Mahabharata · Chapter 3.286
tato niviśamānāṃstānsainikānrāvaṇānugāḥ /
abhijagmurgaṇā'nake piśācakṣudrarakṣasām //
parvaṇaḥ patano jambhaḥ kharaḥ krodhavaśo hariḥ /
prarujaścārujaścaiva praghasaścaivamādayaḥ //
tato'bhipatatāṃ teṣāmadṛśyānāṃ durātmanām /
antardhānavadhaṃ tajjñaścakāra sa vibhīṣaṇaḥ //
te dṛśyamānā haribhirbalibhirdūrapātibhiḥ /
nihatāḥ sarvaśo rājanmahīṃ jagmurgatāsavaḥ //
amṛṣyamāṇaḥ sabalo rāvaṇo niryayāvatha /
rākṣasānāṃ balairghoraiḥ piśācānāñca saṃvṛtaḥ //
yuddhaśāstravidhānajña uśanā iva cāparaḥ /
vyūhyacauśanasaṃ vyūhaṃ harīnabhyavahārayat //
rāghavastu viniryāntaṃ vyūḍhānīkaṃ daśānanam /
bārhaspatyaṃ vidhaṃ kṛtvā prativyūhya hyadṛśyata //
sametya yuyudhe tatra tato rāmeṇa rāvaṇaḥ /
yuyudhe lakṣmaṇaścāpi tathaivendrajitā saha //
virūpākṣeṇa sugrīvastāreṇa ca nisvarvaṭaḥ /
pauṇḍreṇa ca nalastatra paduśaḥ panasena ca //
viṣahyaṃ yaṃ hi yo mene sa sa tena sameyivān /
yuyudhe yuddhavelāyāṃ svabāhubalamāśritaḥ //
sa samprahāro vavṛdhe bhīrūṇāṃ bhayavardhanaḥ /
romasaṃharṣaṇo ghoraḥ purā devāsure yathā //
rāvaṇo rāmamānarcchacchaktiśūlāsivṛṣṭibhiḥ /
niśitairāyasaistīkṣṇai rāvaṇaṃ cāpi rāghavaḥ //
tathaivendrajitaṃ yattaṃ lakṣmaṇo marmabhedibhiḥ /
indrajiccāpi saumitriṃ bibheda bahubhiḥ śaraiḥ //
vibhīṣaṇaḥ prahastaṃ ca prahastaśca vibhīṣaṇam /
khagapatraiḥ śaraistīkṣṇairabhyavarṣadgatavyathaḥ //
teṣāṃ balavatāmāsīnmahāstrāṇāṃ samāgamaḥ / vivyathuḥ sakalā yena trayo lokāścarācarāḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0