Mahabharata · Chapter 7.63
yayātiṃ nāhuṣaṃ caiva mṛtaṃ sṛñjaya śuśruma /
ya imāṃ pṛthivīṃ jitvā sasamudrāṃ saparvatām //
śamyāprāsena nirmāya vedīḥ sannatadakṣiṇāḥ /
ījānaḥ kratubhiḥ puṇyaiḥ paryagacchatpradakṣiṇam //
rājasūyaśatairiṣṭvā so'śvamedhaśatena ca /
puṇḍarīkasahasreṇa vājapeyaśataistathā //
atirātrasahasreṇa cāturmāsyaiśca kāmataḥ /
agniṣṭomaiśca vividhaiḥ satraiśca prājyadakṣiṇaiḥ //
abrāhmaṇānāṃ yadvittaṃ pṛthivyāmasti kiñcana /
tatsarvaṃ parisaṅkhyāya tato brāhmaṇasātkarot //
sarasvatī puṇyatamā nadīnāṃ tathā samudrāḥ saritaḥ sādrayaśca /
ījānāya puṇyatamāya rājñe ghṛtaṃ payo duduhurnāhuṣāya //
vyūḍhe devāsure yuddhe kṛtvā devasahāyatām /
caturdhā vyabhajatsarvāṃ caturbhyaḥ pṛthivīmimām //
yajñairnānāvidhairiṣṭvā prajāmutpādya cottamām /
devayānyāṃ cauśanasyāṃ śarmiṣṭhāyāṃ ca dharmataḥ //
devāraṇyeṣu sarveṣu vijahārāmaropamaḥ /
ātmanaḥ kāmacāreṇa dvitīya iva vārāvaḥ //
yadā nābhyagamacchāntiṃ kāmānāṃ sarvavedavit /
tato gāthāmimāṃ gītvā sadāraḥ prāviśadvanam //
yatpṛthivyāṃ vrīhiyavaṃ hiraṇyaṃ paśavaḥ striyaḥ /
nālamekasya tatsarvamiti matvā śamaṃ vrajet //
evaṃ kāmānparityajya yayātirdhṛtimetya ca /
pūruṃ rājye pratiṣṭhāpya prayāto vanamīśvaraḥ //
sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0