Mahabharata · Chapter 3.4

vanaṃ praviṣṭeṣvatha pāṇḍaveṣu prajñācakṣustapyamāno'mbikeyaḥ /
dharmātmānaṃ viduramagādhabuddhiṃ 3-4-1da sukhāsīno vākyamuvāca rājā //
dhṛtarāṣṭra uvāca /

prajñā ca te bhārgavasyeva śuddhā dharmaṃ ca tvaṃ paramaṃ vettha sūkṣmam /
samaśca tvaṃ sammataḥ kauravāṇāṃ pathyaṃ caiṣāṃ mama caiva bravīhi //

evaṃ gate vidurayadadya kāryaṃ paurāśceme kathamasmānbhajeran /
te cāpyasmānnoddhareyuḥ samūlā- nna kāmaye tāṃśca vinaśyamānān //

saubalenaiva pāpena duryodhanahitaiṣiṇā /
krūramācaritaṃ kṣattarna me priyamanuṣṭhitam //

tathaivāṅgīkṛte tatra tadbhavānvaktumarhati /
uttaraṃ prāptakālaṃ ca kimanyanmanyate kṣamam //

nāsti dharme sahāyatvamiti me dīryate manaḥ /
yatra pāṇḍusutāḥ sarve kliśyanti vānamāgatāḥ //
vidura uvāca /

trivargo'yaṃ dharmamūlo narendra rājyaṃ cedaṃ dharmamūlaṃ vadanti /
dharme rājanvartamānaḥ svaśaktyā putrānsarvānpāhi kuntīsutāṃśca //

sa vai dhramo vipralabdhaḥ sabhāyāṃ pāpātmabhiḥ saubaleyapradhānaiḥ /
āhūya kuntīsutamakṣavatyāṃ parājaiṣītsatyasandhaṃ sutaste //

etasya te duṣpraṇītasya rāja- ndveṣasyāhaṃ paripaśyāmyupāyam /
yathā putrastava kauravya pāpā- nmukto loke pratitiṣṭheta sādhu //

tadvai sarvaṃ pāṇḍuputrā labhantāṃ yattadrājannatisṛṣṭaṃ tvayā'sīt /
eṣa dharmaḥ paramo yatsvakena rājā tuṣyenna parasveṣu gṛddhyet //

[yaśo ne naśyejjñātibhedaśca na syā- ddharmo na syānnaiva caivaṃ kṛte tvām.]
etatkārye tava sarvapradhānaṃ teṣāṃ tuṣṭiḥ śakuneścāvamānaḥ //

evaṃ śeṣaṃ yadi putreṣu te syā- detadrājaṃstvaramāṇaḥ kuruṣva /
athaitadevaṃ na karoṣi rājan dhruvaṃ kurūṇāṃ bhavitā vināśaḥ //

nahi kruddho bhīmaseno'rjuno vā śeṣaṃ kuryācchātravāṇāmanīke /
yeṣāṃ yoddhā savyasācī kṛtāstro dhanuryeṣāṃ gāṇḍivaṃ lokasāram //

yeṣāṃ bhīmo bāhuśālī ca yoddhā teṣāṃ loke kinnu na prāpyamasti /
uktaṃ pūrvaṃ jātamātre sute te mayā yatte hitamāsīttadānīm //

putraṃ tyajemamahitaṃ kulasya hitaṃ paraṃ na ca tattvaṃ cakartha /
idānīṃ te hitamuktaṃ na cettva- mevaṃ kartā paritaptā'si paścāt //

yadyetadevamanumantā sutaste samprīyamāṇaḥ pāṇḍavairekarājyam /
tāpo na te bhavitā prītiyogā- ttvaṃ cenna gṛhṇāsi sutaṃ sahāyaiḥ //

duryodhanaṃ tvahitaṃ vai nigṛhya pāṇḍoḥ putraṃ prakuruṣvādhipatye /
dhruvaṃ vināśastava putreṇa dhīman sabandhuvargeṇa sahaiva rājabhiḥ //

caturdaśe caiva varṣe narendra kulakṣayaṃ prāpsyasi rājasiṃha /
tasmātkuruṣvādhipatye narendra yudhiṣṭhiraṃ dharmabhṛtāṃ variṣṭham //

ajātaśatrurhi vimuktarāgo dharmoṇemāṃ pṛthivīṃ śāstu rājan /
tato rājanpārthivāḥ sarva eva vaiśyā ivāsmānupatiṣṭhantu sadyaḥ //

duryodhanaḥ śakuniḥ sūtaputraḥ prītyā rājanpāṇḍuputrānbhajantu /
duḥśāsano yācatu bhīmasenaṃ sabhāmadhye drupadasyātmajāṃ ca //

yudhiṣṭhiraṃ tvaṃ parisāntvayasva rājye cainaṃ sthāpayasvābhipūjya /
tvayā pṛṣṭaḥ kimahamanyadvadeya- metatkṛtvā kṛtakṛtyosi rājan //
dhṛtarāṣṭra uvāca /

etadvākyaṃ vidura yatte sabhāyā- miha proktaṃ pāṇḍavānprāpya māṃ ca /
hitaṃ teṣāmahitaṃ māmakānā- metatsarvaṃ mama nāvaidi cetaḥ //

idaṃ tvidānīṃ gata eva niścitaṃ teṣāmarthe pāṇḍavānāṃ yadāttha /
tenādya manye nāsi hito mameti kathaṃ hi putraṃ pāṇḍavārthe tyajeyam //

asaṃśayaṃ te'pi mamaiva putrā duryodhanastu mama dehātpramūtaḥ /
svaṃ vai dehaṃ parahetostyajeti konu brūyātsamatāmanvavekṣan //

sa māṃ jihmaṃ vidura sarvaṃ bravīpi manyuṃ te'hamadhikaṃ dhārayāmi /
yathecchakaṃ gaccha vā tiṣṭha vā tvaṃ susāntvyamānā'pyasatī strī jahāti //
vaiśepāyana uvāca /

etāvaduktvā dhṛtarāṣṭro'nvapadya- dantarveśma sahasotthāya rājan /
nedamastītyatha viduro bhāpamāppaḥ samprādravadyatra pārthā babhūvuḥ //