Mahabharata · Chapter 6.31

mayyāsaktamanāḥ pārtha yogaṃ yuñjanmadāśrayaḥ /
asaṃśayaṃ samagraṃ māṃ yathā jñāsyasi tacchṛṇu //

jñānaṃ te'haṃ savijñānamidaṃ vakṣyāmyaśeṣataḥ /
yajjñātvā neha bhūyo'nyajjñātavyamavaśiṣyate //

manuṣyāṇāṃ sahasreṣu kaścidyatati siddhaye /
yatatāmapi siddhānāṃ kaścinmāṃ vetti tattvataḥ //

bhūmirāpo'nalo vāyuḥ svaṃ mano buddhireva ca /
ahankāra itī yaṃ me bhinnā prakṛtiraṣṭadhā //

apareyamitastvanyāṃ prakṛtiṃ viddhi me parām /
jīvabhūtāṃ mahābāho yayedaṃ dhāryate jagat //

etadyonīni bhūtāni sarvāṇītyupadhāraya /
ahaṃ kṛtsnasya jagataḥ prabhavaḥ pralayastathā //

mattaḥ parataraṃ nānyatkiñcidasti dhanañjaya /
mayi sarvamidaṃ protaṃ sūtre maṇigaṇā iva //

raso'hamampsu kaunteya prabhā'smi śaśisūryayoḥ //
praṇavaḥ sarvavedeṣu śabdaḥ khe pauruṣaṃ nṛṣu //

puṇyo gandhaḥ pṛthivyāṃ ca tejaścāsmi vibhāvasau /
jīvanaṃ sarvabhūteṣu tapaścāsmi tapasviṣu //

bījaṃ māṃ sarvabhūtānāṃ viddhi pārtha sanātanam /
buddhirbuddhimatāmasmi tejastejasvināmaham //

balaṃ balavatāṃ cāhaṃ kāmarāgavivarjitam /
dharmāviruddho bhūteṣu kāmo'smi bharatarṣabha //

ye caiva sātvikā bhāvā rājasāstāmasāśca ye /
matta eveti tānviddhi na tvahaṃ teṣu te mayi //

tribhirguṇamayairbhāvairebhiḥ sarvamidaṃ jagat /
mohitaṃ nābhijānāti māmebhyaḥ paramavyayam //

daivī hyeṣā guṇamayī mama māyā duratyayā /
māmeva ye prapadyante māyāmetāṃ taranti te //

na māṃ tuṣkṛtino mūḍhāḥ prapadyante narādhamāḥ /
māyayā'pahṛtajñānā āsuraṃ bhāvamāśritāḥ //

cutrarvidhā bhajante māṃ janāḥ sukṛtino'rjuna /
ārto jijñāsurarthārthī jñānī ca bharatarṣabha //

teṣāṃ jñānī nityayukta ekabhaktirviśiṣyate /
priyo hi jñānino'tyarthamahaṃ sa ca mama priyaḥ //

udārāḥ sarva evaite jñānī tvātmaiva me matam /
āsthitaḥka sa hi yuktātmā māmevānuttamāṃ gatiṃ //

bahūnāṃ janmanāmante jñānavānmāṃ prapadyate /
vāsudevaḥ sarvamiti sa mahātmā sudurlabhaḥ //

kāmaistaistairhṛtajñānāḥ prapadyante'nyadevatāḥ /
taṃ taṃ niyamamāsthāya prakṛtyā niyatāḥ svayā //

yo yo yāṃ yāṃ tanuṃ bhaktaḥ śraddhayārcitumicchati /
tasya tasyācalāṃ śraddhāṃ tāmeva vidadhāmyaham //

sa tayā śraddhayā yuktastasyārādhanamīhate /
labhate ca tataḥ kāmānmayaiva vihitānhitān //

antavattu phalaṃ teṣāṃ tadbhavatyalpamedhasām /
devāndevayajo yānti madbhaktā yānti māmapi //

avyaktaṃ vyaktimāpannaṃ manyante māmabuddhayaḥ /
paraṃ bhāvamajānanto mamāvyayamanuttamam //

nāhaṃ prakāśaḥ sarvasya yogamāyāsamāvṛtaḥ /
mūḍho'yaṃ nābhijānāti loko māmajamavyayam //

vedāhaṃ samatītāni vartamānāni cārjuna /
bhaviṣyāṇi ca bhūtāni māṃ tu veda na kaścana //

icchādveṣasamutthena dvandvamohena bhārata /
sarvabhūtāni sammohaṃ sarge yānti parantapa //

yoṣāṃ tvantagataṃ pāpaṃ janānāṃ puṇyakarmaṇām /
te dvandvamohanirmukta bhajante māṃ dṛḍhavratāḥ //

jarāmaraṇamokṣāya māmāśritya yatanti ye /
te brahma tadviduḥ kṛtsnamadhyātmaṃ karma cākhilam //

sādhibhūtādhidaivaṃ māṃ sādhiyajñaṃ ca ye viduḥ /
prayāṇakāle'pi ca māṃ te viduryuktacetasaḥ //