Mahabharata · Chapter 5.69

bhūyo me puṇḍarīkākṣaṃ sañjayācakṣva pṛcchataḥ /
nāmakarmārthavittāta prāpnuyāṃ puruṣottamam //
sañjaya uvāca /

śrutaṃ me vāsudevasya nāmanirvacanaṃ śubham /
yāvattatrābhijāne'hamaprameyo hi keśavaḥ //

vasanātsarvabhūtānāṃ vasutvāddevayonitaḥ /
vāsudevastato vedyo bṛhattvādviṣṇurucyate //

maunāddhyānācca yogācca viddi bhārata mādhavam /
sarvatattvalayāccaiva madhuhā madhusūdanaḥ //

kṛṣirbhūvācakaḥ śabdo gaśca nirvṛtivācakaḥ /
viṣṇustadbhāvayogācca kṛṣṇo bhavati sātvataḥ //

puṇḍarīkaṃ paraṃ dhāma nityamakṣayamavyayam /
tadbhāvātpuṇḍarīkākṣo dasyutrāsājjānārdanaḥ //

yataḥ satvaṃ na cyavate yacca yatvānna hīyate /
sātvataḥ sātvatastasmādārṣabhādvṛṣabhekṣaṇaḥ //

na jāyate janitrā'yamajastasmādanīkajit /
devānāṃ svaprakāśatvāddamāddāmodaro vibhuḥ //

harṣātsukhātsukhaiśvaryāddhṛṣīkeśatvamaśrute /
bāhubhyāṃ rodasī bibhranmahābāhuriti smṛtaḥ //

agho na kṣīyate jātu yasmāttasmādadhokṣajaḥ /
narāṇāmayanāccāpi tato nārāyaṇaḥ smṛtaḥ //

pūraṇātsadanāccāpi tato'saupuruṣottamaḥ / asataśca sataścaiva sarvasya prabhavāpyayāt /
sarvasya ca sadā jñānātsarvametaṃ pracakṣate //

satye pratiṣṭhitaḥ kṛṣṇaḥ satyamatra pratiṣṭhitam /
satyātsatyaṃ tu govindastasmātsatyopi nāmataḥ //

viṣṇurvikramaṇāddevo jayanāñjiṣṇurucyate /
śāśvatatvādanantaśca govindo vedanādbhavām //

atattvaṃ kurute tattvaṃ tena mohayate prajāḥ //

evaṃvidho dharmanityo bhagavānmadhusūdanaḥ /
āgantā hi mahābāhurānṛśaṃsyārthamacyutaḥ //