Mahabharata · Chapter 3.147

dharmajño balavāñśūraḥ sadyo rākṣasapuṅgavaḥ /
bhakto'smānaurasaḥ putro netumarhati mātaram //

tava bhīma sutenāhaṃ nīto bhīmaparākrama /
akṣataḥ saha pāñcālyā gaccheyaṃ gandhamādanam //
vaiśampāyana uvāca /

bhrāturvacanamājñāya bhīmaseno ghaṭotkacam /
cintayāmāsa balavānmahābalaparākramam //

ghaṭotkacaśca dharmātmā smṛtamātraḥ pitustadā / kṛtāñjaliruṣātiṣṭhadabhivādyātha pāṇḍavān /
brāhmaṇāṃśca mahābāhuḥ sa ca tairaminanditaḥ //

uvāca bhīmasenaṃ sa pitaraṃ satyavikramaḥ //

smṛto'smi bhavatā śīghraṃ śuśrūṣurahamāgataḥ /
ājñāpaya mahābāho sarvaṃ kartā'smyasaṃśayam //

tacchrutvā bhīmasenastu rākṣasaṃ pariṣasvaje /
cintāyā samanaprāptamityuvāca vṛkodaraḥ //

haiḍimbeya pariśrāntā tava mātā'parājitā /
tvaṃ kaca kāmagamastāta balavānvaha tāṃ khaga //

skandhamāropya bhadraṃ te madhye'smākaṃ vihāyasā /
gaccha nīcikayā gatyā yathā caināṃ na pīḍayeḥ //
ghaṭotkaca uvāca /

dharmarājaṃ ca dhaumyaṃ ca kṛṣṇāṃ ca yamajau tathā /
ekopyahamalaṃ voḍhuṃ kimutādya sahāyavān //

[anye ca śataśaḥ śūrā vihaṅgāḥ kāmarūpiṇaḥ / sarvānvo brāhmaṇaiḥ sārdhaṃ vakṣyanti sahitā'nagha /
mandammandaṃ gamiṣyāmi vahandrupadanandinīm //
vaiśpāyana uvāca /

evamuktvā tataḥ kṛṣṇāmuvāha sa ghaṭotkacaḥ /
pāṇḍūnāṃ madhyago vīraḥ pāṇḍavānapi cāpare //

lomaśaḥ siddhamārgeṇa jagāmānupamadyutiḥ /
svenaiva sa prabhāveṇa dvītīya iva bhāskaraḥ //

brāhmaṇāṃścāpi tānsarvānsamupādāya rākṣasāḥ /
niyogādrākṣasenadrasya jagmurbhīmaparākramāḥ //

evaṃ suramaṇīyāni vanānyupavanāni ca /
ālokayantaste jagmurviśālāṃ badarīmanu //

te tvāśugatibhirvīrā rākṣasaistairmahājavaiḥ /
uhyamānā yayuḥ śīghraṃ mahadadhvānamalpavat //

deśānmlecchajanākīrṇānnānāratnākarāyutān /
dadṛśurgiripādāṃśca nānādhātusamācitān //

vidyāgharamākīrṇaānyutānvānarakinnaraiḥ /
tathā kimpuruṣaiścaiva gandharvaiścasamantataḥ //

mayūraiścabharaiścaiva hariṇai rurubhistathā /
varāhairgavayaiścaiva mahiṣaiśca samāvṛtān //

nadījālasamākīrṇānnānāpakṣiyutānbahūn / nānāvidhamṛgairjuṣṭāṃścāraṇaiścopaśobhitān /
samadaiścyaśi vihagaiḥ upairanvitāṃstathā //

te'vatīrya bahūndeśānuttarāṃśca kurūnapi /
dadṛśurvividhāścaryaṃ kailāsaṃ parvatottamam //

tasyābhyāśe tu dadṛśurnaranārāyaṇāśramam /
upetaṃ pādapairdivyaiḥ sadāpuṣpaphalopagaiḥ //

dadṛśustāṃ ca badarīṃ vṛttaskandhāṃ manoramām /
snigdhāmaviralacchāyāṃ śriyā paramayā yutām //

patraiḥ snigdhairaviralairupetāṃ mṛdubhiḥ śubhām /
viśālaśākhāṃ vistīrṇāmatidyutisamanvitām //

phalairupacitairdivyairācitāṃ svādubhirbhṛśam / madhusravaiḥ sadā divyāṃ maharṣigaṇasevitām /
madapramuditairnityaṃ nānādvijagaṇairyutām //

