મહાભારત · અધ્યાય 7.35

તદનીકમનાધૃષ્ટં ભારદ્વાજેન રક્ષિતમ્ ।
પાર્થાઃ સમભ્યવર્તન્ત ભીમસેનપુરોગમાઃ ॥

સાત્યકિશ્ચેકિતાનશ્ચ ધૃષ્ટદ્યુમ્નશ્ચ પાર્ષતઃ ।
કુન્તિભોજશ્ચ વિક્રાન્તો દ્રુપદશ્ચ મહારથઃ ॥

આર્જુનિઃ ક્ષત્રધર્મા ચ બૃહત્ક્ષત્રશ્ચ વીર્યવાન્ ।
ચેદિપો ધૃષ્ટકેતુશ્ચ માદ્રીપુત્રૌ ઘટોત્કચઃ ॥

યુધામન્યુશ્ચ વિક્રાન્તઃ શિખણ્ડી ચાપરાજિતઃ ।
ઉતક્તમૌજાશ્ચ દુર્ધર્ષો વિરાટશ્ચ મહારથઃ ॥

દ્રૌપદેયાશ્ચ સંરબ્ધાઃ શૈશુપાલિશ્ચ વીર્યવાન્ ।
કેકયાશ્ચ મહાવીર્યાઃ સૃઞ્જયાશ્ચ સહસ્રશઃ ॥

એતે ચાન્યે ચ સગણાઃ કૃતાસ્ત્રા યુદ્ધદુર્મદાઃ ।
સમભ્યધાવન્સહસા ભારદ્વાજં યુયુત્સવઃ ॥

સમીપે વર્તમાનાંસ્તાન્ભારદ્વાજોઽતિવીર્યવાન્ ।
અસમ્ભ્રાન્તઃ શરૌઘેણ મહતા સમવારયત્ ॥

મહૌઘઃ સલિલસ્યેવ ગિરિમાસાદ્ય દુર્ભિદમ્ ।
દ્રોણં તે નાભ્યવર્તન્ત વેલામિવ જલાશયાઃ ॥

પીડ્યમાનાઃ શરૈ રાજન્દ્રોણચાપવિનિઃસૃતૈઃ ।
ન શેકુઃ પ્રમુખે સ્થાતું ભારદ્વાજસ્ય પાણ્ડવાઃ ॥

તદદ્ભુતમપશ્યામ દ્રોણસ્ય ભુજયોર્બલમ્ ।
યદેનં નાભ્યવર્તન્ત પાઞ્ચાલાઃ સૃઞ્જયૈઃ સહ ॥

તમાયાન્તમભિક્રુદ્ધં દ્રોણં દૃષ્ટ્વા યુધિષ્ઠિરઃ ।
બહુધા ચિન્તયામાસ દ્રોણસ્ય પ્રતિવારણમ્ ॥

અશક્યં તુ તમન્યેન દ્રોણં મત્ત્વા યુધિષ્ઠિરઃ ।
અવિષહ્યં ગુર ભારં સૌભદ્રે સમવાસૃજત્ ॥

વાસુદેવાદનવરં ફલ્ગુનાચ્ચામિતૌજસમ્ ।
અબ્રવીત્પરવીરઘ્નમભિમન્યુમિદં વચઃ ॥
યુધિષ્ઠિર ઉવાચ ।

એત્ય નો નાર્જુનો ગર્હેદ્યથા તાત તથા કુરુ ।
દ્રોણાનીકસ્ય ન વયં વિદ્મો ભેદં કથઞ્ચન ॥

ત્વં વાઽર્જુનો વા કૃષ્ણો વા ભિન્દ્યાત્પ્રદ્યુમ્ન એવ વા ।
દ્રોણાનીકં મહાબાહો પઞ્ચમો નોપપદ્યતે ॥

અભિમન્યો વરં તાત યાચે ત્વાં દાતુમર્હસિ ।
પિતૄણાં માતુલાનાં ચ સૈન્યાનાં ચૈવ સર્વશઃ ॥

