Mahabharata · Chapter 7.62

māndhatāraṃ yauvanāśvaṃ mṛtaṃ sṛñjaya śuśruma /
yaṃ devāvaśvinau garbhe pituḥ pārśve cakarṣatuḥ //

mṛgayāṃ vicaranrājā tṛṣitaḥ klāntavāhanaḥ /
dhūmaṃ dṛṣṭvā'gamatsatraṃ pṛṣadājyamavāpa saḥ //

taṃ dṛṣṭvā yuvanāśvasya jaṭhare ravisannibham /
garbhaṃ nirūhaturdevāvaśvinau bhiṣajāṃ varau //

taṃ dṛṣṭvā piturutsaṅge śayānaṃ devavarcasam /
anyonyamabruvandevāḥ kamayaṃ dhāsyatīti vai //

māmevāyaṃ dhayatvaṅga iti ha smāha vāsavaḥ /
tatoṅgulibhyo hīndrasya prādurāsītpayo'mṛtam //

māṃ dhāsyatīti kāraṇyādyadindro hyanvakampayat /
tasmāttu māndhātetyevaṃ nāma tasyādbhutaṃ kṛtam //

tatastu dhārāṃ payaso ghṛtasya ca mahātmanaḥ /
tasyāsye yauvanāśvasya pāṇirindrasya cāsravat //

apibatpāṇimindrasya sa cāpyahgā'bhyavardhata /
so'bhavaddvādaśasamo dvādaśāhena vīryavān //

imāṃ ca pṛthivīṃ kṛtsnāmekāhnā sa vyajījayat /
dharmātmā dhṛtimānvīraḥ satyasandho jitendriyaḥ //

janamejayaṃ sudhanvānaṃ gayaṃ pūruṃ bṛhadratham /
asitaṃ ca nṛgaṃ caiva māndhātā mānavo'jayat //

udeti ca yataḥ sūryo yatra ca pratitiṣṭhati /
tatsarvaṃ yauvanāśvasya māndhātuḥ kṣetramucyate //

so'śvamedhaśatairiṣṭvā rājasūyaśatena ca /
adadadrohitānmatsyānbrāhmaṇebhyo viśāmpate //

hairaṇyānyojanotsedhānāyatāñśatayojanam /
bahuprakārānsusvādūnbhakṣyabhojyānnaparvatān //

atiriktaṃ brāhmaṇebhyo bhuñjāno hīyate janaḥ //

bhakṣyānnapānanicayāḥ śuśubhustvannaparvatāḥ /
ghṛtahadāḥ sūpapaṅkā dadhiphenāṃ guḍodakāḥ //

rurudhuḥ parvatānnadyo madhukṣīravahāḥ śubhāḥ /
devāsurā narā yakṣā gandharvoragapakṣiṇaḥ //

viprāstatrāgatāścāsanvedavedāṅgapāragāḥ /
brāhmaṇā ṛṣayaścāpi nāsaṃstatrāvipaścitaḥ //

samudrāntāṃ vasumatīṃ vasupūrṇāṃ tu sarvataḥ /
sa tāṃ brāhmaṇasātkṛtvā jagāma svāngṛhānprati //

rājā'pi vividhairiṣṭvā yajñairvividhadakṣiṇaiḥ /
gataḥ puṇyakṛtāṃ lokānvyāpya svayaśasā diśaḥ //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //