Mahabharata · Chapter 7.115

śṛṇuṣvaikamanā rājanyanmāṃ tvaṃ paripṛcchasi /
drāvyamāṇe bale tasminhārdikyena mahātmanā //

lajjayāvanate cāpi parihṛṣṭe ca tāvake /
dvīpo ya āsītpāṇḍūnāmagādhe gādhamicchatām //

śrutvā sa ninadaṃ bhīmaṃ tāvakānāṃ mahāhave /
śaineyastvarito rājankṛtavarmāṇamabhyayāt //

uvāca sārathiṃ tatra krodhāmarṣasamanvitaḥ /
hārdikyābhimukhaṃ sūta kuru me rathamuttamam //

kurute kadanaṃ paśya pāṇḍusainye hyamarṣitaḥ /
enaṃ jitvā punaḥ sūta yāsyāmi vijayaṃ prati //

evamukte tu vacane sūtastasya mahāmate /
nimeṣāntaramātreṇa kṛtavarmāṇamabhyayāt //

kṛtavarmā tu hārdikyaḥ śaineyaṃ niśitaiḥ śaraiḥ /
avākiratsusankruddhastato'kruddhyatsa sātyakiḥ //

athāśu niśitaṃ bhalluṃ śaineyaḥ kṛtavarmaṇaḥ /
preṣayāmāsa samare śarāṃśca caturo'parān //

te tasya jaghnire vāhānbhallenāsyācchinaddhanuḥ /
pṛṣṭharakṣaṃ tathā sūtamavidhyanniśitaiḥ śaraiḥ //

tatastaṃ virathaṃ kṛtvā sātyakiḥ satyavikramaḥ /
senāmasyārdayāmāsa śaraiḥ sannataparvabhiḥ //

abhajyatātha pṛtanā śaineyaśarapīḍitā / palāyanakṛtotsāhā bhramantī tatratatra ha /
tataḥ prāyātsa tvaritaḥ sātyakiḥ satyavikramaḥ //

śṛṇu rājanyadakarottava sainyeṣu vīryavān /
atītya sa mahārāja droṇānīkamahārṇavam //

parājitya tu saṃhṛṣṭaḥ kṛtavarmāṇamāhave /
yantāramabravīcchūraḥ śanairyāhītyasambhramam //

dṛṣṭvā tu tava tatsainyaṃ rathāśvadvi pasaṅkulam /
padātijanasampūrṇamabravītsārathiṃ punaḥ //

yadetanmeghasaṅkāśaṃ droṇānīkasya savyataḥ /
sumahatkuñjarānīkaṃ yasya rukmaratho mukham //

ete hi bahavaḥ sūta durnivāryāśca saṃyuge /
duryodhanasamādiṣṭā madarthe tyaktajīvitāḥ //

rājaputrā maheṣvāsāḥ sarve vikrāntayodhinaḥ /
na cājitvā raṇe hyetāñśakyaḥ prāptuṃ jayadrathaḥ //

nāpi sūta mayā pārthaḥ śakyaḥ prāptuṃ kathañcana /
ete tiṣṭhanti sahitāḥ sarvavidyāsu niṣṭhitāḥ //

trigartānāṃ rathodārāḥ suvarṇavikṛtadhvajāḥ /
māmevābhimukhā vīrā yotsyamānā vyavasthitāḥ //

atra māṃ prāpaya kṣipramaśvāṃścodaya sārathe /
trigartaiḥ saha yotsyāmi bhāradvājasya paśyataḥ //
sañjaya uvāca /

tataḥ prāyācchanaiḥ sūtaḥ sātvatasya mate sthitaḥ /
rathenādityavarṇena bhāsvareṇa patākinā //

tamūhuḥ sārathervaśyā valgamānā hayottamāḥ /
vāyuvegasamāḥ saṅkhye kundendurajataprabhāḥ //

āpatantaṃ raṇe taṃ tu śaṅkhavarṇairhayottamaiḥ / parivavustataḥ śūrā gajānīkena sarvataḥ /
kiranto vividhāṃstīkṣṇānsāyakām̐llaghuvedhinaḥ //

sātvato'pi śitairbāṇairgajānīkamayodhayat /
parvatāniva varṣeṇa tapānte jalado mahān //

vajrāśanisamasparśairvadhyamānāḥ śarairgajāḥ /
prādravanraṇamutsṛjya śinivīrasamīritaiḥ //

śīrṇadantā virudhirā bhinnamastakapiṇḍikāḥ /
viśīrṇakarṇāsyakarā viniyantṛpatākinaḥ //

sambhinnavarmaghaṇṭāśca vinikṛttamahādhvajāḥ /
hatārohā diśo rājanbhejire bhraṣṭakambalāḥ //

ruvanto vividhānnādāñjaladopamaniḥsvanāḥ /
nāracairvatsadantaiśca bhallairañjalikaistathā //

kṣuraprairardhacandraiśca sātvatena vidāritāḥ / kṣaranto'sṛktathā mūtraṃ purīṣaṃ ca pradudruvuḥ /
babhrumuścaskhaluścānye peturmamlustathā'pare //

evaṃ tatkuñjarānīkaṃ yuyudhānena pīḍitam /
śarairagnyarkasaṅkāśaiḥ pradudrāva samantataḥ //

tasminhate gajānīke jalasandho mahābalaḥ /
yattaḥ samprāpayannāgaṃ rajatāśvarathaṃ prati //

rukmavarmadharaḥ śūrastapanīyāṅgadaḥ śuciḥ /
kuṇḍalī makuṭī khaṅgī raktacandanarūṣitaḥ //

