Mahabharata · Chapter 5.76

bhāvaṃ jijñāsamāno'haṃ praṇayādidamabravam /
na cākṣepānna pāṇḍityānna krodhānna vivakṣayā //

vedāhaṃ tava māhātmyasuta te veda yadbalam /
uta te veda karmāṇi na tvāṃ paribhavāmyaham //

yathā cātmani kalyāṇaṃ sambhāvayasi pāṇḍava /
sahasraguṇamapyetattvayi sambhāvayāmyaham //

yādṛśe ca kule janma sarvarājābhipūjite /
bandhubhiśca suhṛdbhiśca bhīma tvamasi tādṛśaḥ //

jijñāsanto hi dharmasya sandigdhasya vṛkodara /
paryāyaṃ nādhyavasyanti devamānuṣayorjanāḥ //

sa eva heturbhūtvā hi puruṣasyārthasiddhiṣu /
vināśe'pi sa evāsya sandigdhaṃ karma pauruṣam //

anyathā paridṛṣṭāni kavibhirdovadarśibhiḥ /
anyathā parivartante vegā iva nabhasvataḥ //

sumantritaṃ sunītaṃ ca nyāyataścopapāditam /
kṛtaṃ mānuṣyakaṃ karma dainenāpi viruddhyate //

daivamapyakṛtaṃ karma pauruṣeṇa vihanyate /
śītamuṣṇaṃ tathā varṣaṃ kṣutpipāse ca bhārata //

yadanyaddiṣṭabhāvasya puruṣasya svayaṃ kṛtam /
tasmādanuparodhaśca vidyate tatra lakṣaṇam //

lokasya nānyato vṛttiḥ pāṇḍavānyatra karmaṇaḥ /
evambuddhiḥ pravarteta phalaṃ syādubhayānvaye //

ya evaṃ kṛtabuddhiḥ sa karmasveva pravartate /
nāsiddho vyathate tasya na siddhau harṣamaśrute //

tatreyamanumātrā me bhīmasena vivakṣitā /
naikāntasiddhirvaktavyā śatrubhiḥ saha saṃyuge //

nātiprahīṇaraśmiḥ syāttathā bhāvaviparyaye /
viṣādamarcched glāniṃ vāpyetamarthaṃ bravīmite //

śvobhūte dhṛtarāṣṭrasya samīpaṃ prāpya pāṇḍava /
yatiṣye praśamaṃ kartuṃ yuṣmadarthamahāpayan //

śamaṃ cette kariṣyanti tato'nantaṃ yaśo mama /
bhavatāṃ kaca kṛtaḥ kāmasteṣāṃ ca śreya uttamam //

te cedabhinivekṣyante nābhyupaiṣyanti me vacaḥ /
kuravo yuddhamevātra ghoraṃ karma bhaviṣyati //

asminyuddhe bhīmasena tvayi bhāraḥ samāhitaḥ /
dhūrarjunena dhāryā syādveḍhavya itaro janaḥ //

ahaṃ hi yantā bībhatsorbhavitā saṃyuge sati /
dhanañjayasyaiṣa kāmo na hi yuddhaṃ na kāmaye //

tasmādāśaṅkamāno'haṃ vṛkodara matiṃ tava /
gadataḥ klībayā vācā tejaste samadīdipam //