Mahāsubhāṣitasaṃgraha 1-9979 · Verses 1040-1059

adhamamitrakumitrasamāgamaḥ priyaviyogabhayāni daridratā /
apayaśaḥ khalu lokaparābhavo bhavati pāpataroḥ phalamīdṛśam //

adhamarṇaśavājīviśrāddhabhugduṣṭabhūbhujām /
abhiprāyā na siddhyanti tenedaṃ dhriyate jagat //

adhamāḥ kalimicchanti saṃdhimicchanti madhyamāḥ /
uttamā mānamicchanti māno hi mahatāṃ dhanam //

adhamā dhanamicchanti dhanamānau ca madhyamāḥ /
uttamā mānamicchanti māno hi mahatāṃ dhanam //

adhame saṃgatā lakṣmīr nopabhogāya kasyacit /
kardame patitā chāyā sahakārataroriva //

adhamo mātukāraśca dhātukāraśca madhyamaḥ /
dhātumātukriyākāra uttamaḥ parikīrtitaḥ //

adhamo lakṣaṇajñaḥ syān madhyamo lakṣyamācaret /
lakṣyalakṣaṇasaṃyukta uttamaḥ parikīrtitaḥ //

adharaṃ kila bimbanāmakaṃ phalamasmāditi bhavyamanvayam /
labhate'dharabimbamityadaḥ padamasyā radanacchadaṃ vadat //

adharaḥ kisalayarāgaḥ komalaviṭapānukāriṇau bāhū /
kusumamiva lobhanīyaṃ yauvanamaṅgeṣu saṃnaddham //

adharaḥ padmarāgo'yam anarghaḥ savraṇo'pi te /
mugdhe hastaḥ kimartho'yam apārtha iha dīyate //

adharadyutirastapallavā mukhaśobhā śaśikāntilaṅghinī /
tanurapratimā ca subhruvo na vidherasya kṛtiṃ vivakṣati //

adharamadhare kaṇṭhaṃ kaṇṭhe nidhāya bhujaṃ bhuje hṛdi ca hṛdayaṃ madhye madhyaṃ sarojadṛśo dṛḍham /
sarabhasamaho corāvūruṃ padaṃ ca pade balād gamayati jano dhanyaḥ kaścit samāṃ śiśire niśām //

adharamadhare kaṇṭhe kaṇṭhaṃ sacāṭu dṛśordṛśāv alikamalike kṛtvā gopījanena sasaṃbhramam /
śiśuriti rudan kṛṣṇo vakṣaḥsthale nihito'cirān- nibhṛtapulakaḥ smeraḥ pāyāt smarālasavigrahaḥ //

adharamamṛtaṃ kaḥ saṃdeho madhunyapi nānyathā madhuramadhikaṃ drākṣāyāśca prasannarasaṃ phalam /
sakṛdapi punarmadhyasthaḥ san rasāntaravijjano vadatu yadihānyat svādu syāt priyādaśanacchadāt //

adharasya madhurimāṇaṃ kucakāṭhinyaṃ dṛśostathā taikṣṇyam /
kavitāyāḥ paripākān anubhavarasiko vijānāti //

adharāmṛtapānena mamāsyamaparādhyatu /
mūrdhno kimaparāddhaṃ yaḥ pādau nāpnoti cumbitum //

adharāmṛtamādhurīdhurīṇo harilīlāmuralīnināda eṣaḥ /
pratatāna manaḥpramodamuccair hariṇīnāṃ hariṇīdṛśaṃ munīnām //

adharāmṛtena pittaṃ naśyati vāyuḥ payodharayugena /
anavarataratena kaphaṃ tridoṣaśamanaṃ vapurnāryāḥ //

adhareṇa samāgamād radānām aruṇimnā pihito'pi śuklabhāvaḥ /
hasitena sitena pakṣmalākṣyāḥ punarullāsamavāpa jātapakṣaḥ //

adhareṇonnatibhājā bhujaṃgaparipīḍitena te dūti /
saṃkṣobhitaṃ mano me jalanidhiriva mandarāgeṇa //