adaṃśamaśake deśe bahumūlaphalodake /
nīlaśādvalasañchanne devagandharvasevite //

subhūmibhāgaviśade svabhāvavidite śubhe /
jātāṃ himamṛdusparśe deśe'pahatakaṇṭake //

tāmupetya mahātmānaḥ saha tairbrāhmaṇarṣabhaiḥ /
avaterustataḥ sarve rākṣasaskandhataḥ śanaiḥ //

tatastamāśramaṃ puṇyaṃ naranārāyaṇāśritam /
dadṛśuḥ pāṇḍavā rājansahitā dvijapuṅgavaiḥ //

tamasā rahitaṃ puṇyamanāmṛṣṭaṃ raveḥ karaiḥ /
kṣuttṛṭśītoṣṇadoṣaiśca varjitaṃ śokanāśanam //

maharṣigaṇasambādhaṃ brāhmyā lakṣmyā samanvitam /
duṣpraveśaṃ mahārāja narairdharmabahiṣkṛtaiḥ //

balihomārcitaṃ divyaṃ susammṛṣṭānulepanam /
divyapuṣpopahāraiśca sarvato'bhivirājitam //

viśālairagniśaraṇaiḥ srugbhāṇḍairācitaṃ śubhaiḥ /
mahadbhistoyakalaśaiḥ kaṭhinaiścopaśobhitam //

śaraṇyaṃ sarvabhūtānāṃ brahmaghopanināditam / divyamāśrayaṇīyaṃ tamāśramaṃ śramanāśanam /
śriyā yutamanirdeśyaṃ devavaryopaśobhitam //

phalamūlāśanairdāntaiścārukṛṣṇājināmbaraiḥ /
sūryavaiśvānarasamaistapasā bhāvitātmabhiḥ //

maharṣibhirmokṣaparairyatibhirniyatendriyaiḥ /
brahmabhūtairmahābhāgairupetaṃ brahmavādibhiḥ //

so'bhyagacchanmahātejāstānṛṣīnniyataḥ śuciḥ /
bhrātṛbhiḥ sahito dhīmāndharmaputro yudhiṣṭhiraḥ //

divyajñānopapannāste dṛṣṭvā prāptaṃ yudhiṣṭhiram / abhyagacchanta suprītā divyā devamaharṣayaḥ /

prītāste tasya satkāraṃ vidhinā pāvakāpamāḥ /
upājahruśca salilaṃ puṣpamūlaphalaṃ śuci //

sa taiḥ prītyā'tha satkāramupanītaṃ maharṣibhiḥ /
prayataḥ pratigṛhyātha dharmarājo yudhiṣṭhiraḥ //

taṃ śakrasadanaprakhyaṃ divyagandhaṃ manoramam /
prītaḥ svargopamaṃ puṇyaṃ pāṇḍavaḥ saha kṛṣṇayā //

raviveśa śobhayā yuktaṃ bhrātṛbhiśca sahānagha /
brāhmaṇairvedavedāṅgapāragaiśca sahārcitaḥ //

tatrāpaśyatsa dharmātmā devadevarpipūjitam /
naranārāyaṇasthānaṃ bhāgīrathyopaśobhitam //

tasminmadhṛsravaphalāṃ brahmarṣigaṇabhāvinīm /
vadarīṃ tāmupāśritya pāṇḍavo bhrātṛbhiḥ saha //

mudā yuktā mahātmāno remire tatra te tadā / ālokayanto mainākaṃ nānādvijagaṇāyutam /
hiraṇyaśikharaṃ caiva madhye vindusaraḥ śivam //

bhāgīrathīṃ sutīrthāṃ ca śītāmalajalāṃ śivām /
maṇipravālaprastārāṃ pādapairuṣaśobhitām //

divyapuṣpasamākīrṇāṃ manaḥprītivivardhanīm /
vīkṣamāṇā mahātmāno vijahrustatra pāṇḍavāḥ //

tasmindevarṣicarite deśe paramadurgame / bhāgīrathīpuṇyajaletarpayāñcakrire pitṝn /
devānṛṣīṃśca kaunteyāḥ paramaṃ śaucamāsthitāḥ //

tatra te tarpayantaśca japantaśca kurūdvahāḥ /
brāhmaṇaiḥ sahitā vīrā hyavasanpuruparṣabhāḥ //

kṛṣṇāyāstatrapaśayntaḥ krīḍitānyamaraprabhāḥ / vicitrāṇi naravyāghrā remire tatra pāṇḍavāḥ //