Mahāsubhāṣitasaṃgraha 1-9979 · Verses 2843-2862

aravindeṣu kundeṣu ramitaṃ kālayogataḥ /
aye mākanda jānīhi tavaivāyaṃ madhuvrataḥ //

araśmi bimbaṃ sūryasya vahniṃ caivāṃśumālinam /
dṛṣṭvaikādaśamāsāttu naro norddhvaṃ tu jīvati //

arasāpi hi vāg bhāti proktāvasara eva hi /
sarvacittapramodāya gālidānaṃ karagrahe //

arasikajanabhāṣaṇato rasikajanaiḥ saha varaṃ kalahaḥ /
lambakucāliṅganato likucakucāpādatāḍanaṃ śreyaḥ //

arājake jīvaloke durbalā balavattaraiḥ /
bādhyante na ca vitteṣu prabhutvamiha kasyacit //

arājake tu loke'smiṃs tasmād rājā vidhīyatām /
rājā rājye ciraṃ rakṣāṃ kṛtvā svargamavāpnuyāt //

arājakeṣu rāṣṭreṣu dharmo na hyavatiṣṭhate /
parasparaṃ ca bādhante sarvathā dhigarājakam //

arājake hi loke'smin sarvato vidrute bhayāt /
rakṣārthamasya sarvasya rājānamasṛjat prabhuḥ //

arātibhiryudhi sahayudhvano hatāñ jighūkṣavaḥ śrutaraṇatūryaniḥsvanāḥ /
akurvata prathamasamāgamocitaṃ cirojjhitaṃ suragaṇikāḥ prasādhanam //

arātivikramālokavikasvaravilocanaḥ /
kṛpāṇodagradordaṇḍaḥ sa sahasrāyudhīyati //

arālakeśyā alake vidhātrā vidhīyamāne calatūlikāgrāt /
cyutasya bindorasitasya mārga- rekheva reje navaromarājī //

arāvapyucitaṃ kāryam ātithyaṃ gṛhamāgate /
chettumapyāgate chāyāṃ nopasaṃharate drumaḥ //

ariṃ mitramudāsīnaṃ madhyasthaṃ sthaviraṃ gurum /
yo na budhyati mandātmā sa ca sarvatra naśyati //

ariṇā saha saṃvāsād viṣeṇa saha bhojanāt /
pāpmanā saha sauhārdān maraṇaṃ pratipadyate //

arito'bhyāgato doṣaḥ śatrusaṃvāsakāritaḥ /
sarpasaṃvāsadharmitvān nityodvegena dūṣitaḥ //

jāyate plakṣabījāśāt kapotādiva śālmaleḥ /
udvegajanano nityaṃ paścādapi bhayāvahaḥ //

aripakṣāśrite mitre marmavedipriyaṃvade /
viśvāso naiva kartavyaḥ yadi sākṣād bṛhaspatiḥ //

aribhirjitairaśaktair vijñāpyaṃ sevakaiḥ prabhornītiḥ /
viṣayairjito'smi śaṃbho tava yacchlāghyaṃ tadāracaya //

arivadhadehaśarīraḥ sahasā rathisūtaturagapādātaḥ /
bhāti sadānatyāgaḥ sthiratāyāmavanitalatilakaḥ //

ariśca mitraṃ bhavati mitraṃ cāpi praduṣyati /
anityacittaḥ puruṣas tasmin ko nāma viśvaset //