Mahabharata · Chapter 7.117

kālyamāneṣu sainyeṣu śaineyena tatastataḥ /
bhāradvājaḥ śaravrātairmarmabhidbhiravākirat //

sa samprahārastumulo droṇasātvatayorabhūt /
paśyatāṃ sarvasainyānāṃ balivāsavayoriva //

tato droṇaḥ śineḥ pautraṃ citraiḥ sarvāyasaiḥ śaraiḥ /
tribhirāśīvipākārairlalāṭe samavidhyata //

tairlalāṭārpitairbāṇairyuyudhānastvajihmagaiḥ /
vyarocata mahārāja triśṛṅga iva parvataḥ //

tato'sya bāṇānaparānindrāśanisamasvanān /
bhāradvājo'ntaraprekṣī preṣayāmāsa saṃyuge //

tāndroṇacāpanirmuktāndāśārhaḥ patataḥ śarān /
dvābhyāndvābhyāṃ supuṅkhābhyāṃ ciccheda paramāstravit //

tāmasya laghutāṃ droṇaḥ samavekṣya viśāmpate /
prahasya sahasā'vidhyattriṃśatāṃ śinipuṅgavam //

punaḥ pañcaśateṣūṇāṃ śitena ca samārpayat /
laghutāṃ yuyudhānasya lāghavena viśeṣayan //

samutpatanti valmīkādyathā kruddhā mahoragāḥ /
tathā droṇarathādrājannāpatanti tanucchidaḥ //

tathaiva yuyudhānena sṛṣṭāḥ satasahasraśaḥ /
avākirandroṇarathaṃ śarā rudhirabhojanāḥ //

lāghavāddijamukhyasya sātvatasya ca māriṣa /
viśeṣaṃ nādhyagacchāma samāvāstāṃ nararṣabhau //

sātyakistu tato droṇaṃ navabhirnataparvabhiḥ /
ājaghāna bhṛśaṃ kruddho dhvajaṃ ca niśitaiḥ śaraiḥ //

sārathiṃ ca śatenaiva bhāradvājasya paśyataḥ /
lāghavaṃ yuyudhānasya dṛṣṭvā droṇo mahārathaḥ //

saptatyā sārathiṃ vidvvā turaṅgāṃśca tribhistribhiḥ /
dhvajamekena ciccheda mādhavasya rathe sthitam //

athāpareṇa bhallena hemapuṅkhena patriṇā /
dhanuściccheda samare mādhavasya mahātmanaḥ //

sātyakistu tataḥ kruddho dhanustyaktvā mahārathaḥ /
gadāṃ jagrāha mahatīṃ bhāradvājāya cākṣipat //

tāmāpatantīṃ sahasā paṭṭabaddhāmayasmayīm /
nyavārayaccharairdroṇo bahubhirbahurūpibhiḥ //

athānyaddhanurādāya sātyakiḥ satyavikramaḥ /
vivyādha bahubhirvīraṃ bhāradvājaṃ śilāśitaiḥ //

sa vid्vā samare droṇaṃ siṃhanādamamuñcata /
taṃ vai na mṛmaṣe droṇaḥ siṃhanādaṃ mahātmanaḥ //

tataḥ śaktiṃ raṇe droṇo rukmadaṇḍāmayasmayīm /
tarasā preṣayāmāsa mādhavasya rathaṃ prati //

anāsādya tu śaineyaṃ sā śaktiḥ kālasannibhā /
bhittvā rathaṃ jagāmognā dharaṇīṃ dāruṇasvanā //

tato droṇaṃ śineḥ pautro rājanvivyādha patriṇā /
dakṣiṇaṃ bhujamāsādya pīḍayanbharatarṣabha //

droṇo'pi samare rājanmādhavasya mahaddhanuḥ /
ardhacandreṇa ciccheda rathaśaktyā ca sārathim //

mumoha sārathistasya rathaśaktyā samāhataḥ /
sa rathopasthamāsādya muhūrtaṃ sannyaṣīdata //

cakāra sātyakī rājaṃstatra karmātimānuṣam /
ayodhayacca yaddroṇaṃ raśmīñjagrāha ca svayam //

tataḥ śaraśatenaiva yuyudhāno mahārathaḥ /
avidhyadbrāhmaṇaṃ saṅkhye hṛṣṭarūpo viśāmpate //

tasya droṇaḥ śarānpañca preṣayāmāsa bhārata /
te ghorāḥ kavacaṃ bhittvā papuḥ śoṇitamāhave //

nirviddhastu śarairghorairakruddhyatsātyakirbhṛśam /
sāyakānvyasṛjaccāpi vīro rukmarathaṃ prati //

tato droṇasya yantāraṃ nipātyaikeṣuṇā bhuvi /
aśvānvyadrāvayadbāṇairhatasūtāṃstatastataḥ //

sa rathaḥ pradrutaḥ saṅkhye maṇḍalāni sahasraśaḥ /
cakāra rājato rājanbhrājamāna ivāṃśumān //

abhidravata gṛhṇīta hayāndroṇasya dhāvata /
iti sma cukruśuḥ sarve rājaputrāḥ sarājakāḥ //

te sātyakimapāsyāśu rājanyudhi mahārathāḥ /
yato droṇastataḥ sarve sahasā samupādravan //

tāndṛṣṭvā pradrutānsaṅkhye sātvatena śarārditān /
prabhagnaṃ punarevāsīttava sainyaṃ samākulam //

vyūhasyaiva punardvāraṃ gatvā droṇo vyavasthitaḥ /
vātāyamānaistairaśvairnīto vṛṣṇiśarārditaiḥ //

pāṇḍupāñcālasambhinnaṃ vyūhamālokya vīryavān /
śaineye nākarodyatnaṃ vyūhamevābhyarakṣata //

nivārya pāṇ़ḍupāñcālāndroṇāgniḥ pradahanniva /
tasthau krodhedhmasandīptaḥ kālasūrya ivodyataḥ //