Mahāsubhāṣitasaṃgraha 1-9979 · Verses 0381-0400

ajasraṃ lasatpadminī vṛndasaṅgaṃ madhūni prakāmaṃ pibantaṃ milindam /
ravirmocayatyabjakārāgṛhebhyo dayālurhi no duṣṭavad doṣadarśī //

ajasrabhūmītaṭakuṭṭanotthitair upāsyamānaṃ caraṇeṣu reṇubhiḥ /
rayaprakarṣādhyayanārthamāgatair janasya cetobhirivāṇimāṅkitaiḥ //

ajasramabhyāsamupeyuṣā samaṃ mudaiva devaḥ kavinā budhena ca /
dadhau paṭīyān samayaṃ nayannayaṃ dineśvaraśrīrudayaṃ dine dine //

ajasramārohasi dūradīrghāṃ saṃkalpasopānatatiṃ tadīyām /
śvāsān sa varṣatyadhikaṃ punaryad dhyānāttava tvanmayatāṃ tadāpya //

ajā iva prajā mohād yo hanyāt pṛthivīpatiḥ /
tasyaikā jāyate tṛptir na dvitīyā kathaṃcana //

ajāgalasthastana uṣṭrapucchaṃ kakṣāntare keśamathāṇḍayugmam /
tvāṃ saṃsṛjan sāyaṇamāyaṇādau brahmāgragaṇyo na babhūva pūjyaḥ //

ajāṅghrinirdattarajaścayāpi kapālinā baddharasāpi kāmam /
tato'pyadhodhaḥ patitāpi nityaṃ gaṅgā kusaṅgāpi punāti lokān //

ajājījambāle rajasi maricānāṃ ca luṭhitāḥ kaṭutvāduṣṇatvājjanitarasanauṣṭhavyatikarāḥ /
anirvāṇotthena prabalataratailāktatanavo mayā sadyo bhṛṣṭāḥ katipayakavayyaḥ kavalitāḥ //

ajātamṛtamūrkhāṇāṃ varamādyau na cāntimaḥ /
sakṛdduḥkhakarāvādyāv antimas tu pade pade //

ajātamṛtamūrkhebhyo mṛtājātau sutau varam /
yatastau svalpaduḥkhāya yāvajjīvaṃ jaḍo dahet //

ajātaromāmatisundarāṅgīṃ śṛṅgāravallīmiva rājakanyām /
bhuktvā drutaṃ kvāpi gato na cet syāḥ syātte tadānarthanipāta eva //

ajādhūliriva trastair mārjanīreṇuvajjanaiḥ /
dīpakhaṭvotthacchāyeva tyajyate nirdhano janaḥ //

ajānatā bhavetkaścid aparādhaḥ kuto yadi kṣantavyameva tasyāhuḥ suparīkṣya parīkṣayā //

ajānatī kāpi vilokanotsukā samīradhūtārdhamapi stanāṃśukam /
kucena tasmai calate'karot puraḥ purāṅganā maṅgalakumbhasaṃbhṛtim //

ajānan māhātmyaṃ patati śalabhas tīvradahane sa mīno'pyajñānād baḍiśayutamaśnātu piśitam /
vijānanto'pyete vayamiha vipajjālajaṭilān na muñcāmaḥ kāmānahaha gahano mohamahimā //

ajāmūtraṃ ca tadviṣṭhā sūkarasya tathaiva viṭ /
budbudaṃ lepato hanyān maṇḍalikṣveḍasaṃbhavam //

ajāyantaitasmādamṛtaśaśilakṣmīprabhṛtayaḥ paritrātāścendrāt kulaśikhariṇaḥ pūrvayamunā /
upetā ityevaṃ tava jalanidhe tīramadhunā vigarjābhiḥ kiṃ naḥ śrutipuṭamaho jarjarayasi //

ajāyuddhamṛṣiśrāddhaṃ prabhāte meghaḍambaraḥ /
dampatyoḥ kalahaścaiva bahvārambhe laghukriyā //

ajārajaḥ khararajas tathā saṃmārjanīrajaḥ /
dīpakhaṭvotthacchāyā ca śakrasyāpi śriyaṃ haret //

ajārajaḥ parvaṇi maithunāni śmaśānadhūmo maṭhabhojanāni /
rajasvalānetranirīkṣaṇāni haranti puṇyāni divā kṛtāni //