Mahāsubhāṣitasaṃgraha 1-9979 · Verses 1783-1802

anyasya lagati karṇe jīvitamanyasya harati bāṇa iva /
hṛdayaṃ dunoti piśunaḥ kaṇṭaka iva pādalagno'pi //

anyasyai saṃpratīyaṃ kuru madanaripo svāṅgadānaprasādaṃ nāhaṃ soḍhuṃ samarthā śirasi suranadīṃ nāpi saṃdhyāṃ praṇantum /
ityuktvā kopaviddhāṃ vighaṭayitumumāmātmadehaṃ pravṛttāṃ rundhānaḥ pātu śambhoḥ kucakalasahaṭhasparśakṛṣṭo bhujo vaḥ //

anyāṅganābhiradhikaṃ sa karoti keliṃ tvaṃ tena mā kuru viṣādamadabhrarūpe /
pepīyate madhukaraḥ kva na taṃ marandaṃ no jātu vismarati paṅkajinīṃ tathāpi //

anyā jagaddhitamayī manasaḥ pravṛttir anyaiva kāpi racanā vacanāvalīnām /
lokottarā ca kṛṭirākṛtirārtahṛdyā vidyāvatāṃ sakalameva girāṃ davīyaḥ //

anyādānākulāntaḥkaraṇavaśavipadbādhitapretaraṅkaṃ grāsabhraśyatkarālaślathapiśitaśavāgragrahe muktanādam /
sarvaiḥ krāmadbhirulkānanakavalarasavyāttavaktraprabhābhir vyaktaistaiḥ saṃvaladbhiḥ kṣaṇamaparamiva vyomni vṛttaṃ śmaśānam //

anyānapi tarūn ropya phalapuṣpopayoginaḥ /
ratnadhenusahasrasya phalaṃ prāpnoti mānavaḥ //

anyā nirarthikā cintā balatejaḥpraṇāśinī /
nāśayet sarvasaukhyaṃ tu rūpahāniṃ nidarśayet //

anyāni śāstrāṇi vinodamātraṃ prāpteṣu vā teṣu na taiśca kiṃcit /
cikitsitajyotiṣamantravādāḥ pade pade pratyayamāvahanti //

anyāni śāstrāṇi vinodamātraṃ prāpteṣu kāleṣu na taiśca kiṃcit /
cikitsitajyotiṣamantravādāḥ pade pade pratyayamāvahanti //

anyānparivadan sādhur yathā hi paritapyate /
tathā parivadannanyāṃs tuṣṭo bhavati durjanaḥ //

anyānyopamitaṃ yugaṃ nirupamaṃ te'yugmamaṅgeṣu yat so'yaṃ sikthakamāsyakāntimadhunastanvaṅgi candrastava /
tvadvācāṃ svaramātrikāṃ madakalaḥ puṃskokilo ghoṣayaty abhyāsasya kimastyagocaramiti pratyāśayā mohitaḥ //

anyā prakāmasurataśramakhinnadehā rātriprajāgaravipāṭalanetrapadmā /
śayyāntadeśalulitākulakeśapāśā nidrāṃ prayāti mṛdusūryakarābhitaptā //

anyā priyeṇa paribhuktamavekṣya gātraṃ harṣānvitā viracitādharacāruśobhā /
kūrpāsakaṃ paridadhāti nakhakṣatāṅgī vyālambinīlalalitālakakuñcitākṣī //

anyābhyo vanyābhyo mālati dhanyāsi vallarībhyastvam /
yat kila tavaiva savidhe krīḍati madhupaḥ sadaiva mudito'yam //

anyāmanyāṃ dhanāvasthāṃ prāpya vaiśeṣikīṃ narāḥ /
asaṃtuṣṭāḥ pramuhyanti saṃtoṣaṃ yānti paṇḍitāḥ //

anyāyaḥ prauḍhavādena nīyate nyāyatāṃ yayā /
nyāyaścānyāyatāṃ lobhāt kiṃ tayā kṣudravidyayā //

anyāyakarabhogaiśca yo hi jīvati nityaśaḥ /
virāgādeva lokānāṃ bhraṃśate sa hi pārthivaḥ //

anyāyadraviṇādāneṣv udyamaḥ kriyate vṛthā /
lubdhānāṃ satyasaṃkocāt saṃkucantyeva saṃpadaḥ //

anyāyavittena kṛto'pi dharmaḥ savyāja ityāhuraśeṣalokāḥ /
nyāyārjitārthena sa eva dharmo nirvyāja ityāryajanā vadanti //

anyāyasamupāttena dānadharmo dhanena yaḥ /
kriyate na sa kartāraṃ trāyate mahato bhayāt //