān brūyān na cātmanaḥ /
ādadyān na ca sādhubhyo nāsatpuruṣamāśrayet //

arthā bhāgyodaye jantuṃ viśanti śataśaḥ svayam /
digbhyo'bhyupetya sarvābhyaḥ sāyaṃ tarumivāṇḍajāḥ //

arthābhāve tu yajjñānaṃ pratyakṣamiva dṛśyate /
gandharvanagarākāraṃ svapnaṃ tadupalakṣayet //

arthābhāve mṛdutā kāṭhinyaṃ bhavati cārthabāhulye /
naikatrārthamṛdutve prāyaḥ śloke ca loke ca //

arthārthinā priyā eva śrīharṣodīritā giraḥ /
sārasvate tu saubhāgye prasiddhā tadviruddhatā //