Mahāsubhāṣitasaṃgraha 1-9979 · Verses 1863-1882

anyonyeṣāṃ puṣkarairāmṛśanto dānodbhedānuccakairbhugnavālāḥ /
unmūrdhānaḥ saṃnipatyāparāntaiḥ prāyudhyanta spaṣṭadantadhvanībhāḥ //

anyopabhogakaluṣā mānavatī premagarvitā muditā /
saundaryagarvitā ca premaparādhīnamānasānūḍhā //

anyo'pi candanatarormahanīyamūrteḥ sekārthamutsahati tadguṇabaddhatṛṣṇaḥ /
śākhoṭakasya punarasya mahāśayoyam ambhoda eva śaraṇaṃ yadi nirguṇasya //

anyo hi nāśnāti kṛtaṃ hi karma sa eva kartā sukhaduḥkhabhāgī /
yattena kiṃciddhi kṛtaṃ hi karma tadaśnute nāsti kṛtasya nāśaḥ //

anvagrāhi mayā preyān niśi svopanayāditi /
na vipralabhate tāvad ālīriyamalīkavāk //

anvayāgatavidyānām anvayāgatasaṃpadām /
viduṣāṃ ca prabhūṇāṃ ca hṛdayaṃ nāvalipyate //

anvarthavedī śūraśca kṣamāvānna ca karkaśaḥ /
kalyāṇamedhāstejasvī sa bhadraḥ parikīrtitaḥ //

anviṣyadbhirayaṃ cirāt kathamapi prārthyeta yadyarthibhir nātha tvaṃ punararthinaḥ pratidinaṃ yatnāt samanviṣyasi /
prāptau cintitamātrakaṃ dadadasau cintātiriktapradaṃ tvāmālokya vidīryate yadi na tadgrāvaiva cintāmaṇiḥ //

anvīkṣaṇaṃ ca vidyānāṃ sadvarṇāśramarakṣaṇam /
grahaṇaṃ śastraśāstrāṇāṃ yuddhamārgopaśikṣaṇam //

anvetaṃ vāyavo yānti pṛṣṭhe bhānurvayāṃsi ca /
anuplavante meghāśca yasya tasya raṇe jayaḥ //

anveṣayati madāndha- dviradamadāmbusiktamavanitalam /
pariṇatagarbhabharārtā siṃhavadhūḥ śallakīvipine //

apaḥ piban prapāpālīm anurakto vilokayan /
agastyaṃ cintayāmāsa caturaḥ sāpi sāgarān //

apakartāhamasmīti hṛdi te mā sma bhūdbhayam /
vimukheṣu na me khaḍgaḥ prahartuṃ jātu vāñchati //

apakāradaśāyāmapy upakurvanti sādhavaḥ /
chindantamapi vṛkṣaḥ svac chāyayā kiṃ na rakṣati //

apakāramasaṃprāpya tuṣyet sādhurasādhutaḥ /
naiṣo'lābho bhujaṅgena veṣṭito yo na daśyate //

apakāriṇi kopaścet kope kopaḥ kathaṃ na jāyeta /
dharmārthakāmamokṣa- prāṇayaśohāriṇi krūre //

apakāriṇi cet kopaḥ kope kāpaḥ kathaṃ na te /
dharmārthakāmamokṣāṇāṃ prasahya paripanthini //

apakāriṇi visrambhaṃ yaḥ karoti narādhamaḥ /
anātho durbalo yadvan na ciraṃ sa tu jīvati //

apakāriṣu mā pāpaṃ cintaya tvaṃ kadācana /
svayameva patiṣyanti kūlajātā iva drumāḥ //

apakuryāt samarthaṃ vā nopakuryādyadāpadi /
ucchindyādeva tanmitraṃ viśvasyāṅkamupasthitam //