Mahabharata · Chapter 5.138

kuntyāstu vacanaṃ śrutvā bhīṣmadroṇau mahārathau /
duryodhanamidaṃ vākyamūcatuḥ śāsanātigam //

śrutaṃ te puruṣavyāghra kuntyāḥ kṛṣṇasya sannidhau /
vākyamarthavadatyugramuktaṃ dharmyamanuttamam //

tatkariṣyanti kaunteyā vāsudevasya sammatam /
na hi te jātu śāmyerannṛte rājyena kaurava //

kleśitā hi tvayā pārthā dharmapāśasitāstadā /
sabhāyāṃ draupadī caiva taiśca tanmarṣitaṃ tava //

kṛtāstraṃ hyarjunaṃ prāpya bhīmaṃ ca kṛtaniścayam /
gāṇḍīvaṃ ceṣudhī caiva rathaṃ ca dhvajameva ca //

nakulaṃ sahadevaṃ ca balavīryasamanvitau /
sahāyaṃ vāsudevaṃ ca na kṣaṃsyati yudhiṣṭhiraḥ //

pratyakṣaṃ te mahābāho yathā pārthena dhīmatā /
virāṭanagare pūrvaṃ sarve sma yudhi nirjitāḥ //

dānavā ghorakarmāṇo nivātakavacā yudhi /
raudramastraṃ samādāya dagdhā vānaraketunā //

karṇaprabhṛtayaśceme tvaṃ cāpi kavacī rathī /
mokṣito ghoṣayātrāyāṃ paryāptaṃ tannidarśanam //

praśāmya bharataśreṣṭha bhrātṛbhiḥ saha pāṇḍavaiḥ /
rakṣemāṃ pṛthivīṃ sarvāṃ mṛtyordaṃṣṭrāntaraṃ gatām //

jyeṣṭho bhrātā dharmaśīlo vatsalaḥ ślakṣṇavākkaviḥ /
taṃ gaccha puruṣavyāghraṃ vyapanīyeha kilbiṣam //

dṛṣṭaścettvaṃ pāṇḍavena vyapanītaśarāsanaḥ /
praśāntabhrukuṭiḥ śrīmānkṛtā śāntiḥkulasya naḥ //

tamabhyetya sahāmātyaḥ pariṣvajya nṛpātmajam /
abhivādaya rājānaṃ yathāpūrvamarindama //

abhivādayamānaṃ tvāṃ pāṇibhyāṃ bhīmapūrvajaḥ /
pratigṛhṇātu sauhārdātkuntīputro yudhiṣṭhiraḥ //

siṃhaskandhorubāhustvāṃ vṛttāyatamahābhujaḥ /
pariṣvajatu bāhubhyāṃ bhīmaḥ praharatāṃ varaḥ //

kambugrīvo guḍākeśastatastvāṃ puṣkarekṣaṇaḥ /
abhivādayatāṃ pārthaḥ kuntīputro dhanañjayaḥ //

āśvineyau naravyāghrau rūpeṇāpratimau bhuvi /
tau ca tvāṃ guruvatpromṇā pūjayā pratyudīyatām //

muñcantvānandajāśrūṇi dāśārhapramukhā nṛpāḥ /
sangaccha bhrātṛbhiḥ sārdhaṃ mānaṃ santyajya pārthiva //

praśādhi pṛthivīṃ kṛtsnāṃ tatastvaṃ bhrātṛbhiḥ saha /
samāliṅgya ca harṣeṇa nṛpā yāntu parasparam //

alaṃ yuddhena rājendra suhṛdāṃ śṛṇu vāraṇam /
dhruvaṃ vināśo yuddhe hi kṣatriyāṇāṃ pradṛśyate //

jyotīṃṣi pratikūlāni dāruṇā mṛgapakṣiṇaḥ /
utpātā vividhā vīra dṛśyante kṣatranāśanāḥ //

viśeṣata ihāsmākaṃ nimittāni vināśane /
ulkābhirhi pradīptābhirbādhyate pṛtanā tava //

vāhanānyaprahṛṣṭāni rudantīva viśāmpate /
gṛdhrāste paryupāsante sainyāni ca samantataḥ //

nagaraṃ na yathāpūrvaṃ tathā rājaniveśanam /
śivāścāśivanirghoṣā dīptāṃ sevanti vai diśaṃ //

kuru vākyaṃ piturmāturasmākaṃ ca hitaiṣiṇām /
tvayyāyatto mahābāho śamo vyāyāma eva ca //

na cetkariṣyasi vacaḥ suhṛdāmarikarśana /
tapsyase vāhinīṃ dṛṣṭvā pārthabāṇaprapīḍitām //

bhīmasya ca mahānādaṃ nadataḥ śuṣmiṇo raṇe / śrutvā smartāsi me vākyaṃ gāṇḍīvasya ca niḥśvanam /
yadyetadapasavyaṃ te vaco mama bhaviṣyati //