Mahabharata · Chapter 9.6

etacchrutvā vaco rājño madrarājaḥ pratāpavān /
duryodhanaṃ tadā rājanvākyametaduvāca ha //

duryodhana mahābāho śṛṇu vākyavidāṃ vara / yāvetau manyase kṛṣṇau rathasthau rathināṃvarau /
na me tulyāvubhāvetau bāhuvīrye kathañcana //

udyatāṃ pṛthivīṃ sarvāṃ sasurāsuramānavām /
yodhayeyaṃ raṇamukhe saṅkruddhaḥ kimu pāṇḍavān //

vijeṣyāmi raṇe pārthānsomakāṃśca samāgatān /
ahaṃ senāprametā te bhaviṣyāmi na saṃśayaḥ //

taṃ ca vyūhaṃ vidhāsyāmi na ka riṣyanti yaṃ pare /
iti satyaṃ bravīmyeṣa duryodhana na saṃśayaḥ //

adyaivāhaṃ raṇe sarvānpāñcālānsaha pāṇḍavaiḥ /
nihaniṣyāmi vā rājansvargaṃ yāsyāmi vā hataḥ //

adya paśyantu māṃ lokā vicarantamabhītavat //

adya pāṇḍusutāḥ sarve vāsudevaḥ sasātyakiḥ / pāñcālāścedayaścaiva draupadeyāśca sarvaśaḥ /
dhṛṣṭadyumnaḥ śikhaṇḍī ca sarve cāpi prabhadrakāḥ //

vikramaṃ mama paśyantu dhanuṣaśca mahadbalam /
lāghavaṃ cāstravīryaṃ ca bhujayośca balaṃ yudhi //

adya paśyantu me pārthāḥ siddhāśca saha cāraṇaiḥ /
yādṛśaṃ me balaṃ bāhvoḥ sampadastreṣu yā ca me //

adya me vikramaṃ dṛṣṭvā pāṇḍavānāṃ mahārathāḥ /
pratīkāraparā bhūtvā ceṣṭante vividhāḥ kriyāḥ //

adya sainyāni pāṇḍūnāṃ drāvayiṣye samantataḥ //

droṇabhīṣmāvati vimo sūtaputraṃ ca saṃyuge /
vicariṣye raṇamukhe priyārthaṃ tava kaurava //
sañjaya uvāca /

evamuktastato rājā madrādhipatimañjasā / abhyaṣiñcata senāyā madhye bharatasattama /
vidhinā śāstradṛṣṭena kliṣṭarūpo viśāmpate //

abhiṣikte tatastasminsiṃhanādo mahānabhūt /
tava sainye'bhyavādyanta vāditrāṇi ca bhārata //

hṛṣṭāścāsaṃstathā yodhā madrakāśca mahārathāḥ /
tuṣṭuvuścaiva rājānaṃ śalyamāhavaśobhinam //

jaya rājaṃściraṃ jīva jahi śatrūnsamāgatān / tava bāhubalaṃ prāpya dhārtarāṣṭro mahābalaḥ /
nikhilāṃ pṛthivīṃ sarvāṃ praśāstu nihatadviṣam //

tvaṃ hi śakto raṇe jetuṃ sasurāsuramānavān /
martyadharmāṇa iha tu kimu sṛñjayasomakān //

evaṃ sampūjyamānastu madrāṇāmadhipo balī /
harṣaṃ prāpa tadā vīro durāpamakṛtātmabhiḥ //
sañjaya uvāca /

abhiṣikte tathā śalye tava sainyeṣu mānada /
na karṇavyasanaṃ kiñcinmenire tatra bhārata //

hṛṣṭāḥ sumanasaścaiva babhūvustatra sainikāḥ /
menire nihatānpārthānmadrarājavaśaṅgatān //

praharṣaṃ prāpya senā tu tāvakī bharatarṣabha /
tāṃ rātriṃ sukhitā suptā harṣacittā ca sābhavat //

