Mahāsubhāṣitasaṃgraha 1-9979 · Verses 1160-1179

adhyeti nṛtyati lunāti minoti nauti krīṇāti hanti vapate cinute bibheti /
muṣṇāti gāyati dhinoti bibharti bhinte lobhena sīvyati paṇāyati yācate ca //

adhruveṇa śarīreṇa pratikṣaṇavināśinā /
dhruvaṃ yo nārjayeddharmaṃ sa śocyo mūḍhacetanaḥ //

adhruve hi śarīre yo na karoti tapo'rjanam /
sa paścāttapyate mūḍho mṛto gatvātmano gatim //

adhvaklāntatanurnavajvaravatī nṛtyaślathāṅgī tathā māsaikaprasavā dadāti surate ṣaṇmāsagarbhā sukham /
vikhyātā virahasya saṃgamavidhau kruddhaprasanne ṛtu- sthāne nūtanasaṃgame madhumade rāgāspadaṃ yoṣitaḥ //

adhvani padagrahaparaṃ madayati hṛdayaṃ na vā na vā śravaṇam /
kāvyamabhijñasabhāyāṃ mañjīraṃ kelivelāyām //

adhvanīno'tithirjñeyaḥ śrotriyo vedapāragaḥ /
mānyāvetau gṛhasthasya brahmalokamabhīpsataḥ //

adhvanyadhvani taravaḥ pathi pathi pathikairupāsyate chāyā /
viralaḥ sa ko'pi viṭapī yamadhvago gṛhagataḥ smarati //

adhvanyadhvani bhūruhaḥ phalabṛto namrānupekṣyādarād dūrādunnatisaṃśrayavyasaninaḥ pānthasya mugdhātmanaḥ /
yanmūlaṃ samupāgatasya madhuracchāyāphalaiḥ kā kathā śīrṇenāpi hi nopayogamagamat parṇena tāladrumaḥ //

adhvanyasya vadhūrviyogavidhurā bhartuḥ smarantī yadi prāṇānujjhati kasya tanmahadaho saṃjāyate kilbiṣam /
ityevaṃ pathikaḥ karoti hṛdaye yāvat tarormūrdhani prodghuṣṭaṃ parapuṣṭayā tava tavetyuccairvaco'nekaśaḥ //

adhvanyāḥ kila mūlagartamadhunāpyāpūrayantyaśrubhir vyākrośantyadhunā sabāndhavakulāḥ sāyaṃ muhūrtaṃ dvijāḥ /
itthaṃ yāvadimāni bibhrati śucaṃ bhūtānyapi tvatkṛte tāvattvaṃ na gato'si pādapa ciraṃ kīrtyātmanā vartase //

adhvanyānāṃ śiśirasamaye caṇḍacāṇḍālakāṇḍa- prāyāḥ kāyānahaha pavanāḥ kleśayanto viśanti /
badhnantyete sapadi sudṛśāṃ durbhagānāmapīha prauḍhāśleṣāślathitadayitaṃ mūrdhni saubhāgyapaṭṭam //

adhvanyān kati rundhate kati dṛdhān bhindanti toyākarān kedārān kati yajjayanti kati ca vyāpāṭayanti drumān /
vāhinyaḥ kṣaṇaluptavārivibhavā vanyā avanyāmimā yaḥ sindhuḥ sakalāśrayaḥ sa tu punaḥ kutreti na jñāyate //

adhvanyairmakarandaśīkarasurāmattakvaṇatkokile mārge mārganirodhinī parihṛtā śaṅke'śubhāśaṅkayā /
pānthastrīvadhapātakādupagataṃ caṇḍālacihnaṃ madhor eṣā kiṅkiṇikeva ṣaṭpadamayī jhaṃkāriṇī saṃhatiḥ //

adhvaśramāya caraṇau virahāya dārā abhyarthanāya vacanaṃ ca vapurjarāyai /
etāni me vidadhatastava sarvadaiva dhātastrapā yadi na kiṃ na pariśramo'pi //

adhvaśrāntamavijñātam atithiṃ kṣutpipāsitam /
yastaṃ na pūjayed bhaktyā tamāhurbrahmaghātinam //

adhvāgrajāgrannibhṛtāpadandhur bandhuryadi syāt pratibandhumarhaḥ /
joṣaṃ janaḥ kāryavidastu vastu pracchyā nijecchā padavīṃ mudastu //

adhvā jarā dehavatāṃ parvatānāṃ jalaṃ jarā /
asaṃbhogo jarā strīṇāṃ vākśalyaṃ manaso jarā //

adhvā jarā manuṣyāṇām anadhvā vājināṃ jarā /
amaithunaṃ jarā strīṇām aśvānāṃ maithunaṃ jarā //

adhvānaṃ naikacakraḥ prabhavati bhuvanabhrāntidīrghaṃ vilaṅghya prātaḥ prāptuṃratho me punariti manasi nyastacintātibhāraḥ /
saṃdhyākṛṣṭāvaśiṣṭasvakaraparikaraiḥ spaṣṭahemārapaṅkti vyākṛṣyāvasthito'stakṣitibhṛti nayatīvaiṣa dikcakramarkaḥ //

adhvā na yadi nisaṅgapaṅkasaṃkulito bhavet /
tataḥ kutaste dhaureya dhuryatā vyajyatāmiyam //