Mahabharata · Chapter 5.73

yathāyathaiva śāntiḥ syātkurūṇāṃ madhusūdana /
tathātathaiva bhāṣethā mā sma yuddhena bhīṣayeḥ //

amarṣī jātasaṃrambhaḥ śreyodveṣī mahāmanāḥ /
nograṃ duryodhano vācyaḥ sāmnaivenaṃ samācareḥ //

prakṛtyā pāpasatvaśca tulyacetāstu dasyubhiḥ /
aiśvaryamadamattaśca kṛtavairaśca pāṇḍavaiḥ //

adīrghadarśī niṣṭhūrī kṣeptā krūraparākramaḥ /
dīrghamanyuraneyaśca pāpātmā nikṛtipriyaḥ //

mriyetāpi na bhajyeta naiva jahyātsvakaṃ matam /
tādṛśena śamaḥ kṛṣṇa manye paramaduṣkaraḥ //

suhṛdāmapyavācīnastyaktadharmā priyānṛtaḥ /
pratihantye suhṛdāṃ vācaścaiva manāṃsi ca //

sa manyuvaśamāpannaḥ svabhāvaṃ duṣṭamāsthitaḥ /
svabhāvātpāpamabhyeti tṛṇaiśchanna ivoragaḥ //

duryodhano hi yatsenaḥ sarvathā viditastava /
yacchīlo yatsvabhāvaśca yadbalo yatparākramaḥ //

purā prasannāḥ kuravaḥ sahaputrāstathā vayam /
indrajyeṣṭhā ivābhūma modamānāḥ sabāndhavāḥ //

duryodhanasya krodhena bharatā madhusūdana /
dhakṣyante śiśirāpāye vanānīva hutāśanaiḥ //

aṣṭādaśeme rājānaḥ prakhyāta madhusūdana /
ye samuccicchidurjñātīnsuhṛdaśca sabāndhavān //

asurāṇāṃ samṛddhānāṃ jvalatāmiva tejasā /
paryāyakāle dharmasya prāpte kalirajāyata //

haihayānāmudāvarto nīpānāṃ janamejayaḥ /
bahulastālajaṅghānāṃ kṛmīṇāmuddhato vasuḥ //

ajabinduḥ suvīrāṇāṃ surāṣṭrāṇāṃ ruṣarddhikaḥ /
arkajaśca balīhānāṃ cīnānāṃ dhautamūlakaḥ //

hayagrīvo videhānāṃ varayuśca mahaujasām /
bāhuḥ sundaravaṃśānāṃ dīptākṣāṇāṃ purūravāḥ //

sahajaścedimatsyānāṃ pravīrāṇāṃ vṛṣadhvajaḥ /
dhāraṇaścandravatsānāṃ mukuṭānāṃ vigāhanaḥ //

śamaśca nandivegānāmityete kulapāṃsanāḥ /
yugānte kṛṣṇa sambhūtāḥ kuleṣu puruṣādhamāḥ //

apyayaṃ naḥ kurūṇāṃ syādyugānte kālasambhṛtaḥ /
duryodhanaḥ kulāṅgāro jaghanyaḥ pāpapūruṣaḥ //

tasmānmṛdu śanairbrūyā dharmārthasahitaṃ hitam /
kāmānubaddhaṃ bahulaṃ nogramugraparākramam //

api duryodhanaṃ kṛṣṇa sarve vayamadhaścarāḥ /
nīcairbhūtvā'nuyāsyāmo mā sma no bharatā naśan //

apyudāsīnavṛttiḥ syādyathā naḥ kurubhiḥ saha /
vāsudeva tathā kāryaṃ na kurūnanayaḥ spṛśet //

vācyaḥ pitāmaho vṛddho ye ca kṛṣṇa samāsadaḥ /
bhrātṝṇāmastu saubhrātraṃ dhārtarāṣṭraḥ praśāmyatām //

ahametadbravīmyevaṃ rājā caiva praśaṃsati /
arjuno naiva yuddhārthī bhūyasī hi dayā'rjune //