ધનઞ્જયો હિ નસ્તાત ગર્હયેદેત્ય સંયુગાત્ ।
ક્ષિપ્રમસ્ત્રં સમાદાય દ્રોણાનીકં વિશાતય ॥
અભિમન્યુરુવાચ ।

દ્રોણસ્ય દૃઢમત્યુગ્રમનીકપ્રવરં યુધિ ।
પિતૄણાં જયમાકાઙ્ક્ષન્નવગાહેઽવિલમ્બિતમ્ ॥

ઉપદિષ્ટો હિ મે પિત્રા યોગોઽનીકવિશાતને ।
નોત્સહે હિ વિનિર્ગન્તુમહં કસ્યાઞ્ચિદાપદિ ॥
યુધિષ્ઠિર ઉવાચ ।

ભિન્ધ્યનીકં યુધાંશ્ચેષ્ઠ દ્વારં સઞ્જનયસ્વ નઃ ।
વયં ત્વાઽનુગમિષ્યામો યેન ત્વં તાત યાસ્યસિ ॥

ધનઞ્જયસમં યુદ્ધે ત્વાં વયં તાત સંયુતે ।
પ્રણિધાયાનુયાસ્યામો રક્ષન્તઃ સર્વતોમુખાઃ ॥
ભીમ ઉવાચ ।

અહં ત્વાઽનુગમિષ્યામિ ધૃષ્ટદ્યુમ્નોઽથ સાત્યકિઃ ।
પાઞ્ચલાઃ કેકયા માત્સ્યાસ્તથા સર્વે પ્રભદ્રકાઃ ॥

સકૃદ્ભિન્નં ત્વયા વ્યૂહં તત્ર તત્ર પુનઃ પુનઃ ।
વયં પ્રધ્વંસયિષ્યામો નિઘ્નામાના વરાન્વરાન્ ॥
અભિમન્યુરુવાચ ।

અહમેતત્પ્રવેક્ષ્યામિ દ્રોણાનીકં દુરાસદમ્ ।
પતઙ્ગ ઇવ સઙ્ક્રુદ્ધો જ્વલિતં જાતવેદસમ્ ॥

તત્કર્માદ્ય કરિષ્યામિ હિતં યદ્વંશયોર્દ્વયોઃ ।
માતુલસ્ય ચ યત્પ્રીતિં કરિષ્યતિ પિતુશ્ચ મે ॥

શિશુનૈકેન સઙ્ગ્રમે કાલ્યમાનાનિ સઙ્ઘશઃ ।
દ્રક્ષ્યન્તિ સર્વભૂતાનિ દ્વિષત્સૈન્યાનિ વૈ મયા ॥

નાહં પાર્થેન જાતઃ સ્યાં ન ચ જાતઃ સુભદ્રયા ।
યદિ મે સંયુગે કશ્ચિજ્જીવિતો નાદ્ય મુચ્યતે ॥

યદિ ચૈકરથેનાહં સમગ્રં ક્ષત્રમણ્ડલમ્ ।
ન કરોમ્યષ્ટધા યુદ્ધે ન ભવામ્યર્જુનાત્મજઃ ॥
યુધિષ્ઠિર ઉવાચ ।

એવં તે ભાષમાણસ્ય બલં સૌભદ્ર વર્ધતામ્ ।
યત્સમુત્સહસે ભેત્તું દ્રોણાનીકં દુરાસદમ્ ॥

રક્ષિતં પુરુષવ્યાઘ્રૈર્મહેષ્વાસૈર્મહાબલૈ ।
સાધ્યરુદ્રમરુત્તુલ્યૈર્વસ્વગ્ન્યાદિત્યવિક્રમૈઃ ॥
સઞ્જય ઉવાચ ।

તસ્ય તદ્વચનં શ્રુત્વા સ યન્તારમચોદયત્ ॥

સુમિત્રાશ્વાન્રણે ક્ષિપ્રં દ્રોણાનીકાય ચોદય ॥