Mahabharata · Chapter 3.94

tataḥ samprasthito rājā kaunteyo bhūridakṣiṇaḥ /
agastyāśramamāsādya durjayāyāmuvāsa ha //

tatraiva lomaśaṃ rājā papraccha vadatāṃvaraḥ /
agastyeneha vātāpiḥ kimarthamupaśāmitaḥ //

āsīdvā kimprabhāvaśca sa daityo mānavāntakaḥ /
kimarthaṃ codito manyuragastyasya mahātmanaḥ //
lomaśa uvāca /

ilvalo nāma daiteya āsītkauravanandanā /
maṇimatyāṃ puri purā vātāpistasya cānujaḥ //

sa brāhmaṇaṃ tapoyuktamuvāca ditinandanaḥ /
putraṃ me bhagavānekamindratulyaṃ prayacchatu //

tasmai sa brāhmaṇo nādātputraṃ vāsavasammitam /
cukrodha so'surastasya brāhmaṇasya tato bhṛśam //

tadāprabhṛtirājendra ilvalo brahmahā'suraḥ /
manyumānbhrātaraṃ chāgaṃ māyāvī hyakarottataḥ //

meṣarūpī ca vātāpiḥ kāmarūpyabhavatkṣaṇāt /
saṃskṛtyataṃ bhojayati tato vipraṃ jidhāṃsati //

sa cāhvayati yaṃ vācā gataṃ vaivasvatakṣayam /
sa punardehamāsthāya jīvansma pratyadṛśyata //

tato vātāpimasuraṃ chāgaṃ kṛtvā susaṃskṛtam /
taṃ brāhmaṇaṃ bhojayitvā punareva samāhvayat //

tāmilvalena mahatā svareṇa giramīritām /
śrutvā'timāyo bālavānkṣipraṃ brāhmaṇakaṇṭakaḥ //

tasya pārśvaṃ vinirbhidya brāhmaṇasya mahāsuraḥ /
vātāpiḥ prahasanrājanniścakrāma viśāmpate //

evaṃ sa brāhmaṇānrājanbhojayitvā punaḥpunaḥ /
hiṃsayāmāyasa daiteya ilvalo duṣṭacetanaḥ //

agastyaścāpi bhagavānetasminkāla eva tu /
pitṝndadarśa garte vai lambamānānadhomukhān //

so'pṛcchallambamānāṃstānbhagavantaśca kimparāḥ / kimmarthaṃ veha lambadhve garte yūyamadhomukhāḥ /
santānahetoriti te pratyūcurbrahmavādinaḥ //

te tasmai kathayāmāsurvayaṃ te pitaraḥ svakāḥ /
gartametamanuprāptā lambāmaḥ prasavārthinaḥ //

yadi no janayethāstvamagastyāpatyamuttamam /
syānnosmānnirayānmokṣastvaṃ ca putrāpnuyā gatim //

sa tānuvāca tejasvī satyadharmaparāyaṇaḥ /
kariṣye pitaraḥ kāmaṃ vyetu vo mānaso jvaraḥ //

tataḥ prasavasantānaṃ cintayanbhagavānṛṣiḥ /
ātmanaḥ prasavasyārthe nāpaśyatsadṛśīṃ striyam //

sa tasya tas satvasya tattadaṅgamanuttamam /
sangṛhyatatsamairaṅgairnirmame striyamuttamām //

sa tāṃ vidarbharājāya putrakāmāya tāmyate /
nirmitāmātmano'rthāya muniḥ prādānmahātapāḥ //

sā tatra jajñe subhagā vidyutsaudāmanī yathā /
vibhrājamānā vapuṣā vyavardhata śubhānanā //

jātamātrāṃ ca tāṃ dṛṣṭvā vaidarbhaḥ pṛthivīpatiḥ /
praharṣeṇa dvijātibhyo nyavedayata bhārata //

abhyanandanta tāṃ sarve brāhmaṇā vasudhādhipa /
lopāmudreti tasyāśca cakrire nāma te dvijāḥ //

vavṛdhe sā mahārāja bibhratī rūpamuttamam /
apsvivotpalinī śīghramagneriva śikhā śubhā //

tāṃ yauvanasthāṃ rājendraśataṃ kanyāḥ svalankṛtāḥ /
dāsyaḥ śataṃ ca kalyāṇīmupātasthurvaśānugāḥ //

sā sma dāsīśatavṛtā madhye kanyāśatasya ca /
āraste tejasvinī kanyā rohiṇīva diviprabhā //

yauvanasthāmapi ca tāṃ śīlācārasamanvitām /
na vavre puruṣaḥ kaścidbhayāttasya mahātmanaḥ //

sā tu satyavatī kanyā rūpeṇāpsarasopyati /
toṣayāmāsa pitaraṃ śīlena svajanaṃ tathā //

vaidarbhī tu tathāyuktāṃ yuvatīṃ prekṣya vai pitā / manasā cintayāmāsa kasmai dadyāmimāṃsutām //