śirasā dhārayandīptāṃ tapanīyamayīṃ srajam /
urasā dhārayanniṣkaṃ kaṇṭhasūtraṃ ca bhāsvaram //

cāpaṃ ca rukmavikṛtaṃ vidhunvangajamūrdhani /
aśobhata mahārāja savidyudiva toyadaḥ //

tamāpatantaṃ sahasā māgadhasya gajottamam /
sātyakirvārayāmāsa veleva makarālayam //

nāgaṃ nivāritaṃ dṛṣṭvā śaineyasya śarottamaiḥ /
akrudhyata raṇe rājañjalasandho mahābalaḥ //

tataḥ kruddho mahārāja mārgaṇairbhārasādhanaiḥ /
avidhyata śineḥ pautraṃ jalasandho mahorasi //

tato'pareṇa bhallena pītena niśitena ca /
asyato vṛṣṇivīrasya nicakarta śarāsanam //

sātyakiṃ chinnadhanvānāṃ prahasanniva bhārata /
avidhyanmāgadho vīraḥ pañcabhirniśitaiḥ śaraiḥ //

sa viddho bahubhirbāṇairjalasandhena vīryavān /
nākampata mahābāhustadadbhutamivābhavat //

acintayanvai sa śarānnātyarthaṃ sambhramādbalī /
dhanuranyatsamādāya tiṣṭhatiṣṭhetyuvāca ha //

etāvaduktvā śaineyo jalasandhaṃ mahorasi /
vivyādha ṣaṣṭyā subhṛśaṃ śarāṇāṃ prahasanniva //

kṣurapreṇa sutīkṣṇena muṣṭideśe mahaddhanuḥ /
jalasandhasya ciccheda vivyādha ca tribhiḥ śaraiḥ //

jalasandhastu tattyaktvā saśaraṃ vai śarāsanam /
tomaraṃ vyasṛjattūrṇaṃ sātyakiṃ prati māriṣa //

sa nirbhidya bhujaṃ savyaṃ mādhavasya mahāraṇe /
abhyagāddharaṇīṃ ghoraḥ śvasanniva mahoragaḥ //

nirbhinne tu bhuje savye sātyakiḥ satyavikramaḥ /
triṃśadbhirviśikhaistīkṣṇairjalasandhamatāḍayat //

pragṛhya tu tataḥ khaṅgaṃ jalasandho mahābalaḥ / ārṣabhaṃ carma ca mahacchatacandrakasaṅkulam /
āvidhya ca tataḥ khaṅgaṃ sātvatāyotsasarja ha //

śaineyasya dhanuśchittvā sa khaṅgo nyapatanmahīm /
alātacakravaccaiva vyarocata mahīṃ gataḥ //

athānyaddhanurādāya sarvakāyāvadāraṇam /
jalasandhamabhiprekṣya utsmayitvā ca mādhavaḥ //

śālaskandhapratīkāśamindrāśanisamasvanam /
viṣphārya vivyadhe kruddho jalasandhaṃ śareṇa ha //

tataḥ sābharaṇau bāhū kṣurābhyāṃ mādhavottamaḥ /
sāṅgadau jalasandhasya ciccheda prahasanniva //

tau bāhū parighaprakhyau petaturgajasattamāt /
vasundharādharāddhaṣṭau pañcaśīrṣāvivoragau //

tataḥ sudaṃṣṭraṃ suhanu cārukuṇḍalamaṇḍitam /
kṣureṇāsya tṛtīyena śiraściccheda sātyakiḥ //

tatpātitaśirobāhukabandhaṃ bhīmadarśanam /
dviradaṃ jalasandhasya rudhireṇābhyaṣiñcata //

jalasandhaṃ nihatyājau tvaramāṇastu sātvataḥ /
vimānaṃ pātayāmāsa gajaskandhādviśāmpate //

rudhireṇāvasiktāṅgau jalasandhasya kuñjaraḥ /
vilambamānamavahatsaṃśliṣṭaṃ paramāsanam //

śarārditaḥ sātvatena mardamānaḥ svavāhinīm /
ghoramārtasvaraṃ kṛtvā vidudrāva mahāgajaḥ //

hāhākāro mahānāsīttava sainyasya māriṣa /
jalasandhaṃ hataṃ dṛṣṭvā vṛṣṇīnāmṛpabheṇa tu //

vimukhāścābhyadhāvanta tava yodhāḥ samantataḥ /
palāyanakṛtotsāhā nirutsāhā dviṣañjaye //

etasminnantare rājandroṇaḥ śastrabhṛtāṃ varaḥ /
sannyasya bhāraṃ sumahatkṛtavarmaṇi bhārata //

abhyayājjavanairaśvairyuyudhānaṃ mahāratham /
sa hi pārthānraṇe yattāndadhāraiko mahābalaḥ //

tamudīrṇaṃ tathā dṛṣṭvā śaineyaṃ kurupuṅgavāḥ /
droṇenaiva saha kruddhā sātyakiṃ samupādravan //

tataḥ pravavṛte yuddhaṃ kurūṇāṃ sātvatasya ca /
droṇasya ca raṇe rājanghoraṃ devāsuropamam //