Mahabharata · Chapter 9.50

indratīrthaṃ tato gatvā yadūnāṃ pravaro balī /
viprebhyo dhanaratnāni dadau snātvā yathāvidhi //

tatra hyamararājo vai īje kratuśatena ha /
bṛhaspateśca deveśaḥ pradadau vipulaṃ dhanam //

anargalānsajārūthyānsarvānvividhadakṣiṇān /
ājahara kratūṃstatra yathoktaṃ vedapāragaiḥ //

tānkratūnbharataśreṣṭha śatakṛtvo mahādyutiḥ /
pūrayāmāsa vidhivattataḥ khyātaḥ śatakratuḥ //

tasya nāmnā tu tattīrthaṃ śivaṃ puṇyaṃ sanātanam /
indratīrthamiti khyātaṃ sarvapāpapramocanam //

upaspṛśya ca tatrāpi vidhivanmusalāyudhaḥ /
brāhmaṇānpūjayitvā ca pānācchādunabhojanaiḥ //

śubhaṃ tīrthavaraṃ tasmādrāmatīrthaṃ jagāma ha /
yatra rāmo mahābhāgo bhārgavaḥ sumahātapāḥ //

asakṛtpṛthivīṃ kṛtvā hatakṣatriyapuṅgavām /
upādhyāyaṃ puraskṛtya kāśyapaṃ munisattamam //

ayajadvājapeyena so'śvamedhaśatena ca /
pradadau dakṣiṇārthaṃ ca pṛthivīṃ sāgarāmbarām //

rāmo dattvā dhanaṃ tatra dvijebhyo janamejaya /
upaspṛśya yathānyāyaṃ pūjayitvā tathā dvijān //

puṇyatīrthe śubhe deśe vasu dattvā halāyudhaḥ / munīṃścaivābhivādyātha yamunātīrthamāgamat /
yatrānayāmāsa tadā rājasūyamapāmpatiḥ //

diteḥ sutānmahābhāgo varuṇo vai sitaprabhaḥ / yatra nirjitya saṅgrāme mānuṣāndānavāṃstathā /
gandharvānrākṣasāṃścaiva varuṇaḥ paravīrahā //

tasminkratuvare vṛtte saṅgrāmaḥ samajāyata /
devānāṃ dānavānāṃ ca trailokyasya bhayāvahaḥ //

rājasūye kratuśreṣṭhe nivṛtte janamejaya /
jāyate sumahāghoraḥ sankṣayaḥ kṣatriyānprati //

halāyudhastadā rāmastasmiṃstīrthavare śubhe /
tatrasnātvā ca dattvā ca dvijebhyo vasu mādhavaḥ //

vanamālī tato hṛṣṭaḥ stūyamāno dvijātibhiḥ /
tasmādādityatīrthaṃ ca jagāma kamalekṣaṇaḥ //

yatreṣṭvā bhagavāñjyotirbhāskaro rājasattama /
jyotiṣāmādhipatyaṃ ca prabhāvaṃ cābhyapadyata //

tasyā nadyāstu tīre vai sarve devāḥ savāsavāḥ /
viśvedevāḥ samaruto gandharvāpsarasaśca ha //

dvaipāyanaḥ śukaścaiva kṛṣṇaśca madhusūdanaḥ /
yakṣāśca rākṣasāścaiva piśācāśca viśāmpate //

ete cānye ca bahavo yogasiddhāḥ sahasraśaḥ /
tasmiṃstīrthe sarasvatyāḥ śive puṇye parantapa //

tatra hatvā purā viṣṇurasurau madhukaiṭabhau /
āplutya bharataśreṣṭha tīrthapravara uttame //

dvaipāyanaśca dharmātmā tatraivāplutya bhārata /
samprāptaḥ paramaṃ yogaṃ siddhiṃ ca paramāṃ gataḥ //

asito devalaścaiva tasminneva mahātapāḥ /
paramaṃ yogamāsthāya ṛṣiryogamavāptavān //