મહાભારત · અધ્યાય 5.109

ઇયં વિવસ્વદા પૂર્વં શ્રૌતેન વિધિના કિલ ।
ગુરવે દક્ષિણા દત્તા દક્ષિણેત્યુચ્યતે ચ દિક્ ॥

અત્ર લોકત્રયસ્યાસ્ય પિતૃપક્ષઃ પ્રતિષ્ઠિતઃ ।
અત્રોષ્મપાણાં દેવાનાં નિવાસઃ શ્રૂયતે દ્વિજ ॥

અત્ર વિશ્વે સદા દેવાઃ પિતૃભિઃ સાર્ધમાસતે ।
ઇજ્યમાનાઃ સ્મ લોકેષુ સમ્પ્રાપ્તાસ્તુલ્યભાગતામ્ ॥

એતદ્દ્વિતીયં દેવસ્ય દ્વારમાચક્ષતે દ્વિજ ।
ત્રુટિશો લવશશ્ચાપિ ગણ્યતે કાલનિશ્ચયઃ ॥

અત્ર દેવર્ષયો નિત્યં પિતૃલોકર્ષયસ્તથા ।
તથા રાજર્ષયઃ સર્વે નિવસન્તિ ગતવ્યથાઃ ॥

અત્ર ધર્મશ્ચ સત્યં ચ કર્મ ચાત્ર નિગદ્યતે ।
ગતિરેષા દ્વિજશ્રેષ્ઠ કર્મણામવસાયિનામ્ ॥

એષા દિક્સા દ્વિજશ્રેષ્ઠ યાં સર્વઃ પ્રતિપદ્યતે ।
વૃતા ત્વનવબોધેન સુખં તેન ન ગમ્યતે ॥

નૈરૃતાનાં સહસ્રામિ બહૂન્યત્ર દ્વિજર્ષભ ।
સૃષ્ટાનિ પ્રતિકૂલાનિ દ્રષ્ટવ્યાન્યકૃતાત્મભિઃ ॥

અત્ર મન્દરકુઞ્જેષુ વિપ્રર્ષિસદનેષુ ચ ।
ગાયન્તિ ગાથા ગન્ધર્વાશ્ચિત્તબુદ્ધિહરા દ્વિજ ॥

અત્ર સામાનિ ગાથાભિઃ શ્રુત્વા ગીતાનિ રૈવતઃ ।
ગતદારો ગતામાત્યો ગતરાજ્યો વનં ગતઃ ॥

અત્ર સાવર્મિના ચૈવ યવક્રીતાત્મજેન ચ ।
મર્યાદા સ્થાપિતા બ્રહ્મન્યાં સૂર્યો નાતિવર્તતે ॥

અત્ર રાક્ષસરાજેન પૌલસ્ત્યેન મહાત્મના ।
રાવણેન તપઃ કૃત્વા સુરેભ્યોઽમરતા વૃતા ॥

અત્ર વૃત્તેન વૃત્રોઽપિ શક્રશત્રુત્વમેયિવાન્ ।
અત્ર સર્વાસવઃ પ્રાપ્તાઃ પુનર્ગચ્છન્તિ પઞ્ચધા ॥

અત્ર દુષ્કૃતકર્માણો નરાઃ પચ્યન્તિ ગાલવ ।
અત્ર વૈતરણી નામ નદી વૈતરણૈર્વૃતા ॥

અત્ર ગત્વા સુખસ્યાન્તં દુઃખસ્યાન્તં પ્રપદ્યતે ।
અત્રાવૃત્તો દિનકરઃ સુરસં ક્ષરતે પયઃ ॥

કાષ્ઠાં ચાસાદ્ય વાસિષ્ઠીં હિમમુત્સૃજતે પુનઃ ।
અત્રાહં ગાલવ પુરા ક્ષુધાઽર્તઃ પરિચિન્તયન્ ॥

લબ્ધવાન્યુધ્યમાનૌ દ્વૌ બૃહન્તૌ ગજકચ્છપૌ ।
અત્ર ચક્રધનુર્નામ સૂર્યાઞ્જાતો મહાનૃષિઃ ॥

વિદુર્યં કપિલં દેવં યેનાર્તાઃ સગરાત્મજાઃ ।
અત્ર સિદ્ધાઃ શિવા નામ બ્રાહ્મણા વેદપારગાઃ ॥

અધીત્ય સકલાન્વેદાઁલ્લેભિરે મોક્ષમક્ષયમ્ ।
અત્ર ભોગવતી નામ પુરી વાસુકિપાલિતા ॥

તક્ષકેણ ચ નાગેન તથૈવૈરાવતેન ચ ।
અત્ર નિર્યાણકાલેઽપિ તમઃ સમ્પ્રાપ્યતે મહત્ ॥

અભેદ્યં ભાસ્કરેણાપિ સ્વયં વા કૃષ્ણવર્ત્મના . એષ તસ્યાપિ તે માર્ગઃ પરિચારસ્ય ગાલવ ।
બ્રૂહિ મે યદિ ગન્તવ્યં પ્રતીચીં શૃણુ ચાપરામ્ ॥