sainyasya tava taṃ śabdaṃ śrutvā rājā yudhiṣṭhiraḥ /
vārṣṇeyamabravīdvākyaṃ sarvakṣatrasya paśyataḥ //

madrarājaḥ kṛtaḥ śalyo dhārtarāṣṭreṇa māghava /
senāpatirmaheṣvāsaḥ sarvasainyeṣu pūjitaḥ //

etajjñātvā yathābhūtaṃ kuru mādhava yatkṣamam /
bhavānnetā ca goptā ca vidhatsva yadanantaram //

tamabravīnmahārāja vāsudevo janādhipam /
ārtāyanimahaṃ jāne yathātattvena bhārata //

vīryavāṃśca mahātejā mahātmā ca viśeṣataḥ /
kṛtī ca citrayodhī ca saṃyukto lāghavena ca //

yādṛgbhīṣmastathā droṇo yādṛkkarṇaśca saṃyuge /
tādṛśṛstadviśiṣṭo vā madrarājo mato mama //

yudhyamānasya tasyāhaṃ cintayānaśca bhārata /
yoddhāraṃ nādhigacchāmi tulyarūpaṃ janādhipa //

śikhaṇ़ḍyarjunabhīmānāṃ sātvatasya ca bhārata /
dhṛṣṭadyumnasya ca tathā balenābhyadhiko raṇe //

madrarājo mahārājaḥ siṃhadviradavikramaḥ /
vicariṣyatyabhīḥ kāle kālaḥ kruddhaḥ prajāsviva //

tasyādya na prapaśyāmi pratiyoddhāramāhane /
tvāmṛte puruṣavyāghra śārdūlasamavikramam //

sa tvameko hi loke'sminnānyastvattaḥ pumānbhavet /
madrarājaṃ raṇe kruddhaṃ yo hanyātkurunandana //

ahanyahani yudhyantaṃ kṣobhayantaṃ balaṃ tava /
tasmājjahi raṇe śalyaṃ maghavāniva śambaram //

sauteḥ paścādasau vīro dhārtarāṣṭreṇa satkṛtaḥ / tavaiva hi jayo nūnaṃ hate madreśvare yudhi /

tasminhate hataṃ sarvaṃ dhārtarāṣṭrabalaṃ mahat // etacchrutvā mahārāja vacanaṃ mama sāmpratam /

pratyudyāhi raṇe pārtha madrarājaṃ mahāratham //
jahi cainaṃ mahābāho vāsavo namuciṃ yathā //

na caivātra dayā kāryā mātulo'yaṃ mameti vai /
kṣatravarma puraskṛtya jahi madrajaneśvaram //

droṇabhīṣmārṇavaṃ tīrtvā karṇapātālasambhavam / mā nimajjasva sagaṇaḥ śalyamāsādya goṣpadam /

yacca te tapaso vīryaṃ yacca kṣātraṃ balaṃ tava /
taddarśaya raṇe sarvaṃ jahi cainaṃ mahāratham //
sañjaya uvāca /

etāvaduktvā vacanaṃ keśavaḥ paravīrahā /
jagāma śibiraṃ sāyaṃ pūjyamāno'tha pāṇḍavaiḥ //

keśave tu tadā yāte dharmaputro yudhiṣṭhiraḥ / visṛjya sarvānbhrātṝṃśca pāñcālānatha somakān /
suṣvāpa rajanīṃ tāṃ tu viśalya iva kuñjaraḥ //

te ca sarve maheṣvāsāḥ pāñcālāḥ pāṇḍavāstathā /
karṇasya nidhane hṛṣṭāḥ suṣupustāṃ niśāṃ tadā //

gatajvaraṃ maheṣvāsaṃ tīrṇapāraṃ mahāratham / babhūva pāṇḍaveyānāṃ sainyaṃ ca muditaṃ niśi /
sūtaputrasya nidhanājjayaṃ labdhvā ca māriṣa //