Mahabharata · Chapter 3.295

atha madrādhipo rājā nāradena samāgataḥ /
upaviṣṭaḥ sabhāmadhye kathāyogena bhārata //

tato'bhigamya tīrthāni sarvāṇyevāśramāṃstathā /
ājagāma piturveśma sāvitrī saha mantribhiḥ //

nāradena sahāsīnaṃ sā dṛṣṭvā pitaraṃ śubhā /
ubhayoreva śirasā cakre pādābhivādanam //
nārada uvāca /

kva gatā'bhūtsuteyaṃ te kutaścaivāgatā nṛpa /
kimarthaṃ yuvatīṃ bhadra na caināṃ samprayacchasi //
aśvapatiruvāca /

kāryeṇa khalvanenaiva preṣitādyaiva cāgatā /
etasyāḥ śṛṇu devarṣe bhartāraṃ yo'nayā vṛtaḥ //
mārkaṇḍeya uvāca /

sā brūhi vistareṇeti pitrā saṃyoditā śubhā /
tadaiva tasya vacanaṃ pratigṛhyedamabravīt //

āsītsālveṣu dharmātmā kṣatriyaḥ pṛthivīpatiḥ /
dyumatsena iti khyātaḥ paścāccāndho babhūva ha //

vinaṣṭacakṣuṣastasya bālaputrasya dhīmataḥ /
sāmīpyena hṛtaṃ rājyaṃ chidre'sminpūrvavairiṇā //

sa bālavatsayā sārdhaṃ bhāryayā prasthito vanam /
mahāraṇyaṃ gataścāpi pasteṣe mahāvrataḥ //

tasya putraḥ pure jātaḥ saṃvṛddhaśca tapovane /
satyavānanurūpo me bharteti manasā vṛtaḥ //
nārada uvāca /

aho vata mahatpāpaṃ sāvitryā nṛpate kṛtam /
ajānantyā yadanayā guṇavānsatyavānvṛtaḥ //

satyaṃ vadatyasya pitā satyaṃ mātā prabhāṣate /
tathā's brāhmaṇāścakrurnāmaitatsatyavāniti //

bālasyāśvāḥ priyāścāsya karotyaśvāṃśca mṛnmayān /
citre'pi vilikhatyaśvāṃścitrāśva iti cocyate //
rājovāca /

apīdānīṃ sa tejasvī buddhimānvā nṛpātmajaḥ /
kṣamāvānapi vā śṛraḥ satyavānpitṛvatsalaḥ //
nārada uvāca /

vivasvāniva tejasvī vṛhaspatisamo matau /
mahendra ivana vīraśca vasudheva kṣamānvitaḥ //
aśvapatiruvāca /

api rājātmajo dātā brahmaṇyaścāpi satyavān /
rūpavānapyudāro vā'pyathavā priyadarśanaḥ //
nārada uvāca /

sānkṛte rantidevas svaśaktyā dānataḥ samaḥ /
brahmaṇyaḥ satyavādī ca śibirauśīnaro yathā //

yayātiriva codāraḥ somavatpriyadarśanaḥ /
rūpeṇānyatamo'śvibhyāṃ dyumatsenasuto balī //

sa vadānyaḥ sa tejasvīdhīmāṃścaiva kṣamānvitaḥ / sa dāntaḥ sa mṛduḥ śūraḥ sa satyaḥ saṃyatendriyaḥ /
sanmaitraḥ sonasūyaśca sa hrīmāndyutimāṃśca saḥ //

nityaśaścārjavaṃ tasmindhṛtistatraiva ca dhruvā /
sankṣepatastapovṛddhaiḥ śīlavṛddhaiśca kathyate //
aśvapatiruvāca /

guṇairupetaṃ sarvaistaṃ bhagavanprabravīṣi me /
doṣānapyasya me brūhi yadi santīha kecana //
nārada uvāca /

eka evāsya doṣo hi guṇānākramya tiṣṭhati /
sa ca doṣaḥ prayatnena na śakyamativartitum //

eko doṣo'sti nānyo'sya sodyaprabhṛti satyavān /
saṃvatsareṇa kṣīṇāyurdehanyāsaṃ kariṣyati //
rājovāca /

ehi sāvitri gacchasva anyaṃ varaya śobhane /
tasya doṣo mahāneko guṇānākramya ca sthitaḥ //

yathā me bhagavānāha nārado devasatkṛtaḥ /
saṃvatsareṇa so'lpāyurdehanyāsaṃ kariṣyati //
sāvitryuvāca /

sakṛdaṃśo nipatati sakṛtkanyā pradīyate /
sa kṛdāha dadānīti trīṇyetāni sakṛtsakṛte //

dīrghāyurathavā'lpāyuḥ saguṇo nirguṇo'pi vā /
sakṛdvṛto mayā bhartā na dvitīyaṃ vṛṇomyaham //

manasā niścayaṃ kṛtvātato vācā'bhidhīyate /
kriyate karmaṇā paścātpramāṇaṃ me manastataḥ //
nārada uvāca /

sthirā buddhirnaraśreṣṭha sāvitryā duhitustava /
naiṣā vārayituṃ śakyā dharmādasmātkathañcana //

nānyasminpuruṣe santi ye satyavati vai guṇāḥ /
pradānameva tasmānme rocate duhitustava //
rājovāca /

avicālyametaduktaṃ tathyaṃ ca bhavatā vacaḥ /
kariṣyāmyetadevaṃ ca gururhi bhagavānmama //
nārada uvāca /

avighnamastu sāvitryāḥ pradāne duhitustava /
sādhayiṣyāmyahaṃ tāvatsarveṣāṃ bhadramastu vaḥ //
mārkaṇḍeya uvāca /

evamuktvā svamutpatya nāradastridivaṃ gataḥ / rājā'pi duhituḥ sajjaṃ vaivāhikamakārayat //