Mahabharata · Chapter 5.116

haryaśvastvabravīdrājā vicintya bahudhā tataḥ /
dīrghamuṣṇaṃ ca niśvasya prajāhetornṛpottamaḥ //

unnateṣūnnatā ṣaṭsu sūkṣmā sūkṣmeṣu pañcasu /
gambhīrā triṣu cāṅgeṣu iyaṃ raktā ca pañcasu //

śroṇyau lalāṭamūrū ca ghrāṇaṃ ceti ṣaḍunnatam / sūkṣmāṇyaṅguliparvāṇi keśaromanasvatvacaḥ /

svaraḥ satvaṃ ca nābhiśca trigambhīraṃ pracakṣate /
pāṇipādatale rakte netrāntau ca nakhāni ca //

pañcadīrghaṃ caturhrasvaṃ pañcasūkṣmaṃ ṣaḍunnatam /
saptaraktaṃ trivistīrṇaṃ trigambhīraṃ praśakasyate //

pañcaiva dīrghā hanulocanāni bāhūrunāsāśca sukhapradāni /
hrasvāni catvāri ca liṅgapṛṣṭhe grīvā ca jaṅghe ca hitapradāni //

sūkṣmāṇi catvāri ca liṅgapṛṣṭhe grīvā ca jaṅghe ca hitapradāni //
sūkṣmāṇi pañca daśanāṅguliparvakeśā stvakvaiva vai kararuhāśca na duḥkhitānām /
vakṣo'tha kakṣo nakhanāsikāsyu- raṃsatrikaṃ ceti ṣaḍunnatāni //

netrāntapādakaratālvadharoṣṭhajihvā raktā nakhāśca khalu sarvasukhāvahāni //

bahudevāsurālokā bahugandharvadarśanā /
bahulakṣaṇasampannā bahukalyāṇadhāriṇī //

samartheyaṃ janayituṃ cakravartinamātmajam /
brūhi śulkaṃ dvijaśreṣṭha samīkṣya vibhavaṃ mama //
gālava uvāca /

ekataḥśyāmakarṇānāṃ śatānyaṣṭau prayaccha me /
hayānāṃ candraśubhrāṇāṃ deśajānāṃ vapuṣmatām //

tatastava bhavitrīyaṃ putrāṇāṃ jananī śubhā /
araṇīva hutāśānāṃ yonirāyatalocanā //
nārada uvāca /

etacchrutvā vaco rājā haryaśvaḥ kāmamohitaḥ /
uvāca gālavaṃ dīno rājarṣirṛṣisattamam //

dve me śate sannihite hayānāṃ yadvidhāstava /
eṣṭavyāḥ śataśastvanye caranti mama vājinaḥ //

so'hamekamapatyaṃ vai janayiṣyāmi gālava /
asyāmetaṃ bhavānkāmaṃ sampādayatu me varam //

etacchrutvā tu sā kanyā gālavaṃ vākyamabravīt /
mama datto varaḥ kaścitkenacidbrahmavādinā //

prasūtyante prasūtyante kanyaiva tvaṃ bhaviṣyasi /
sa tvaṃ dadasva māṃ rājñe pratigṛhya hayottamān //

nṛpebhyo hi caturbhyaste pūrṇānyaṣṭau śatāni vai /
bhaviṣyanti tathā putrā mama catvāra eva ca //

kriyatāmupasaṃhāro gurvarthaṃ dvijasattama /
eṣā tāvanmama prajñā yathā vā manyase dvija //

evamuktastu sa muniḥ kanyayā gālavastadā /
haryaśvaṃ pṛthivīpālamidaṃ vacanamabravīt //

iyaṃ kanyā naraśreṣṭha haryaśva pratigṛhyatām /
caturbhāgena śulkasya janayasvaikamātmajam //
nārada uvāca /

pratigṛhya sa tāṃ kanyāṃ gālavaṃ pratinandya ca /
samaye deśakāle ca labdhavānsutamīpsitam //

tato vasumanā nāma vasubhyo vasumattaraḥ /
vasuprakhyo narapatiḥ sa babhūva vasupradaḥ //

atha kāle punardhīmāngālavaḥ pratyupasthitaḥ /
upasaṅgamya covāca haryaśvaṃ prītamānasam //

jāto nṛpa sutaste'yaṃ bālo bhāskarasannibhaḥ /
kālo gantuṃ naraśreṣṭha śulkārthamaparaṃ nṛpam //
nārada uvāca /

haryaśvaḥ satyavacane sthitaḥ sthitvā ca pauruṣe /
durlabhatvāddhayānāṃ ca pradadau mādhavīṃ punaḥ //

mādhavī ca punardīptāṃ parityajyanṛpaśriyam /
kumārī kāmato bhūtvā gālavaṃ pṛṣṭhato'nvagāt //

tvayyeva tāvattiṣṭhantu hayā ityuktavāndvijaḥ /
prayayau kanyayā sārdhaṃ divodāsaṃ prajeśvaram //