Mahabharata · Chapter 5.117

mahāvīryo mahīpālaḥ kāśīnāmīśvaraḥ prabhuḥ /
divodāsa iti khyāto bhaimasenirnarādhipaḥ //

tatra gacchāvahe bhadre śanairāgaccha mā śucaḥ /
dhārmikaḥ saṃyame yuktaḥ satye caiva janeśvaraḥ //
nārada uvāca /

tamupāgamya sa munirnyāyatastena satkṛtaḥ /
gālavaḥ prasavasyārthe taṃ nṛpaṃ pratyacodayat //
divodāma uvāca /

śrutametanmayā pūrvaṃ kimuktvā vistaraṃ dvija /
kāṅkṣito hi mayaiṣo'rthaḥ śrutvaiva dvijasattama //

etacca me bahumataṃ yadutsṛjya narādhipān /
māmevamupayāto'si bhāvi caitadasaṃśayam //

sa eva vibhavo'samākamaśvānāmapi gālava /
ahamapyekamevāsyāṃ janayiṣyāmi pārthivam //
nārada uvāca /

tathetyuktvā dvijaśreṣṭhaḥ prādātkanyāṃ mahīpateḥ /
vidhipūrvāṃ ca tāṃ rājā kanyāṃ pratigṛhītavān //

reme sa tasyāṃ rājarṣiḥ prabhāvatyāṃ yathā raviḥ /
svāhāyāṃ ca yathā vahniryathā śācyāṃ ca vāsavaḥ //

yathā candraśca rohiṇyāṃ yathā dhūmorṇayā yamaḥ /
varuṇaśca yathā gauryāṃ yathā cardhyāṃ dhaneśvaraḥ //

yathā nārāyaṇo lakṣmyāṃ jāhnavyāṃ ca yathodadhiḥ /
yathā rudraśca rudrāṇyāṃ yathā vedyāṃ pitāmahaḥ //

adṛśyantyāṃ ca vāsiṣṭho vasiṣṭhaścākṣamālayā /
cyavanaśca sukanyāyāṃ pulastyaḥ sandhyayā yathā //

agastyaścāpi vaidarbhyāṃ sāvitryāṃ satyavānyathā /
yathā bhṛguḥ pulomāyāmadityāṃ kaśyapo yathā //

reṇukāyāṃ yathārcīko haimavatyāṃ ca kauśikaḥ /
bṛhaspatiśca tārāyāṃ śukraśca śataparvaṇā //

yathā bhūmyāṃ bhūmipatirurvaśyāṃ ca purūravāḥ /
ṛcīkaḥ satyavatyāṃ ca sarasvasyāṃ yathā manuḥ //

śakuntalāyāṃ duṣyanto dhṛtyāṃ dharmaśca śāśvataḥ /
damayantyāṃ nalaścaiva satyavatyāṃ ca nāradaḥ //

jaratkārurjaratkārvāṃ pulastyaśca pratīcyayā /
menakāyāṃ yathorṇāyustumburuścaiva rambhayā //

vāsukiḥ śataśīrṣāyāṃ kumāryāṃ ca dhanañjayaḥ /
vaidehyāṃ ca yathā rāmo rukmiṇyāṃ ca janārdanaḥ //

tathā tu ramamāṇasya divodāsasya bhūpateḥ /
mādhavī janayāmāsa putramekaṃ pratardanam //

athājagāma bhagavāndivodāsaṃ sa gālavaḥ /
samaye samanuprāpte vacanaṃ cedamabravīt //

niryātayatu me kanyāṃ bhavāṃstiṣṭhantu vājinaḥ /
yāvadanyatra gacchāmi śulkārthaṃ pṛthivīpate //
nārada uvāca /

divodāso'tha dharmātmā samaye gālavasya tām /
kānyāṃ niryātayāmāsa sthitaḥ satye mahīpatiḥ //