Mahabharata · Chapter 5.139

evamuktastu vimanāstiryagdṛṣṭiradhomukhaḥ /
saṃhatya ca bhruvormadhyaṃ na kiñcidvyājahāra ha //

taṃ vai vimanasaṃ dṛṣṭvā samprekṣyānyonyamantikāt /
punarevottaraṃ vākyamuktavantau nararṣabhau //
bhīṣma uvāca /

śuśrūṣamanasūyaṃ ca brahmaṇyaṃ satyavādinam /
pratiyotsyāmahe pārthamato duḥkhataraṃ nu kim //
droṇa uvāca /

aśvatthāmni yathā putre bhūyo mama dhanañjaye /
bahumānaḥ paro rājansannatiśca kapidhvaje //

taṃ cetputrātpriyatamaṃ pratiyotsye dhanañjayam /
kṣātraṃ dharmamanuṣṭhāya dhigastu kṣatrijīvikām //

yasya loke samo nāsti kaścidanyo dhanurdharaḥ /
matprasādātsa bībhatsuḥ śreyānanyairdhanurdharaiḥ //

mitradhrugduṣṭabhāvaśca nāstiko'thānṛjuḥ śaṭhaḥ /
na satsu labhate pūjāṃ yajñe mūrkha ivāgataḥ //

vāryamāṇo'pi pāpebhyaḥ pāpātmā pāpamicchati /
codyamāno'pi pāpena śubhātmā śubhamicchati //

mithyopacaritā hyete vartamāna hyanupriye /
ahitatvāya kalpante doṣā bharatasattama //

tvamuktaḥ kuruvṛddhena mayā ca vidureṇa ca /
vāsudevena ca tathā śreyo naivābhimanyase //

asti me balamityeva sahasā tvaṃ titīrṣasi /
sagrāhanakramakaraṃ gaṅgāvegamivoṣṇage //

vāsasaiva yathā hi tvaṃ prāvṛṇvāno'bhimanyase /
srajaṃ tyaktāmiva prāpya lobhādyaudhiṣṭhirīṃ śriyam //

draupadīsahitaṃ pārthaṃ sāyudhairbhrātṛbhirvṛtam /
vanasthamapi rājyasthaḥ pāṇḍavaṃ ko vijeṣyati //

nideśe yasya rājānaḥ sarve tiṣṭhanti kiṅkarāḥ /
tamailavilamāsādya dharmarājo vyarājata //

kuberasadanaṃ prāpya tato ratnānyavāpya ca /
sphītamākramya te rāṣṭraṃ rājyamicchanti pāṇḍavāḥ //

dattaṃ hutamadhītaṃ ca brāhmaṇāstarpitā dhanaiḥ /
āvayorgatamāyuśca kṛtakṛtyau ca viddhi nau //

tvaṃ tu hitvā sukhaṃ rājyaṃ mitrāṇi ca dhanāni ca /
vigrahaṃ pāṇḍavaiḥ kṛtvā mahadvyasanamāpsyasi //

draupadī yasya cāśāste vijayaṃ satyavādinī /
tapoghoravratā devī kathaṃ jeṣyasi pāṇḍavam //

mantrī janārdano yasya bhrātā yasya dhanañjayaḥ /
sarvaśastrabhṛtāṃ śreṣṭhaḥ kathaṃ jeṣyasi pāṇḍavam //

sahāyā brāhmaṇā yasya dhṛtimanto jitendriyāḥ /
tamugratapasaṃ vīraṃ kathaṃ jeṣyasi pāṇḍavam //

punaruktaṃ ca vakṣyāmi yatkāryaṃ bhūtimicchatā /
suhṛdā mañjamāneṣu suhṛtsu vyasanārṇave //

alaṃ yuddhena tairvīraiḥ śāmya tvaṃ kuruvṛddhaye /
mā gamaḥ satutāmātyaḥsamitraśca yamakṣayam //