Mahabharata · Chapter 8.14
sahadevaṃ tathā kruddhaṃ nighnantaṃ tava vāhinīm /
duḥśāsano mahārāja bhrātā bhrātaramabhyayāt //
tau sametau mahārāja dṛṣṭvā tatra mahārathāḥ /
siṃhanādaravāṃścakrurvāsāṃsyādudhuvuśca ha //
tato bhārata ruṣṭena tava putreṇa dhanvinā /
pāṇḍuputrastribhirbāṇairvakṣasyabhihato balī //
sahadevastato rājannārācena tavātmajam /
vidvvā vivyādha saptatyā sārathiṃ ca tribhiḥ śaraiḥ //
duḥśāsanastataścāpaṃ chittvā rājanmahāhave /
sahadevaṃ trisaptatyā bāhorurasi cārpayat //
sahadevastu saṅkruddhaḥ khaṅgaṃ gṛhya mahāhave /
āvidhya prāsṛjattūrṇaṃ tava putrathaṃ prati //
samārgaṇaguṇaṃ cāpaṃ chittvā tasya mahānasiḥ /
nipapāta tato bhūmau cyutaḥ sarpa ivāmbarāt //
athānyaddhanurādāya sahadevaḥ pratāpavān /
duḥśāsanāya cikṣepa bāṇamantakaraṃ tataḥ //
tamāpatantaṃ viśikhaṃ yamadaṇḍopamatviṣam /
khaṅgena śitadhāreṇa dvidhā ciccheda kauravaḥ //
tatastaṃ niśitaṃ khaṅgamāvidhya yudhi satvaraḥ /
dhanuścānyatsamādāya śaraṃ jagrāha vīryavān //
tamāpatantaṃ sahasā nistriṃśaṃ niśitaiḥ śaraiḥ /
pātayāmāsa samare sahadevo hasanniva //
tato bāṇāṃścatuḥ ṣaṣṭiṃ tava putro mahāraṇe /
sahadevarathaṃ tūrṇaṃ preṣayāmāsa bhārata //
tāccharānsamare rājanvegenāpapato bahūn /
ekaikaṃ pañcabhirbāṇaiḥ sahadevo nyakṛtantata //
sannivārya mahābāṇānsahadevaḥ pratāpavān /
athāsmai subahūnbāṇānpreṣayāmāsa saṃyuge //
tānvāṇāṃstava putro'pi chittvaikaikaṃ tribhiḥ śaraiḥ /
nanāda sumahānādaṃ nādayāno vasundharām //
tato duḥśāsano rājandvābhyāṃ pāṇḍusutaṃ raṇe /
sārathiṃ navabhirbāṇairmādroyasya samācinot //
tataḥ kruddho mahārāja sadahevaḥ pratāpavān /
samādhatta śaraṃ ghoraṃ mṛtyukālāntakopamam //
vikṛṣya balavaccāpaṃ tava putrāya so'sṛjat /
sa taṃ nirbhidya vegena bhittvā ca kavacaṃ mahat //
prāviśadvaraṇīṃ rājanvalmīkamiva pannagaḥ /
tataḥ sammumuhe rājaṃstava putro mahārathaḥ //
mūḍhaṃ cainaṃ samālokya sārathistvarito ratham /
apovāha bhṛśaṃ trasto vadhyamānaṃ śitaiḥ śaraiḥ //
parājitya raṇe taṃ tu kauravyaṃ pāṇḍunandanaḥ /
duryodhanabalaṃ dṛṣṭvā pramamātha samantataḥ //
pipīlikapuṭaṃ rājanyathā mṛdgannaro ruṣā /
tathā sā kauravī senā mṛditā tena bhārata //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0