મહાભારત · અધ્યાય 5.119

ગાલવં વૈનતેયોઽથ પ્રહસન્નિદમબ્રવીત્ ।
દિષ્ટ્યા કૃતાર્થં પશ્યામિ ભવન્તમિહ વૈ દ્વિજ ॥

ગાલવસ્તુ વચઃ શ્રુત્વા વૈનતેયેન ભાષિતમ્ ।
ચતુર્ભાગાવશિષ્ટં તદાચખ્યૌ કાર્યમસ્ય હિ ॥

સુપર્ણસ્ત્વબ્રવીદેનં ગાલવં વદતાં વરઃ ।
પ્રયત્નસ્તે ન કર્તવ્યો નૈષ સમ્પત્સ્યતે તવ ॥

પુરા હિ કાન્યકુબ્જે વૈ ગાધેઃ સત્યવતીં સુતામ્ ।
ભાર્યાર્થે વરયત્કન્યામૃચીકસ્તેન ભાષિતઃ ॥

એકતઃશ્યામકર્ણાનાં હયાનાં ચન્દ્રવર્ચસામ્ ।
ભગવન્દીયતાકં મહ્યં મહસ્રમિતિ ગાલવ ॥

ઋચીકસ્તુ તથેત્યુક્ત્વા વરુણસ્યાલયં ગતઃ ।
અશ્વતીર્થે હયાઁલ્લબ્ધ્વા દત્તવાન્પાર્થિવાય વૈ ॥

ઇષ્ટ્વા તે પુણ્ડરીકેણ દત્તા રાજ્ઞા દ્વિજાતિષુ ।
તેભ્યો દ્વે દ્વે શતે ક્રીત્વા પ્રાપ્તે તૈઃ પાર્થિવૈસ્તદા ॥

અપરાણ્યપિ ચત્વારિ શતાનિ દ્વિજસત્તમ ।
નીયમાનાનિ સન્તારે હૃતાન્યાસન્નિતસ્તતઃ ॥

એવં ન શક્યમપ્રાપ્યં પ્રાપ્તું ગાલવ કર્હિચિત્ ।
ઇમામશ્વશતાભ્યાં વૈ દ્વાભ્યાં તસ્મૈ નિવેદય ॥

વિશ્વામિત્રાય ધર્માત્મન્ષઙ્ભિરશ્વશતૈઃ સહ ।
તતોઽસિ ગતસમ્મોહઃ કૃતકૃત્યો દ્વિજોત્તમ ॥

ગાલવસ્તં તથેત્યુક્ત્વા સુપર્ણસહિતસ્તતઃ ।
આદાયાશ્વાંશ્ચ કન્યાં ચ વિશ્વામિત્રપુપાગમત્ ॥

અશ્વાનાં કાઙ્ક્ષિતાર્થાનાં ષડિમાનિ શતાનિ વૈ ।
શતદ્વયેન કન્યેયં ભવતા પ્રતિગૃહ્યતામ્ ॥

અસ્યાં રાજર્ષિભિઃ પુત્રા જાતા વૈ ધાર્મિકાસ્ત્રયઃ ।
ચતુર્થં જનયત્વેકં ભવાનપિ નરોત્તમમ્ ॥

પૂર્ણાન્યેવં શતાન્યષ્ટૌ તુરગાણાં ભવન્તુ તે ।
ભવતો હ્યનૃણો ભૂત્વા તપઃ કુર્યાં યથાસુખમ્ ॥

વિશ્વામિત્રસ્તુ તં દૃષ્ટ્વા ગાલવં સહ પક્ષિણા ।
કન્યાં ચ તાં વરારોહામિદમિત્યબ્રવીદ્વચઃ ॥

કિમિયં પૂર્વમેવેહ ન દત્તા મમ ગાલવ ।
પુત્રા મમૈવ ચત્વારો ભવેયુઃ કુલભાવનાઃ ॥

પ્રતિગૃહ્ણામિ તે કન્યામેકપુત્રફલાય વૈ ।
અશ્વાશ્ચાશ્રમમાસાદ્ય ચરન્તુ મમ સર્વશઃ ॥
નારદ ઉવાચ ।

સ તયા રમમાણોઽથ વિશ્વામિત્રો મહાદ્યુતિઃ ।
આત્મજં જનયામાસ માધવીપુત્રમષ્ટકમ્ ॥

જાતમાત્રં સુતં તં ચ વિશ્વામિત્રો મહામુનિઃ ।
સંયોજ્યાર્થૈસ્તથા ધર્મૈરશ્વૈસ્તૈઃ સમયોજયત્ ॥

અથાષ્ટકઃ પુરં પ્રાયાત્તદા સોમપુરપ્રભમ્ ।
નિર્યાત્ય કન્યાં શિષ્યાય કૌશિકોપિ વનં યયૌ ॥

ગાલવોપિ સુપર્ણેન સહ નિર્યાત્ય દક્ષિણામ્ ।
મનસાઽતિપ્રતીતેન કન્યામિદમુવાચ હ ॥

જાતો દાનપતિઃ પુત્રસ્ત્વયા શૂરસ્તથાઽપરઃ ।
સત્યધર્મરતશ્ચાન્યો યજ્વા ચાપિ તથાઽપરઃ ॥

તદાગચ્છ વરારોહે તારિતસ્તે પિતા સુતૈઃ ।
ચત્વારશ્ચૈવ રાજાનસ્તથા ચાહં સુમધ્યમે ॥
નારદ ઉવાચ ।

ગાલવસ્ત્વભ્યનુજ્ઞાય સુપર્ણં પન્નગાશનમ્ ।
પિતુર્નિર્યાત્ય તાં કન્યાં પ્રયયૌ વનમેવ હ ॥