Mahabharata · Chapter 7.68

dauṣyanti bharataṃ cāpi mṛtaṃ sṛñjaya śuśruma /
karmāṇyasukarāṇyanyaiḥ kṛtavānyaḥ śiśurvane //

himāvadātānyaḥ siṃhānnakhadaṃṣṭrāyudhānbalī /
nirvīryāṃstarasā kṛtvā vicakarṣa babandha ca //

krūrāṃścogratarānvyāghrāndamitvā cākarodvaśe /
manaḥśilā iva śilāḥ saṃyuktā jaturāśibhiḥ //

trāyalādīṃścātibalavānsupratīkāngajānapi /
daṃṣṭrāsu gṛhya vimukhāñśuṣkāsyānakarodvaśe //

mahiṣānapyatibalo balino vicakarṣa ha /
siṃhānāṃ ca sudṛptānāṃ śatānyākarṣayadbalāt //

balinaḥ sṛmarānkhaṅgānnānāsattvāni cāpyuta /
kṛcchraprāṇānvane baddhvā damayitvāpyavāsṛjat //

taṃ sarvadamanetyāhurdvijāstenāsya karmaṇā /
taṃ pratyaṣedhajjananī mā satvāni vyanīnaśaḥ //

so'śvamedhaśateneje yamunāmanu vīryavān /
triśataiśca sarasvatyāṃ gaṅgāmanu catuḥśataiḥ //

sau'śvamedhasahasreṇa rājasūyaśatena ca /
punarīje mahāyajñaiḥ samāptavaradakṣiṇaiḥ //

agniṣṭomātirātrāṇāmukthyaviśvajitāṃ ca saḥ /
vājapeyasahasrāmāṃ sahasraiśca susaṃvṛtaiḥ //

iṣṭvā śākuntalo rājā tarpayitvā dvijāndhanaiḥ / sahasraṃ yatra padmānāṃ kaṇvāya bharato dadau /
jāmbūnadasya śuddhasya kanakasya mahāyaśāḥ //

yasya yūpāḥ satavyāmāḥ pariṇāhena kāñcanāḥ /
samāgamya dvijaiḥ sārdhe sendrairdevaiḥ samucchritāḥ //

alaṅkṛtānrājamānānsarvaratnairmanoharaiḥ /
hairaṇyāndviradānaśvānrathānuṣṭrānajāvikān //

dāsī dāsaṃ dhanaṃ dhānyaṃ gāḥ savatsāḥ payasvinīḥ /
grāmāngṛhāṃśca kṣetrāṇi vividhāṃśca paricchadān //

koṭīśatāyutāṃścaiva brāhmaṇebhyo hyamanyata /
cakravartī hyadīnātmā jitārirhyajitaḥ paraiḥ //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //