Mahabharata · Chapter 5.86

upaplāvyādiha kṣattarupāyāto janārdanaḥ /
vṛkasthale nivasati sa ca prātarihaiṣyati //

āhukānāmadhipatiḥ purogaḥ sarvasātvatām /
mahāmanā mahāvīryo mahāsatvo janārdanaḥ //

sphītasya vṛṣṇirāṣṭrasya bhartā goptā ca mādhavaḥ /
trayāṇāmapi lokānāṃ bhagavānprapitāmahaḥ //

vṛṣṇyandhakāḥ sumanaso yasya prajñāmupāsate /
ādityā vasavo rudrā yathā buddhiṃ bṛhaspateḥ //

tasmai pūjāṃ prayokṣyāmi dāśārhāya mahātmane /
pratyakṣaṃ tava dharmajña tāṃ me kathayataḥ śruṇu //

ekavarṇaiḥ suklṛptāṅgairbāhlijātairhayottamaiḥ /
caturyaktānrathāṃstasmai raukmāndāsyāmi ṣoḍaśa //

nityaprabhinnānmātaṅgānīṣādantānprahāriṇaḥ /
aṣṭānucaramekaikamaṣṭau dāsyāmi kaurava //

dāsīnāmaprajātānāṃ śubhānāṃ rukmavarcasām /
śatamasmai pradāsyāmi dāsānāmapi tāvatām //

āvikaṃ ca sukhasparśaṃ pārvatīyairupāhṛtam /
tadapyasmai pradāsyāmi sahastrāṇi dāśāṣṭa ca //

ajinānāṃ sahasrāṇi cīnadeśodbhavāni ca /
tānyapyasmai pradāsyāmi yāvadarhati keśavaḥ //

divā rātrau ca bhātyeṣa sutejā vimalo maṇiḥ /
tamapyasmai pradāsyāmi tamarhati hi keśavaḥ //

ekenābhipatatyahnā yojanāni caturdaśa /
yānamaśvatarīyuktaṃ dāsye tasmai tadapyaham //

yāvanti vāhanānyasya yāvantaḥ puruṣāśca te /
tatoṣṭaguṇamapyasmai bhojyaṃ dāsyāmyahaṃ sadā //

mama putrāśca pautraśca sarve duryodhanādṛte /
pratyudyāsyanti dāśārhaṃ rathairmṛṣṭaiḥ svalaṅkṛtāḥ //

svalaṅkṛtāśca kalyāṇyaḥ pādaireva sahasraśaḥ /
vāramukhyā mahābhāgaṃ pratyudyāsyanti keśavam //

nagarādapi yāḥ kāścidgamiṣyanti janārdanam /
draṣṭuṃ kanyāśca kalyāṇyastāśca yāsyantyanāvṛtāḥ //

sastrīpuruṣabālaṃ ca nagaraṃ madhusūdanam /
udīkṣatāṃ mahātmānaṃ bhānumantamiva prajāḥ //

mahādhvajapatākāśca kriyantāṃ sarvato diśaḥ /
jalāvasikto virajāḥ panthāstasyeti cānvaśāt //

duḥśāsanasya ca gṛhaṃ duryodhanagṛhādvaram /
tadadya kriyatāṃ kṣipraṃ susammṛṣṭamalaṅkṛtam //

etaddhi rucirākāraiḥ prāsādairupaśobhitam /
śivaṃ ca ramaṇīyaṃ ca sarvartu sumahādhanam //

sarvamasmingṛhe ratnaṃ mama duryodhanasya ca /
yadyadarhati vārṣṇeyastattaddeyamasaṃśayam //