Scripture Library

Mahabharata · Chapter 6.24

6.24.1

keṣāṃ prahṛṣṭāstatrāgre yodhā yudhyanti sañjaya /
udagramanasaḥ ke vā ke vā dīnā vicetasaḥ //

6.24.2

ke pūrvaṃ prāharaṃstatra yuddhe hṛdayakampane /
māmakāḥ pāṇḍaveyā vā tanmamācakṣva sañjaya //

6.24.3

kasya senāsamudaye gandho mālyasamudbhavaḥ /
vāyuḥ pradakṣiṇaścaiva yodhānāmabhigarjatām //
sañjaya uvāca /

6.24.4

ubhayoḥ senayostatra yodhā jahṛṣire tadā /
srajaḥ samāḥ sugandhānāmubhayatra samudbhavaḥ //

6.24.5

saṃhatānāmanīkānāṃ vyūḍhānāṃ bharatarṣabha /
saṃsargātsamudīrṇānāṃ vimardaḥ sumahānabhūt //

6.24.6

vāditraśabdastumulaḥ śaṅkhabherīvimiśritaḥ /
śūrāṇāṃ raṇaśūrāṇāṃ garjatāmitaretaram //

6.24.7

ubhayoḥ senayo rājanmahānvyatikaro'bhavat / anyonyaṃ vīkṣamāṇānāṃ yodhānāṃ bharatarṣabha /
kuñjarāṇāṃ ca nadatāṃ sainyānāṃ ca prahṛṣyatām //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0