Mahabharata · Chapter 7.64

nābhāgamambarīṣaṃ ca mṛtaṃ sṛñjaya śuśruma /
yaḥ sahasraṃ sahasrāṇāṃ rājñāṃ caikastvayodhayat //

jigīṣamāṇāḥ saṅgrāme samantādvairiṇo'bhyayuḥ /
astrayuddhavido ghorāḥ sṛjantaścāśivā giraḥ //

balalāghavaśikṣābhisteṣāṃ so'strabalena ca /
chatrāyudhadhvajarathāṃśchittvā prāsāngatavyathaḥ //

ta enaṃ muktasannāhāḥ prārthayañjīvitaiṣiṇaḥ /
śaraṇyamīyuḥ śaraṇaṃ tava sma iti vādinaḥ //

sa tu tānvaśagānkṛtvā jitvā cemāṃ vasundharām /
īje yajñaśatairiṣṭairyathā śakrastathā'naghaḥ //

bubhujuḥ sarvasampannamannamanye janāḥ sadā /
tasminyajñe tu viprendrāḥ santṛptāḥ paramārcitāḥ //

modakānpūrikāpūpānsvādupūrṇāśca śaṣkulīḥ /
karambhānpṛthumṛdvīkā annāni sukṛtāni ca //

sūpānmaireyakāpūpānrāgaṣāḍavapānakān /
mṛṣṭānnāni suyuktāni mṛdūni surabhīṇi ca //

ghṛtaṃ madhu payastoyaṃ dadhīni rasavanti ca /
phalaṃ mūlaṃ susvādu dvijāstatropabhuñjate //

madanīyāni pāpāni viditvā cātmanaḥ sukham /
apibanta yathākāmaṃ pānapā gītavāditaiḥ //

tatra sma gāthā gāyanti kṣībā hṛṣṭāḥ paṭhanti ca /
nābhāgastutisaṃyuktā nanṛtuśca sahasraśaḥ //

teṣu yajñeṣvambarīṣo dakṣiṇāmatyakālayat /
rājñāṃ śatasahasrāṇi daśaprayutayājinām //

hiraṇyakavacānsarvāñśvetacchatraprakīrṇakān /
hiraṇyasyandanārūḍhānsānuyātraparicchādān //

ījāno vitate yajñe dakṣiṇāmatyakālayat /
mūrdhābhiṣiktāṃśca nṛpānrājaputraśatāni ca //

sa daṇḍakośanicayānbrāhmaṇebhyo hyamanyata /
naivaṃ pūrve janāścakrurna kariṣyanti cāpare //

yadambarīṣo nṛpatiḥ karotyamitadakṣiṇaḥ /
ityevamanumodante prītā yasya maharṣayaḥ //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //