Mahāsubhāṣitasaṃgraha 1-9979 · Verses 0601-0620

atilobho na kartavyaḥ kartavyastu pramāṇataḥ /
atilobhajadoṣeṇa jambuko nidhanaṃ gataḥ //

atilobho na kartavyo lobhaṃ naiva parityajet /
atilobhābhibhūtasya cakraṃ bhramati mastake //

atilohitakaracaraṇaṃ mañjulagorocanātilakam /
haṭhaparivartitaśakaṭaṃ muraripumuttānaśāyinaṃ vande //

atilaulyaprasaktānāṃ vipattinairva dūrataḥ /
jīvaṃ naśyati lobhena mīnasyāmiṣadarśane //

ativādāṃstitikṣeta nābhimanyetkathaṃcana /
krodhyamānaḥ priyaṃ brūyād ākruṣṭaḥ kuśalaṃ vadet //

ativādāṃstitikṣeta nāvamanyeta kaṃcana /
na cemaṃ dehamāśritya vairaṃ kurvīta kenacit //

ativādo'timānaśca tathātyāgo narādhipa /
krodhaścātivivitsā ca mitradrohaśca tānī ṣaṭ //

eta evāsayastīkṣṇāḥ kṛntantyāyūṃṣi dehinām /
etāni mānavān ghnanti na mṛtyurbhadramastu te //

ativāhitamatigahanaṃ vināpavādena yauvanaṃ yena /
doṣanidhāne janmani kiṃ na prāptaṃ phalaṃ tena //

ativitatagaganasaraṇi- prasaraṇaparimuktaviśramānandaḥ /
marudullāsitasaurabha- kamalākarahāsakṛdravirjayati //

ativipulaṃ kucayugalaṃ rahasi karairāmṛśan muhurlakṣmyāḥ /
tadapahṛtaṃ nijahṛdayaṃ jayati hararmṛgayamāṇa iva //

ativiśadānantapada- pravṛttadṛṣṭirna madhuravīkṣaṇataḥ /
tṛpyatyañcitakāmaḥ prātastanakamalamukulavīkṣaṇataḥ //

ativṛṣṭiranāvṛṣṭiḥ śalabhāḥ mūṣaKāḥ śukāḥ /
asatkaraśca daṇḍaśca paracakrāṇi taskarāḥ //

rājānīkapriyotsargo marakavyādhipīḍanam /
paśūnāṃ maraṇaṃ rogo rāṣṭravyasanamucyate //

ativyayo'napekṣā ca tathārjanamadharmataḥ /
moṣaṇaṃ dūrasaṃsthānāṃ koṣavyasanamucyate //

atiśayitakadambo'yaṃ modakadambānilo vahati /
viyadambudameduritaṃ me duritaṃ paśya nāgato dayitaḥ //

atiśaravyayatā madanena tāṃ nikhilapuṣpamayasvaśaravyayāt /
sphuṭamakāri phalānyapi muñcatā tadurasi stanatālayugārpaṇam //

atiśaucamaśaucaṃ vā atinindā atistutiḥ /
atyācāramanācāraṃ ṣaḍvidhaṃ mūrkhalakṣaṇam //

atiślathālambipayodhareyaṃ śubhrībhavatkāśavikāsikeśā /
atītalāvaṇyajalapravāhā prāvṛṭ jarāṃ prāpa śaracchalena //

atisaṃcayalubdhānāṃ vittamanyasya kāraṇam /
anyaiḥ saṃcīyate yatnād anyaiśca madhu pīyate //