મહાભારત · અધ્યાય 5.65

દુર્યોધન વિજાનીહિ યત્ત્વાં વક્ષ્યામિ પુત્રક ।
ઉત્પથં મન્યસે માર્ગમનભિજ્ઞ ઇવાધ્વગઃ ॥

પઞ્ચાનાં પાણ્ડુપુત્રાણાં યત્તેજઃ પ્રજિહીર્ષસિ ।
પઞ્ચાનામિવ ભૂતાનાં મહતાં લોકધારિણામ્ ॥

યુધિષ્ઠિરં હિ કૌન્તેયં પરં ધર્મમિહાસ્થિતમ્ ।
પરાં ગતિમસમ્પ્રેત્ય ન ત્વં જેતુમિહાર્હસિ ॥

ભીમસેનં ચ કૌન્તેયં યસ્ય નાસ્તિ સમો બલે ।
રણાન્તકં તર્જયસે મહાવાતમિવ દ્રુમઃ ॥

સર્વશસ્ત્રભૃતાં શ્રેષ્ઠં મેરું સિખરિણામિવ ।
યુધિ ગાણ્ડિવધન્વાનં કો નુ યુધ્યેત બુદ્ધિમાન્ ॥

ધૃષ્ટદ્યુમ્નશ્ચ પાઞ્ચાલ્યઃ કમિવાદ્ય ન શાતયેત્ ।
શત્રુમધ્યે શરાન્મુઞ્ચન્દેવરાડશનીમિવ ॥

સાત્યકિશ્ચાપિ દુર્ધર્ષઃ સમ્મતોઽન્ધકવૃષ્ણિષુ ।
ધ્વંસયિષ્યતિ તે સેનાં પાણ્ડવેયહિતે રતઃ ॥

યઃ પુનઃ પ્રતિમાનેન ત્રીલ્લોકાનતિરિચ્યતે ।
તં કૃષ્ણં પુણ્ડરીકાક્ષં કો નુ યુદ્ધ્યેત બુદ્ધિમાન્ ॥

એકતો હ્યસ્ય દારાશ્ચ જ્ઞાતયશ્ચ સબાન્ધવાઃ ।
આત્મા ચ પૃથિવી ચેયમેકતશ્ચ ધનઞ્જયઃ ॥

વાસુદેવોઽપિ દુર્ધર્ષો યતાત્મા યત્ર પાણ્ડવઃ ।
અવિષહ્યં પૃથિવ્યાપિ તદ્બલં યત્ર કેશવઃ ॥

તિષ્ઠ તાત સતાં વાક્યે સુહૃદામર્થવાદિનામ્ ।
વૃદ્ધં શાન્તનવં ભીષ્મં તિતિક્ષસ્વ પિતામહમ્ ॥

માં ચ બ્રુવાણં શુશ્રૂષ કુરૂણામર્થદર્શિનમ્ ।
દ્રોણં કૃપં વિકર્ણં ચ મહારાજં ચ બાહ્લિકમ્ ॥

એતે હ્યપિ યતૈવાહં મન્તુમર્હસિ તાંસ્તથા ।
સર્વે ધર્મવિદો હ્યેતે તુલ્યસ્નેહાશ્ચ ભારત ॥

યત્તદ્વિરાટનગરે સહ ભ્રાતૃભિરગ્રતઃ ।
ઉત્સૃજ્ય ગાઃ સુસન્ત્રસ્તં બલં તે સમશીર્યત ॥

યચ્ચૈવ નગરે તસ્મિઞ્શ્રૂયતે મહદદ્ભુતમ્ ।
એકસ્ય ચ બહૂનાં ચ પર્યાપ્તં તન્નિદર્શનમ્ ॥

અર્જુનસ્તત્તથાકાર્ષીત્કિં પુનઃ સર્વ એવ તે ।
સ ભ્રાતૄનભિજાનીહિ વૃત્ત્યા તં પ્રતિપાદય ॥