Mahabharata · Chapter 8.100

śarasaṅkṛttavarmāṇaṃ rudhirokṣitavakṣasam /
gatāsumapi rādheyaṃ naiva lakṣmīrvimuñcati //

taptajāmbūnadanibhaṃ bālārkasadṛśadyutim /
jīvantamiva taṃ śūraṃ sarvabhūtāni menire //

hatasyāpi mahārāja sūtaputrasya saṃyuge /
vitresuḥ sarvato yodhāḥ siṃhasyevetare mṛgāḥ //

hato'pi puruṣavyāghro vyāharanniva lakṣyate /
nābhavadvikṛtiḥ kācinmṛtasyāpi mahātmanaḥ //

cāruveṣadharaṃ rājaṃścārumauliśirodharam /
tanmukhaṃ sūtaputrasya pūrṇacandrasamadyuti //

kanakottamasahkāśo jvalanniva vibhāvasuḥ /
sa śāntaḥ puruṣavyāghraḥ pārthasāyakavāriṇā //

yathā'gnirjvalano dīpto jalamāsādya śāmyati /
karṇāgniḥ samare tadvatpārthameghena śāmitaḥ //

āhṛtya sa yaśo dīptaṃ suyuddhenātmano bhuvi /
saputraḥ samare karṇaḥ praśāntaḥ pārthatejasā //

pratāpya pāṇḍavānsarvānpāñcālānastratejasā /
nānābharaṇavānrajaṃstaptajāmbūnadaprabhaḥ //

varṣitvā śaravarṣāṇi pratāpya ripuvāhinīm / śrīmāniva sahasrāṃśurjvalansarvānpratāpya ca /
hato vaikartanaḥ karṇaḥ pādapo'ṅkuravāniva //

dadānītyeva yaḥ prādānna nāstītyarthito'vadat /
saddhyaḥ sadā satpuruṣaḥ sa hato dvairathe vṛṣā //

yasya brāhmaṇasātsarvaṃ vittamāsīnmahātmanaḥ /
nādeyaṃ brāhmaṇeṣvāsīdyasya svamapi jīvitam //

sa dātṝṇāṃ priyo rājandātā caiva manorathān /
sa pārthāstravinirdagdho gataḥ paramikāṃ gatim //

yamāśrityākarodvairaṃ sutaste sa gato divam /
ādāya tava putrāṇāṃ jayāśāṃ sarma varma ca //

hate ca karṇe sarito na sasru-- rjagāma cāstaṃ kaluṣo divākaraḥ /
śveto grahaśca jvalitārkavarṇo yamasya putro'bhyuditaḥ sa tiryak //

nabhaścacālātha nanāda corvī vavuśca vātāḥ paruṣāśca ghorāḥ /
diśo babhūvurjvalitāḥ sadhūmā mahārṇavāḥ sasvanuścukṣubhuśca //

sakānanāścādrivarāścakampire pravivyathurbhūtagaṇāśca māriṣa /
bṛhaspatiḥ samparivārya rohiṇīṃ babhūva candrārkasamo viśāmpate //

hate karṇe na diśo vipracārāḥ sacandrārkā dyaurvicacāla bhūmiḥ /
papāta colkā jvalanaprabhā ca niśācarā hṛṣṭatarā babhūvuḥ //

śaśiprakāśānanamarjuno yadā jahāra karṇasya śiraḥ śareṇa /
tato'ntarikṣe sahasaiva śabdo babhūva hāheti surairvimuktaḥ //

sadevagandharvamanuṣyapūjitaṃ nihatya karṇaṃ ripumāhave'rjunaḥ /
rarāja rājanparameṇa tejasā yathā purā vṛtravadhe śatakratuḥ //

patākinā bhīmaninādaketunā rathena śaṅkhasphaṭikāvabhāsinā /
mahendravāhapratimena tāvubhau mahendravīryapratimānapauruṣau //

suvarṇamuktāmaṇivajravidrumai-- ralaṅkṛtenāpratimena raṃhasā /
narottamau yādavapāṇḍunandanau divākarau dīptahutāśanāviva / raṇājire vītabhayau virejatuḥ samānayogāviva viṣṇuvāsavaiḥ //

tato dhanurjyātalaneminisvanaiḥ prasahya kṛtvā ca ripūngataprabhān /
sa sādhayitvā ca ripūñśaraughaiḥ kapidhvajaḥ pakṣivaradhvajaśca / pradadhmatuḥ śaṅkhavarau sughoṣau manāṃsyarīṇāmupatāpayantau //

suvarṇajālāvatatau mahāsvanau himāvadātau parigṛhya pāṇimiḥ /
cucumbatuḥ śaṅkhavarau nṛṇāṃ varau vighoṣayantau vijayaṃ jagattraye //

pāñcajanyasya nirghoṣo devadattasya cobhayoḥ /
pṛthivīmantarikṣaṃ ca diśaśca samapūrayat //

vitrastāścābhavansarve kuravo rājasattama /
śūrayoḥ śaṅkhaśabdena mādhavasyārjunasya ca //

tau śaṅkhaśabdena ninādayantau vanāni śailānsarito guhāśca /
vitrāsayantau tava putrasenāṃ yudhiṣṭhiraṃ nandayituṃ prayātau //

tataḥ prajagmuḥ kuravo javena śrutvaiva śaṅkhasvanamīryamāṇam /
vihāya madrādhipatiṃ patiṃ ca duryodhanaṃ bhārata bhāratānām //

tato rathenāmbudabṛndanādinā śaradvaharmadhyadivākaratviṣā /
dhanañjayasyādhiratheśca vismitāḥ praśaṃsamānāḥ prayayustadā'rjunam //

mahāhave taṃ bahuśobhamānaṃ dhanañjayaṃ yodhagaṇaiḥ sametāḥ /
tāvanvamodaṃśca janāḥ prakāmaṃ prabhākarāvabhyuditau yathaiva //