Mahabharata · Chapter 3.84
bhrātṝṇāṃ matamājñāya nāradasya ca dhīmataḥ /
pitāmahasamaṃ dhaumyaṃ prāha rājā yudhiṣṭhiraḥ //
mayā sa puruṣavyāghro jiṣṇuḥ satyaparākramaḥ /
astrahetormahābāhuramitātmā vivāsitaḥ //
sa hi vīro'nuraktaś samarthaśca tapodhanaḥ /
kṛtī ca bhṛśamapyastre vāsudeva iva prabhuḥ //
ahaṃ hyetāvubhau brahmankṛṣṇāvarivighātinau /
abhijānāmi vikrāntau tathā vyāsaḥ parantapau //
triyugau puṇḍarīkākṣau vāsudevadhanañjayau /
nārado'pitathā veda yoṣyaśaṃsatsadā mama //
tathā'hamapi jānāmi naranārāyaṇāvṛṣī /
śakto'yamityato matvā mayā sa preṣito'rjunaḥ //
indrādanavaraḥ śakraṃ surasūnuḥ surādhipam /
draṣṭumastrāṇi cādātumindrāditi vivāsitaḥ //
bhīṣmadroṇāvatirathau kṛpo drauṇiśca durjayaḥ /
dhṛtarāṣṭrasya putreṇa sudhṛtāḥ sumahābalāḥ //
sarve vedavidaḥ śūrāḥ sarve'strakuśalāstathā / sarve mahārathā mukhyāḥ sarve jitapariśramāḥ /
yoddhukāmāśca pārthena satataṃ ye mahābalāḥ //
sa ca divyāstravitkarṇaḥ sūtaputro mahārathaḥ / yo'stravegānilabalaḥ śarārcistalaniḥsvanaḥ /
rajodhūmo'strasampāto dhārtarāṣṭrāniloddhataḥ //
nisṛṣṭa iva kālena yugāntajvalano yathā /
mama sainyamayaṃ kakṣaṃ pradhakṣyati na saṃśayaḥ //
taṃ sa kuṣṇāniloddhūto divyāstrajvalano mahān /
śvetavājibalākābhṛdgaṇḍīvendrāyudholbaṇaḥ //
saṃrabdhaḥ śaradhārābhiḥ sudhīptaṃ karṇapāvakam /
udīrṇo'rjunamegho'yaṃ śamayiṣyati saṃyuge //
sa sākṣādeva sarvāṇi śakrātparapurañjayaḥ /
divyānyastrāṇi vībhatsuryathāvatpratipatsyate //
alaṃ sa teṣāṃ sarveṣāmiti me dhīyate matiḥ /
nāsti tvatikriyā tas raṇe'rīṇāṃ pratikriyā //
te vayaṃ pāṇḍavaṃ sarve gṛhītāstramarindamam /
draṣṭāro na hi bībhatsurbhāramudyamya sīdati //
vayaṃ tu tamṛte vīraṃ vane'smindvipadāṃvara /
avadhānaṃ na gacchāmaḥ kāmyake saha kṛṣṇayā //
bhavānanyadvanaṃ sādhu bahvannaṃ phalavacchuci /
ākhyātu ramaṇīyaṃ ca sevitaṃ puṇyakramabhiḥ //
yatrakañcidvayaṃ kālaṃ vasantaḥ satyavikramam /
pratīkṣāmo'rjunaṃ varaṃ vṛṣṭikāmā ivāmbudam //
vividhānāśramānkāṃściddvijātibhyaḥ pratiśrutān /
sarāṃsi saritaścaiva ramaṇīyāṃśca parvatān //
ācakṣva na hi me brahmanrocate tamṛte'rjunam / vane'sminkāmyake vāso gacchāmo'nyāṃ diśamprati //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0