Mahāsubhāṣitasaṃgraha 1-9979 · Verses 0041-0060

akasmādeva tanvaṅgī jahāsa yadiyaṃ punaḥ /
nūnaṃ prasūnabāṇo'syāṃ svārājyamadhitiṣṭhati //

akasmādeva te caṇḍi sphuritādharapallavam /
mukhaṃ muktāruco dhatte gharmāmbhaḥkaṇamañjarīḥ //

akasmādeva yaḥ kopād abhīkṣṇaṃ bahu bhāṣate /
tasmādudvijate lokaḥ sasphuliṅgādivānalāt //

akasmāddveṣṭi yo bhaktam ājanmaparisevitam /
na vyañjane ruciryasya tyājyo nṛpa ivāturaḥ //

akāṇḍakopino bhartur anyāsakteśca yoṣitaḥ /
praśāntiścetasaḥ kartuṃ brahmaṇāpi na śakyate //

akāṇḍadhrtamānasavyavasitotsavaiḥ sārasair akāṇdapaṭutāṇḍavairapi śikhaṇḍināṃ maṇḍalaiḥ /
diśaḥ samavalokitāḥ sarasanirbharaprollasad- bhavatpṛthuvarūthinīrajanibhūrajaḥśyāmalāḥ //

akāṇḍapātajātānām astrāṇāṃ marmabhedinām /
gāḍhaśokaprahārāṇām acintaiva mahauṣadham //

akāṇḍe vakṣojaskhalitavasanavyāpṛtakaraṃ mṛṣā jṛmbhārambhonnamitabhujabandhonnatakucam /
vṛthā yātāyātaiḥ kapaṭakalitānyonyahasitaṃ harantyetāścittānyahaha jagatāṃ vāravanitāḥ //

akāmasya kriyā kācid dṛśyate neha kaṛhicit /
yadyaddhi kurute kiṃcit tattat kāmasya ceṣṭitam //

akāmāṃ kāmayānasya śarīramupatapyate /
icchantīṃ kāmayānasya prītirbhavati śobhanā //

akāmān kāmayati yaḥ kāmayānān paridviṣan /
balavantaṃ ca yo dveṣṭi tamāhurmūḍhacetasam //

akāraṇaṃ rūpamakāraṇaṃ kulaṃ mahatsu nīceṣu ca karma śobhate /
idaṃ hi rūpaṃ paribhutapūrvakaṃ tadeva bhūyo bahumānamāgataṃ //

akāraṇaṃ vyākaraṇaṃ tantrīśabdo'pyakāraṇam /
akāraṇaṃ trayo vedās taṇḍulāstatra kāraṇam //

akāraṇāviṣkṛtakopadāruṇāt khalādbhayaṃ kasya na nāma jāyate /
viṣaṃ mahāheriva yasya durvacaḥ suduḥsahaṃ saṃnihitaṃ sadā mukhe //

akāraṇena viprebhyo yaḥ kupyati narādhipaḥ /
krṣṇasarpaṃ sa gṛhṇāti śirasā baladaṛpitaḥ //

akāryakaraṇādbhītaḥ kāryāṇāṃ ca vivarjanāt /
akāle mantrabhedācca yena mādyenna tat pibet //

akāryapratiṣedhaśca kāryāṇāṃ ca pravartanam /
pradānaṃ ca pradeyānām adeyānāmasaṃgrahaḥ //

akāryamasakṛt kṛtvā dṛśyante hyadhanā narāḥ /
dhanayuktāstvadharmasthā dṛśyante cāpare janāḥ //

akāryāṇyapi paryāpya kṛtvāpiṃ vṛjinārjanaṃ /
vidhīyate hitaṃ yasya sa dehaḥ kasya susthiraḥ //

akārye tathyo vā bhavati vitathaḥ kāmamathavā tathāpyuccairdhāmnāṃ harati mahimānaṃ janaravaḥ /
tulottīrṇasyāpi prakaṭanihatāśeṣatamaso ravestādṛktejo na hi bhavati kanyāṃ gata iti //