Mahāsubhāṣitasaṃgraha 1-9979 · Verses 0461-0480

ajño'pi tajjñatāmeti śanaiḥ śailo'pi cūrṇyate /
bāṇo'pyeti mahālakṣyaṃ paśyābhyāsavijṛmbhitam //

ajño bhavati vai bālaḥ pitā bhavati mantradaḥ /
ajñaṃ hi bāla ityāhuḥ pitetyeva tu mantradam //

ajño vā yadi vā viparyayagate jñāne'tha saṃdehabhṛd dṛṣṭādṛṣṭavirodhi karma kurute yastasya goptā guruḥ /
niḥ saṃdehaviparyaye sati punarjñāne viruddhakriyaṃ rājā cet puruṣaṃ na śāsti tadayaṃ prāptaḥ prajāviplavaḥ //

añcati rajanirudañcati timiramidaṃ cañcati mahobhūḥ /
uktaṃ na tyaja yuktaṃ viracaya raktaṃ manastasmin//

añcalāntaritagurjarāṅganā- kuṅkmāruṇakucaprabhādharam /
kokarāgapaṭalairnu rañjitaṃ bhānumantamudayantamāśraye //

añjanamustośīraiḥ sanāgakośātakāmalakacūrṇaiḥ /
katakaphalasamāyuktaiḥ kūpe yogaḥ pradātavyaḥ //

añjanamiṣataḥ strīṇāṃ dṛśorviṣaṃ śaśvadāvasati /
kathamanyathā tadīṣat pāte'pi hatā yuvānaḥ syuḥ //

añjanasya kṣayaṃ dṛṣṭvā valmīkasya ca saṃcayam /
avandhyaṃ divasaṃ kuryād dānādhyayanakarmabhiḥ //

añjaliṃ śapathaṃ sāntvaṃ praṇamya śirasā vadet /
aśruprapātanaṃ caiva kartavyaṃ bhūtimicchatā //

añjaliṃ śapathaṃ sāntvaṃ śirasā pādavandanam /
āśākaraṇamityekaṃ kartavyaṃ bhūtimicchatā //

añjalirakāri lokair mlānimanāptaiva rañjitā jagatī /
saṃdhyāyā iva vasatiḥ svalpāpi sakhe sukhāyaiva //

añjalisthāni puṣpāṇi vāsayanti karadvayam /
aho sumanasāṃ vṛttir vāmadakṣiṇayoḥ samā //

añjalau jalamadhīralocanā locanapratiśarīraśāritam /
āttamāttamapi kāntamukṣituṃ kātarā śapharaśaṅkinī jahau //

aṭatā dhātrīmakhilām idamāścaryaṃ mayā dṛṣṭam /
dhanado'pi nayananandana pariharasi yadugrasaṃparkam //

aṭatkaṭakaghoṭakaprakaṭacāpaṭaṅkāravac caṭaccaṭaditi sphuṭaṃ sphuṭati medinī karparam /
nijāmadharaṇīpatau valati kautukāḍambarād idaṃ bhuvanamaṇḍalaṃ daradarīdarīdaryaho //

aṭanena mahāraṇye supanthā jāyate śanaiḥ /
vedābhyāsāt tathā jñānaṃ śanaiḥ parvatalaṅghanam //

aṭa vā vikaṭaḥ patatranādaiḥ kaṭuvācaṃ raṭa vāthavā divāndha /
paruṣaṃ paripaśya saṃyataṃ tat paramaṃ naḥ puramāgato na cet tvam //

aṭavī kīdṛśī prāyo durgamā bhavati priye /
priyasya kīdṛśī kāntā tanoti suratotsavam //

aṭavyā drumapuṣpāṇi dūrasthā api bāndhavāḥ /
kāntā cālekhyarūpā ca te kāle na pratiṣṭhitāḥ //

aṭṭaśūlā janapadāḥ śivaśūlāścatuṣpathāḥ /
keśaśūlāḥ striyo rājan bhaviṣyanti yugakṣaye //