Mahabharata · Chapter 4.53
tataḥ sudarśanaṃ nāma prāsādaṃ harivāhanaḥ /
sarvāndevānsamāroṣya prayayo yatra pāṇḍavaḥ //
sthūṇārājisahasraṃ tu yatra madhye pratiṣṭhitam /
tatra sūryapathe'tiṣṭhadvimalā mahatī sabhā //
ādityā vasavo rudrā aśvinau ca marudgaṇāḥ /
tatra śvetāni cakrāṇi kāñcanasphāṭikāni ca //
tathā citrāṇi chatrāṇi divyarūpāṇi bhārata . maṇiratnavicitrāṇi nānārūpāṇi bhāgaśaḥ /
ākāśe saha dṛśyante bhānumanti śubhāni ca //
agnerindrasya somasya yamasya varuṇasya ca / tathā dhāturvidhātuśca mitrasya dhanadasya ca /
rudrasya viṣṇo savitustridaśānāṃ tathaiva ca //
kāñcanāni ca dāmāni vividhāścottamasrajaḥ /
divyapuṣpābhisavītāstatra citrāṇi bhejire //
tasmiṃstu rājanprāsāde divyaratnavibhūṣite /
divyagandhasamāyuktāḥ srajo divyāścakāśire //
divyaśca vāyuḥ pravavau gandhamādāya sarvaśaḥ /
ṛtavaḥ puṣpamādāya samatiṣṭhanta bhārata //
prajānāṃ patayaḥ sapta sapta caiva maharṣabhaḥ / tatra devarṣayaścaiva devarājaṃ divaukasaḥ /
indreṇa sahitāḥ sarve tridaśāśca vyavasthitāḥ //
na paṅko na rajastatra praviveśa kathañcana /
ādityaśca virūkṣotra nātivelamivātapat //
divyagandhaṃ samādāya vāyustatrābhigacchati /
ākāśaṃ ca diśaḥ sarvā darśanīyamadṛśyata //
tatra devāḥ samāruhya taṃ divyaṃ sarvataḥprabham /
ambare vimale'tiṣṭhanprāsādaṃ kāmagāminam //
tatra rājarṣayaścaiva samāruhya divaukasaḥ /
śveto rājā vasumanāstathā bhadraḥ pradarśanaḥ //
nṛgo yayātirnahupo māndhāta bharataḥ kuruḥ /
aṣṭakaśca śibiścobhau sa ca rājā purūravāḥ //
ḍambhodbhavaḥ kārtavīryo hyarjunaḥ sagarastathā /
dilīpaḥ keralaḥ pūruḥ śaryātiḥ somakastadā //
hariścandraśca tejasvī raghurdaśarathastathā /
bhagīrathaśca rājarṣiḥ sarve ca janamejaya //
pāṇḍuścaiva mahārājaścāmaravyajanojjvalaḥ /
chatreṇa dhriyamāṇena rājasūyaśriyā vṛtaḥ //
ete cānye ca bahavaḥ puṇyaśīlāḥ śucivratāḥ /
kīrtimanto mahāvīryāstatraivāsandivi sthitāḥ //
gaṇāścāpsarasāṃ sarve gandharvāścāpi sarvaśaḥ /
daityarākṣasayakṣāśca suparṇāḥ pannagāstathā //
vāsavapramukhāḥ sarve devāśca sagaṇeśvarāḥ /
āsaṃstatra samārūḍhāḥ sangrāmaṃ taṃ didṛkṣavaḥ //
ityambare vyavasthāya prāsādasthā divaukasaḥ /
ekasya ca bahūnāṃ ca yuddhaṃ druṣṭuṃ vyavasthitāḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0