મહાભારત · અધ્યાય 5.117

મહાવીર્યો મહીપાલઃ કાશીનામીશ્વરઃ પ્રભુઃ ।
દિવોદાસ ઇતિ ખ્યાતો ભૈમસેનિર્નરાધિપઃ ॥

તત્ર ગચ્છાવહે ભદ્રે શનૈરાગચ્છ મા શુચઃ ।
ધાર્મિકઃ સંયમે યુક્તઃ સત્યે ચૈવ જનેશ્વરઃ ॥
નારદ ઉવાચ ।

તમુપાગમ્ય સ મુનિર્ન્યાયતસ્તેન સત્કૃતઃ ।
ગાલવઃ પ્રસવસ્યાર્થે તં નૃપં પ્રત્યચોદયત્ ॥
દિવોદામ ઉવાચ ।

શ્રુતમેતન્મયા પૂર્વં કિમુક્ત્વા વિસ્તરં દ્વિજ ।
કાઙ્ક્ષિતો હિ મયૈષોઽર્થઃ શ્રુત્વૈવ દ્વિજસત્તમ ॥

એતચ્ચ મે બહુમતં યદુત્સૃજ્ય નરાધિપાન્ ।
મામેવમુપયાતોઽસિ ભાવિ ચૈતદસંશયમ્ ॥

સ એવ વિભવોઽસમાકમશ્વાનામપિ ગાલવ ।
અહમપ્યેકમેવાસ્યાં જનયિષ્યામિ પાર્થિવમ્ ॥
નારદ ઉવાચ ।

તથેત્યુક્ત્વા દ્વિજશ્રેષ્ઠઃ પ્રાદાત્કન્યાં મહીપતેઃ ।
વિધિપૂર્વાં ચ તાં રાજા કન્યાં પ્રતિગૃહીતવાન્ ॥

રેમે સ તસ્યાં રાજર્ષિઃ પ્રભાવત્યાં યથા રવિઃ ।
સ્વાહાયાં ચ યથા વહ્નિર્યથા શાચ્યાં ચ વાસવઃ ॥

યથા ચન્દ્રશ્ચ રોહિણ્યાં યથા ધૂમોર્ણયા યમઃ ।
વરુણશ્ચ યથા ગૌર્યાં યથા ચર્ધ્યાં ધનેશ્વરઃ ॥

યથા નારાયણો લક્ષ્મ્યાં જાહ્નવ્યાં ચ યથોદધિઃ ।
યથા રુદ્રશ્ચ રુદ્રાણ્યાં યથા વેદ્યાં પિતામહઃ ॥

અદૃશ્યન્ત્યાં ચ વાસિષ્ઠો વસિષ્ઠશ્ચાક્ષમાલયા ।
ચ્યવનશ્ચ સુકન્યાયાં પુલસ્ત્યઃ સન્ધ્યયા યથા ॥

અગસ્ત્યશ્ચાપિ વૈદર્ભ્યાં સાવિત્ર્યાં સત્યવાન્યથા ।
યથા ભૃગુઃ પુલોમાયામદિત્યાં કશ્યપો યથા ॥

રેણુકાયાં યથાર્ચીકો હૈમવત્યાં ચ કૌશિકઃ ।
બૃહસ્પતિશ્ચ તારાયાં શુક્રશ્ચ શતપર્વણા ॥

યથા ભૂમ્યાં ભૂમિપતિરુર્વશ્યાં ચ પુરૂરવાઃ ।
ઋચીકઃ સત્યવત્યાં ચ સરસ્વસ્યાં યથા મનુઃ ॥

શકુન્તલાયાં દુષ્યન્તો ધૃત્યાં ધર્મશ્ચ શાશ્વતઃ ।
દમયન્ત્યાં નલશ્ચૈવ સત્યવત્યાં ચ નારદઃ ॥

જરત્કારુર્જરત્કાર્વાં પુલસ્ત્યશ્ચ પ્રતીચ્યયા ।
મેનકાયાં યથોર્ણાયુસ્તુમ્બુરુશ્ચૈવ રમ્ભયા ॥

વાસુકિઃ શતશીર્ષાયાં કુમાર્યાં ચ ધનઞ્જયઃ ।
વૈદેહ્યાં ચ યથા રામો રુક્મિણ્યાં ચ જનાર્દનઃ ॥

તથા તુ રમમાણસ્ય દિવોદાસસ્ય ભૂપતેઃ ।
માધવી જનયામાસ પુત્રમેકં પ્રતર્દનમ્ ॥

અથાજગામ ભગવાન્દિવોદાસં સ ગાલવઃ ।
સમયે સમનુપ્રાપ્તે વચનં ચેદમબ્રવીત્ ॥

નિર્યાતયતુ મે કન્યાં ભવાંસ્તિષ્ઠન્તુ વાજિનઃ ।
યાવદન્યત્ર ગચ્છામિ શુલ્કાર્થં પૃથિવીપતે ॥
નારદ ઉવાચ ।

દિવોદાસોઽથ ધર્માત્મા સમયે ગાલવસ્ય તામ્ ।
કાન્યાં નિર્યાતયામાસ સ્થિતઃ સત્યે મહીપતિઃ ॥